ഫാത്തിമയുടെ മരണം സംബന്ധിച്ച ഏതന്വേഷണവും കോടതിയുടെ മേല്‍നോട്ടത്തില്‍ വേണമെന്ന ആവശ്യവുമായി കുടുംബം മദ്രാസ് ഹൈക്കോടതിയിലേക്ക്....
ഫാത്തിമ ലത്തീഫിന്റെ മരണം സംബന്ധിച്ച ഏതന്വേഷണവും കോടതിയുടെ മേല്‍നോട്ടത്തില്‍ വേണമെന്ന ആവശ്യവുമായി കുടുംബം മദ്രാസ് ഹൈക്കോടതിയിലേക്ക്. കൊച്ചിയിലെത്തിയ മുന്‍ അഡീഷനല്‍ സോളിസിറ്റര്‍ ജനറല്‍ ഇന്ദിര ജയ്‌സിങ്ങുമായി ഫാത്തിമയുടെ കുടുംബം കൂടിക്കാഴ്ച നടത്തി. ഫാത്തിമ മരിച്ച് 50 ദിവസം പിന്നിടുമ്പോഴും ഒരാളെപ്പോലും അറസ്റ്റ് ചെയ്തിട്ടില്ലെന്നതു കണക്കിലെടുത്താണു കുടുംബത്തിന്റെ നീക്കം. തന്റെ മരണത്തിന് ഉത്തരവാദികളെന്നു ഫാത്തിമ ചൂണ്ടിക്കാട്ടിയ ഒരാളിലേക്കു പോലും അന്വേഷണം എത്താത്തതില്‍ ദുരൂഹതയുണ്ടെന്നു ഫാത്തിമയുടെ പിതാവ് ലത്തീഫ് പറഞ്ഞു.
നേരത്തെ ഫാത്തിമയുടെ കേസ് വിദഗ്ദ സമിതിയെ കൊണ്ട് അന്വേഷിപ്പിക്കണമെന്നും ഐ.ഐ.ടിയില്‍ നടന്ന മരണങ്ങളില്‍ വിശദമായ അന്വേഷണം വേണമെന്നും മദ്രാസ് ഹൈക്കോടതി ആവശ്യപ്പെട്ടിരുന്നു. തമിഴ്‌നാട് സര്‍ക്കാര്‍ സിബിഐ അന്വേഷണം പ്രഖ്യാപിച്ചു രണ്ടാഴ്ച പിന്നിട്ടെങ്കിലും ഫാത്തിമയുടെ കേസ് സംബന്ധിച്ച് ആശങ്കയുണ്ടെന്നും കുടുംബം വെളിപ്പെടുത്തി. അന്വേഷണത്തെക്കുറിച്ച് നേരത്തെ തന്നെയുള്ള പരാതികള്‍ കുടുംബം ആവര്‍ത്തിച്ചു.
ഇക്കാര്യങ്ങളെല്ലാം മുന്‍നിര്‍ത്തിയാണു മദ്രാസ് ഹൈക്കോടതിയെ സമീപിക്കാന്‍ തീരുമാനിച്ചത്. ഇന്ദിര ജയ്‌സിങ്ങും ഇക്കാര്യത്തില്‍ അനുകൂലമായ നിയമോപദേശം നല്‍കി. കഴിഞ്ഞ നവംബര്‍ 9 നാണു ഐ.ഐ.ടിയിലെ എം.എ ഒന്നാം വര്‍ഷ ഹ്യുമാനിറ്റീസ് വിദ്യാര്‍ഥിയായ കൊല്ലം സ്വദേശി ഫാത്തിമ ലത്തീഫിനെ ഹോസ്റ്റല്‍ മുറിയില്‍ തൂങ്ങിമരിച്ച നിലയില്‍ കണ്ടെത്തിയത്.
https://www.facebook.com/Malayalivartha
