ഇന്ത്യയില്‍ ജീവിക്കണമെങ്കില്‍ ഭാരത് മാതാ കീ ജയ് പറഞ്ഞേ മതിയാവൂ'; വിവാദ പ്രസ്താവനയുമായി കേന്ദ്രമന്ത്രി; കേന്ദ്ര പെട്രോളിയം മന്ത്രി ധര്‍മേന്ദ്ര പ്രധാനാണു വിവാദ പ്രസ്താവനയുമായി രംഗത്തെത്തിയത് ;പുണെയില്‍ നടന്ന എ.ബി.വി.പിയുടെ 54-ാം സംസ്ഥാന (മഹാരാഷ്ട്ര) സമ്മേളനത്തില്‍ സംസാരിക്കുകയായിരുന്നു അദ്ദേഹം
പൗരത്വ ഭേദഗതി നിയമത്തിനെതിരായ പ്രതിഷേധങ്ങള്‍ രാജ്യത്തുടനീളം കൊടുമ്പിരിക്കൊണ്ടിരിക്കെ വിവാദ പരാമര്‍ശവുമായി കേന്ദ്ര പെട്രോളിയം മന്ത്രി ധര്‍മേന്ദ്ര പ്രധാന്‍. ഇന്ത്യയില്‍ ഒരാള്‍ ‘ഭാരത് മാതാ കീ ജയ്’ പറഞ്ഞേ മതിയാവൂ എന്നും അങ്ങനെയുള്ളവര്‍ക്കേ ഇവിടെ ജീവിക്കാന്‍ കഴിയൂ എന്നുമായിരുന്നു അദ്ദേഹത്തിന്റെ പ്രസ്താവന.
പുണെയില്‍ നടന്ന എ.ബി.വി.പിയുടെ 54-ാം സംസ്ഥാന (മഹാരാഷ്ട്ര) സമ്മേളനത്തില്‍ സംസാരിക്കുകയായിരുന്നു അദ്ദേഹം.
ഈ രാജ്യത്തിനു മുന്നില്‍ ഇപ്പോഴുള്ള വെല്ലുവിളി എന്താണ്? ഒരുവശത്ത് രാജ്യത്തിന്റെ പൗരത്വം. അതു പരിഗണിക്കണോ വേണ്ടയോ? ഉദ്ധം സിങ്ങിന്റെ ജീവത്യാഗം പാഴായിപ്പോകണോ? ഭഗത് സിങ്ങിന്റെ ത്യാഗം പാഴായിപ്പോകണോ? നേതാജി സുഭാഷ് ചന്ദ്ര ബോസിന്റെ ത്യാഗം പാഴായിപ്പോകണോ?
സ്വാതന്ത്ര്യത്തിനു വേണ്ടി കോടിക്കണക്കിനാളുകളാണു പൊരുതിയത്. സ്വാതന്ത്ര്യം ലഭിച്ച് 70 വര്‍ഷത്തിനു ശേഷമെങ്കിലും നമ്മുടെ പൗരന്മാരെ പരിഗണിക്കണ്ടേ? നമുക്കു നമ്മുടെ രാജ്യം ഒരു സത്രമാക്കണോ? ഇവിടെ വരുന്നത് ആരാണെങ്കിലും അവരെ ഇവിടെ ജീവിക്കാന്‍ അനുവദിക്കണോ? ഈ വെല്ലുവിളി നമ്മള്‍ നേരിടണം
ഒരു കാര്യം വളരെ വ്യക്തമായിപ്പറയാം. ഇന്ത്യയില്‍ ഒരാള്‍ ഭാരത് മാതാ കീ ജയ് പറഞ്ഞേ മതിയാവൂ. അങ്ങനെയുള്ളവര്‍ക്കേ ഇവിടെ ജീവിക്കാന്‍ കഴിയൂ,’ മന്ത്രി പറഞ്ഞു.
ലോകത്തിലെ ഭൂരിഭാഗം രാജ്യങ്ങളിലും പൗരത്വം രജിസ്റ്റര്‍ ചെയ്യാനുള്ള ചട്ടങ്ങള്‍ നിലനില്‍ക്കുന്നുണ്ടെന്നും അദ്ദേഹം അവകാശപ്പെട്ടു.
അതിനിടെ, സംസ്ഥാന സര്‍ക്കാരുകളോട് ആലോചിക്കുന്നത് അടക്കമുള്ള കൃത്യമായ നിയമ നടപടികള്‍ക്കു ശേഷം മാത്രമേ രാജ്യം മുഴുവന്‍ ദേശീയ പൗരത്വ രജിസ്റ്റര്‍ (എന്‍.ആര്‍.സി) നടപ്പാക്കുന്നതുമായി മുന്നോട്ടുപോകൂവെന്ന പ്രസ്താവനയുമായി കേന്ദ്ര നിയമമന്ത്രി രവിശങ്കര്‍ പ്രസാദ് രംഗത്തെത്തി. എന്നാല്‍ എന്‍.പി.ആറിനു വേണ്ടി ശേഖരിച്ച വിവരങ്ങള്‍ എന്‍.ആര്‍.സിക്കു വേണ്ടി ഉപയോഗിക്കുവോ ഉപയോഗിക്കാതിരിക്കുവോ ചെയ്യുമെന്നും ‘ദ സണ്‍ഡേ എക്‌സ്പ്രസു’മായുള്ള അഭിമുഖത്തില്‍ അദ്ദേഹം പറഞ്ഞു.
‘നിലവില്‍ എന്‍.ആര്‍.സിയുമായി ബന്ധപ്പെട്ട ഒരു നിലപാടെടുത്തിട്ടുണ്ട്. അതിലൊരു നിയമ പ്രക്രിയയുണ്ട്. ആദ്യം ഒരു തീരുമാനം, പിന്നീട് ഒരു വിജ്ഞാപനം, പിന്നെ പ്രക്രിയ, വേരിഫിക്കേഷന്‍, എതിര്‍പ്പുകള്‍, അതു കേള്‍ക്കല്‍, അപ്പീലിനു പോകാനുള്ള അവകാശം. സംസ്ഥാന സര്‍ക്കാരുകളുമായി ആലോചിക്കും. അവരുടെ അഭിപ്രായം സ്വീകരിക്കും.
എന്തെങ്കിലും ചെയ്യാനുണ്ടെങ്കിലും അതു പരസ്യമായി ചെയ്യും. എന്‍.ആര്‍.സിയില്‍ ഒരു രഹസ്യവുമില്ല. 2003-ലെ പൗരത്വ നിയമങ്ങളിലുള്ള മൂന്നും നാലും ചട്ടം ഉപയോഗിച്ചുള്ള പ്രക്രിയകള്‍ ആരംഭിക്കുമ്പോള്‍ പൊതുജനങ്ങളെ തീര്‍ച്ചയായും അറിയിച്ചിരിക്കും. അസമില്‍ എന്‍.ആര്‍.സി നടപ്പാക്കിയത് സുപ്രീം കോടതിയുടെ നിര്‍ദേശങ്ങളെത്തുടര്‍ന്നാണ്,’ അദ്ദേഹം പറഞ്ഞു.
https://www.facebook.com/Malayalivartha
