രാജ്യം മുഴുവന് പിന്തുണയ്ക്കുന്നു', പൗരത്വ ഭേദഗതി നിയമത്തെ പിന്തുണയ്ക്കാന് ഹാഷ്ടാഗ് പ്രചരണവുമായി മോദി; പൗരത്വ ഭേദഗതി നിയമത്തിനെതിരെ രാജ്യത്ത് ശക്തമായ പ്രതിഷേധങ്ങള് നടക്കുന്നതിനിടയില് ‘ഇന്ത്യ സപ്പോര്ട്ട് സി.എ.എ’ എന്ന ഹാഷ്ടാഗുമായി പ്രധാനമന്ത്രി നരേന്ദ്ര മോദി; ട്വിറ്ററിലൂടെയായിരുന്നു മോദിയുടെ പ്രതികരണം
ആരുടെയും പൗരത്വം എടുത്തുകളയാനല്ല പൗരത്വ ഭേദഗതി നിയമമെന്നും മോദി ട്വിറ്ററില് കുറിച്ചു.
‘#IndiaSupportsCAA’ എന്നായിരുന്നു ട്വീറ്റ്. വേട്ടയാടപ്പെട്ട അഭയാര്ത്ഥികള്ക്ക് പൗരത്വം നല്കുന്നതിനും ആരുടെയും പൗരത്വം എടുത്തു കളയുന്നതിനുമല്ല സി.എ.എ എന്നായിരുന്നു മോദിയുടെ ട്വീറ്റില് പറയുന്നു.
അതിനൊപ്പം നമോ ആപ്പ് വഴി ഈ വിവരങ്ങള് ഗ്രാഫിക്സും വീഡിയോയും വെച്ച് പ്രചരിപ്പിക്കണമെന്നും സി.എ.എയോടുള്ള പിന്തുണ കാണിക്കണമെന്നും മോദി ട്വീറ്റില് കൂട്ടിച്ചേര്ത്തു.
നേരത്തെ കേന്ദ്ര ആഭ്യന്തര മന്ത്രി അമിത് ഷായും ഇതേ കാര്യം പറഞ്ഞ് രംഗത്തെത്തിയിരുന്നു. ‘ന്യൂനപക്ഷങ്ങളുള്പ്പെടെ ആരുടെയും പൗരത്വം എടുത്തുകളയാന് ഈ നിയമത്തിനാവില്ല. ബംഗ്ലാദേശില് നിന്നും അഫ്ഗാനിസ്ഥാനില് നിന്നും പാകിസ്ഥാനില് നിന്നും വന്ന ന്യൂനപക്ഷങ്ങള്ക്ക് പൗരത്വം നല്കുകയാണ് ഇത് ചെയ്യുന്നത്’ എന്നായിരുന്നു അമിത് ഷാ പറഞ്ഞത്.
പൗരത്വ ഭേദഗതി നിയമവുമായി ബന്ധപ്പെട്ട് പ്രതിഷേധിച്ച 26 ഓളം പേര് രാജ്യത്ത് കൊല്ലപ്പെട്ടിട്ടുണ്ട്. ഉത്തര്പ്രദേശില് മാത്രം 19 പേര് കൊല്ലപ്പെട്ടു.
ബി.ജെ.പി-ജെ.ഡി.യു സഖ്യകക്ഷിയായ ബിഹാറില് ഉള്പ്പെടെ രാജ്യത്തെ പല സര്ക്കാരുകളും ദേശവ്യാപകമായി എന്.ആര്.സിക്കെതിരെ നിലപാട് എടുത്തിട്ടുണ്ട്. കേരളമടക്കമുള്ള സംസ്ഥാനങ്ങള് ദേശീയ ജനസംഖ്യാ രജിസ്റ്ററുമായി സഹകരിക്കില്ലെന്നും വ്യക്തമാക്കിയിട്ടുണ്ട്.
https://www.facebook.com/Malayalivartha