അംഗപരിമിതര്‍ക്കായി എല്ലാ ബസുകളിലും സൗകര്യങ്ങള്‍ ഏര്‍പ്പെടുത്തണമെന്ന് ഗതാഗത മന്ത്രാലയം. ഇതു സംബന്ധിച്ച് മന്ത്രാലയം വിജ്ഞാപനം പുറപ്പെടുവിച്ചു. മോട്ടോര്‍ വാഹന നിയമത്തിന്റെ ചട്ടം ഭേദഗതിചെയ്താണ് വിജഞ്ാപനം ഇറക്കിയത്. ചട്ടം മാര്‍ച്ച് ഒന്നിന് പ്രാബല്യത്തില്‍ വരും.

സീറ്റുകളില്‍ മുന്‍ഗണന, അറിയിപ്പുകള്‍ എന്നിവയ്ക്ക് പുറമേ ക്രച്ചസ്/വടി/വാക്കര്‍, കൈവരി/ഊന്ന് എന്നിവ ബസുകളില്‍ സൂക്ഷിക്കാന്‍ സൗകര്യം ഉണ്ടായിരിക്കണം എന്നത് പുതിയ നിയമപ്രകാരം നിര്‍ബന്ധമാണ്. വീല്‍ചെയര്‍ ഉപയോഗിക്കുന്നവര്‍ക്ക് അതിന് ആവശ്യമായ സൗകര്യവും ഉറപ്പാക്കണം.

ഈ സൗകര്യങ്ങളുണ്ടോ എന്നത് പരിശോധിച്ചതിനു ശേഷമേ ഇനി ബസുകള്‍ക്ക് ഫിറ്റ്നസ് നല്‍കുകയുള്ളൂ. ഇക്കഴിഞ്ഞ ജൂലൈ 24-ന് കരട് ചട്ടം പ്രസിദ്ധീകരിച്ച് പൊതുജനാഭിപ്രായം തേടിയിരുന്നു. ഒട്ടേറെ അഭിപ്രായങ്ങളും നിര്‍ദേശങ്ങളും അതുമായി ബന്ധപ്പെട്ട് മന്ത്രാലയത്തിന് ലഭിച്ചു. അവയെല്ലാം പരിഗണിച്ചാണ് അന്തിമ വിജ്ഞാപനം പുറപ്പെടുവിച്ചത്.