റിപബ്ലിക് ദിനത്തില്‍ പശ്ചിമ ബംഗാള്‍ സര്‍ക്കാറിന്റെ നിശ്ചലദൃശ്യാവതരണത്തിന് (ടാബ്ലോക്ക്) കേന്ദ്രസര്‍ക്കാറിന്റെ അനുമതിയില്ല. കേന്ദ്ര പ്രതിരോധമന്ത്രാലയമാണ് അനുമതി നിഷേധിച്ചത്. രണ്ട് തവണ യോഗം കൂടിയതിന് ശേഷമാണ് പശ്ചിമ ബംഗാളിന്റെ ടാബ്ലോക്ക് അനുമതി നിഷേധിച്ചതെന്ന് കേന്ദ്രസര്‍ക്കാര്‍ വ്യക്തമാക്കി. ആദ്യ യോഗത്തിന് ശേഷം വിശദപരിശോധനക്കായി ഇത് വിദഗ്ധസംഘത്തിന് അയക്കുകയായിരുന്നു. അവര്‍ കൂടി പരിശോധിച്ചതിന് ശേഷമാണ് അനുമതി നല്‍കേണ്ടെന്ന തീരുമാനത്തിലേക്ക് എത്തിയതെന്ന് സര്‍ക്കാര്‍ വൃത്തങ്ങള്‍ പറയുന്നു. 16 സംസ്ഥാനങ്ങളുടേയും 6 കേന്ദ്രമന്ത്രാലയങ്ങളുടെയും ടാബ്ലോകളാണ് റിപബ്ലിക് ദിനപരേഡിലുണ്ടാവുക.
ടാബ്ലോകള്‍ അവതരിപ്പിക്കുന്നതിനായി 52 അപേക്ഷകളാണ് ലഭിച്ചത്. ഇതില്‍ നിന്നും 22 എണ്ണം വിദഗ്ധസംഘം തെരഞ്ഞെടുക്കുകയായിരുന്നു. അതേസമയം, പൗരത്വ ഭേദഗതി നിയമത്തെ ബംഗാള്‍ എതിര്‍ത്തത് കൊണ്ടാണ് ടാബ്ലോക്ക് അനുമതി നല്‍കാതിരുന്നതെന്ന് തൃണമൂല്‍ കോണ്‍ഗ്രസ് എം.പി സൗഗത റോയ് പറഞ്ഞു.
പൗരത്വ ഭേദഗതി നിയമത്തില്‍ കേന്ദ്രസര്‍ക്കാറും ബംഗാള്‍ സര്‍ക്കാറും തമ്മില്‍ കടുത്ത ഭിന്നത നില നില്‍ക്കുന്നതിനിടെയാണ് ടാബ്ലോക്ക് അനുമതി നിഷേധിച്ചിരിക്കുന്നതെന്നത് ശ്രദ്ധേയമാണ്.