മുംബൈ മാരത്തണ്‍ 2020ല്‍ പങ്കെടുക്കവെ 64കാരന്‍ ഹൃദയാഘാതത്തെ തുടര്‍ന്ന് മരിച്ചു. മുതിര്‍ന്ന പൗരന്മാരുടെ വിഭാഗത്തില്‍ ഓടിക്കൊണ്ടിരുന്ന ഗജനന്‍ മല്‍ജാല്‍ക്കര്‍ ആണ് മരിച്ചത്. മാരത്തണില്‍ പങ്കെടുത്ത് നാല് കിലോമീറ്റര്‍ ദൂരം ഓടിയെത്തിയപ്പോഴേക്ക് തളര്‍ന്ന് വീഴുകയായിരുന്നു. ഉടനെ ബോംബെ ആശുപത്രിയില്‍ പ്രവേശിപ്പിച്ചെങ്കിലും മരണം സംഭവിച്ചു. മുംബൈയിലെ ഛത്രപതി ശിവജി മഹാരാജ് ടെര്‍മിനസ് (സി.എസ്.ടി) സ്റ്റേഷനില്‍ നിന്നാണ് 10കി.മി മാരത്തണ്‍ ആരംഭിച്ചത്.

നാല്‍പതുകാരനായ ഹിമാന്‍ഷു താക്കൂര്‍ ഉള്‍പ്പെടെ രണ്ട് പേരെ കൂടി ഹൃദയാഘാതത്തെ തുടര്‍ന്ന് ആശുപത്രിയില്‍ പ്രവേശിപ്പിച്ചിരുന്നു. ഹിമാന്‍ഷു താക്കൂറിനെ ആന്‍ജിയോപ്ലാസ്റ്റിക്ക് വിധേയനാക്കി. മറ്റൊരാള്‍ ആശുപത്രി വിട്ടു. അര്‍ദ്ധ മാരത്തണ്‍ രാവിലെ 5.15നും 10 കിലോമീറ്റര്‍ ഓട്ടം രാവിലെ 6.30നുമായിരുന്നു ആരംഭിച്ചത്.