കൊറോണ രോഗബാധ വ്യാപനം തടയാന്‍ രാജ്യത്ത് 21 ദിവസം സമ്പൂര്‍ണ അടച്ചിടല്‍ (ലോക്ക് ഡൗണ്‍) പ്രഖ്യാപിച്ചു. ചൊവ്വാഴ്ച രാത്രി രാജ്യത്തെ അഭിസംബോധന ചെയ്ത് നടത്തിയ പ്രസംഗത്തില്‍ പ്രധാനമന്ത്രി നരേന്ദ്രമോദിയാണ് ഇക്കാര്യം പ്രഖ്യാപിച്ചത്. ചൊവ്വാഴ്ച അര്‍ധരാത്രി 'അടച്ചിടല്‍' നിലവില്‍ വന്നു. ലോകത്ത് ആദ്യമായാണ് ഒരു രാജ്യത്ത് സമ്പൂര്‍ണ അടച്ചിടല്‍ പ്രഖ്യാപിക്കുന്നത്. ഏപ്രില്‍ 14 അര്‍ധരാത്രി വരെ നീളും. ഇക്കാലയളവില്‍ ജനതാകര്‍ഫ്യൂവിനു സമാനമായി ജനങ്ങള്‍ വീടിനുള്ളില്‍ കഴിയണമെന്ന് പ്രധാനമന്ത്രി അഭ്യര്‍ഥിച്ചു. 

വെന്റിലേറ്റര്‍ ഉള്‍പ്പെടെ മെഡിക്കല്‍ ഉപകരണങ്ങള്‍ വാങ്ങുന്നതിനും ആരോഗ്യ മേഖലയില്‍ അടിസ്ഥാന സൗകര്യമൊരുക്കുന്നതിനും 15,000 കോടി രൂപ നീക്കിവെച്ചതായും പ്രധാനമന്ത്രി അറിയിച്ചു. രാജ്യത്ത് കൊറോണ വ്യാപനം തടയുന്നതിന് കടുത്തനടപടികള്‍ അനിവാര്യമാണ്.സാമൂഹിക അകലം പാലിക്കലാണ് കൊറോണ വ്യാപനം തടയാനുള്ള ഫലപ്രദമായ മാര്‍ഗം. എല്ലാവരും വീടിനുള്ളില്‍ത്തന്നെ കഴിയണം. വീടിനുള്ളില്‍ 'ലക്ഷ്മണരേഖ' സൂക്ഷിക്കണം. പുറത്തേക്കുള്ള ഓരോ ചുവടും അകത്തേക്ക് രോഗാണുവിനെ ക്ഷണിക്കലാണ് -മോദി അഭിപ്രായപ്പെട്ടു.

കൊറോണ വൈറസ് വ്യാപനത്തിന് 21 ദിവസം വേണമെന്നാണ് ലോകത്തെ ആരോഗ്യവിദഗ്ധര്‍ അഭിപ്രായപ്പെട്ടിരിക്കുന്നത്. ഈ കാലയളവിലാണ് രാജ്യത്ത് സമ്പൂര്‍ണ ലോക്ഡൗണ്‍ നടപ്പാക്കുന്നത്. ഇത് രോഗബാധ തടയുന്നതിന് അനിവാര്യമാണ്. ഈ നടപടി ഇപ്പോള്‍ സ്വീകരിച്ചില്ലെങ്കില്‍ പല കുടുംബങ്ങളും 21 വര്‍ഷം പിന്നിലേക്ക് പോകും.സംസ്ഥാനങ്ങള്‍, കേന്ദ്ര ഭരണപ്രദേശങ്ങള്‍, ജില്ലകള്‍, ഗ്രാമങ്ങള്‍ തുടങ്ങി എല്ലാ മേഖലകളും അടച്ചിടും. ഇതിനായി ഭരണസംവിധാനങ്ങള്‍ കാര്യക്ഷമമായ നടപടി സ്വീകരിക്കണം. രാജ്യത്തെ ജനങ്ങളെ രക്ഷിക്കാന്‍ ഇത് അത്യാവശ്യമാണ് -മോദി പറഞ്ഞു.
ജനതാകര്‍ഫ്യൂ വന്‍ വിജയമാക്കിയ രാജ്യത്ത് ഇതിന്റെ തുടര്‍ച്ചയാണ് അടച്ചിടല്‍ ഏര്‍പ്പെടുത്തുന്നതെന്നും പ്രധാനമന്ത്രി പറഞ്ഞു. കൊറോണയെ നേരിടാന്‍ സ്വകാര്യമേഖലയുടെ സഹകരണം അനിവാര്യമാണ്. സ്വകാര്യ ആശുപത്രികളും സ്വകാര്യ ലാബുകളും കൊറോണ ബാധയെ നേരിടാന്‍ സേവനം നല്‍കണം. രാജ്യത്ത് അവശ്യസാധന ലഭ്യത ഉറപ്പാക്കിയിട്ടുണ്ട്.