കൊവിഡ് 19 വൈറസിനെതിരെ ഇന്ത്യ നടത്തുന്ന പോരാട്ടങ്ങളെ ശക്തിപ്പെടുത്താന്‍ അടിയന്തര ഫണ്ട് അനുവദിച്ച് കേന്ദ്ര സര്‍ക്കാര്‍. 15,000 കോടി രൂപ മൂല്യമുള്ള ഫണ്ടാണ് സര്‍ക്കാര്‍ അനുവദിച്ചിരിക്കുന്നത്. 'കൊവിഡ് 19 അടിയന്തര പ്രതികരണ, ആരോഗ്യ സംവിധാന സന്നദ്ധതാ പാക്കേജ്' എന്ന് പേരിട്ടിരിക്കുന്ന ഈ പദ്ധതി മൂന്ന് കാലയളവുകളിലായാണ് കേന്ദ്ര സര്‍ക്കാര്‍ നടപ്പില്‍ വരുത്തുക. 

ജനുവരി 2020 മുതല്‍ ജൂണ്‍ 2020 വരെയുള്ള കാലയളവിലേക്കാണ് തുകയുടെ ഒരു ഭാഗം ചിലവഴിക്കുക, രണ്ടാം ഘട്ടമായ ജൂണ്‍ 2020 മുതല്‍ മാര്‍ച്ച് 2021 വരെ അടുത്ത സംഘ്യയും ഏപ്രില്‍ 2021 മുതല്‍ മാര്‍ച്ച് 2024 വരെ ആകെത്തുകയുടെ അവസാന ഭാഗവും രാജ്യത്തെ ആരോഗ്യരംഗത്തിനായും രോഗപ്രതിരോധത്തിനായും ചിലവഴിക്കും. സംസ്ഥാനങ്ങള്‍ക്കും കേന്ദ്ര ഭരണ പ്രദേശങ്ങളുമാകും ഈ തുക പൂര്‍ണമായും ഉപയോഗിക്കുക.
കൊവിഡ് ആശുപത്രികളില്‍ വികസനം എത്തിക്കുക, തീവ്ര പരിചരണ വിഭാഗങ്ങളെ ശക്തമാക്കുക, ഓക്‌സിജന്‍ വിതരണം കാര്യക്ഷമമാക്കുക, മരുന്നുകളും ഭക്ഷണവും ഉറപ്പാക്കുക, ലബോറട്ടറികളുടെ സ്ഥാപനം, സുരക്ഷ തുടങ്ങിയ കാര്യങ്ങള്‍ക്കുവേണ്ടിയാണ് തുക പ്രധാനമായും ഉപയോഗപ്പെടുത്തേണ്ടത്. ദേശീയ ആരോഗ്യ മിഷന്‍ ഡയറക്ടറാണ് ഇക്കാര്യങ്ങള്‍ വിശദീകരിച്ചത്. പി.പി.ഇ ഉപകരണങ്ങള്‍ വാങ്ങുക, എന്‍ 95 മാസ്‌കുകള്‍ വാങ്ങുക, ആശുപത്രികളും ആംബുലന്‍സുകളും അണുവിമുക്തമാക്കുക എന്നീ നടപടികളിലാണ് പദ്ധതിയുടെ ആദ്യ ഘട്ടത്തില്‍ പ്രധാനമായും നടപ്പാക്കുക, അദ്ദേഹം പറഞ്ഞു.