ഐ.എ.എസ് ഉദ്യോഗസ്ഥനായ ഡി.കെ. രവിയുടെ മരണത്തില്‍ സി.ബി.ഐ അന്വേഷണം നടത്തണമെന്ന് ആവശ്യപ്പെട്ട് കര്‍ണാടകയിലെ നിരവധി ഐ.എ.എസ് ഉദ്യോഗസ്ഥര്‍ പ്രധാനമന്ത്രി നരേന്ദ്ര മോദിക്ക് കത്തയച്ചു. 13.58 ലക്ഷം പേരാണ് ഓണ്‍ലൈന്‍ വഴി ഈ ക്യാമ്പയിനില്‍ പങ്കെടുത്തിരിക്കുന്നത്.
രവിയുടെ സ്വഭാവത്തെ അപകീര്‍ത്തിപ്പെടുത്താനുള്ള ചില ശ്രമങ്ങള്‍ പല സ്ഥലങ്ങളില്‍ നിന്നും ഉണ്ടാകുന്നുണ്ടെന്ന് അഡീഷണല്‍ ചീഫ് സെക്രട്ടറി എം. മദന ഗോപാല്‍ വാര്‍ത്താ ഏജന്‍സിയോട് പറഞ്ഞു. രണ്ടാം തവണയും രവിയെ കൊലപ്പെടുത്താന്‍ തങ്ങള്‍ അനുവദിക്കില്ലെന്ന് അദ്ദേഹം വ്യക്തമാക്കി. സംസ്ഥാനത്ത് കേസ് അന്വേഷണം നടത്തുന്നവര്‍ കഴിവുള്ളവരാണെന്നും എന്നാല്‍ ഇത് മറ്റൊരു ഗണത്തില്‍പ്പെട്ട കേസായതിനാല്‍ അത് സ്വതന്ത്ര ഏജന്‍സിക്ക് കൈമാറണമെന്നും മദന ഗോപാല്‍ കൂട്ടിച്ചേര്‍ത്തു.
മണല്‍മാഫിയയില്‍ നിന്നും ഭീഷണി നേരിട്ടിരുന്ന മുപ്പത്തിയാറുകാരനായ രവിയെ കഴിഞ്ഞ ദിവസമാണ് ബംഗളൂരുവിലെ സ്വന്തം ഫ്‌ലാറ്റില്‍ ദുരൂഹ സാഹചര്യത്തില്‍ തൂങ്ങി മരിച്ച നിലയില്‍ കണ്ടെത്തിയത്. കോടിക്കണക്കിന് രൂപയുടെ നികുതി വെട്ടിപ്പ് നടത്തിയ ഒരു വന്‍കിട കമ്പനിയുടെ തട്ടിപ്പ് പുറത്തുകൊണ്ടുവരാനുള്ള ശ്രമത്തിലായിരുന്നു രവി. കമ്പനിക്കെതിരെയുള്ള തെളിവുകള്‍ ശേഖരിച്ചു വന്ന അദ്ദേഹം തന്റെ പദ്ധതി സഹപ്രവര്‍ത്തകരുമായി ചര്‍ച്ച ചെയ്യുകയും ചെയ്തിരുന്നു.
സംഭവത്തില്‍ സി.ബി.ഐ അന്വേഷണം വേണമെന്ന് പറഞ്ഞ കേന്ദ്രമന്ത്രി സദാനന്ദ ഗൗഡ താന്‍ ഇക്കാര്യം ആവശ്യപ്പെട്ട് ആഭ്യന്തരമന്ത്രി രാജ്‌നാഥ് സിംഗിനെ കാണുമെന്ന് അറിയിച്ചിരുന്നു. എന്നാല്‍ നല്ല രീതിയില്‍ അന്വേഷണം നടത്താന്‍ പൊലീസിനാകുമെന്നും അതിനാല്‍ സിബിഐ അന്വേഷണത്തിന്റെ ആവശ്യമില്ലെന്നുമാണ് കര്‍ണാടക മുഖ്യമന്ത്രി സിദ്ധരാമയ്യ കഴിഞ്ഞ ദിവസം വ്യക്തമാക്കിയത്.
രവി തങ്ങളുടെ മാത്രമല്ല രാജ്യത്തിന്റെ മകനാണെന്ന് പറഞ്ഞ മാതാപിതാക്കള്‍ കേസ് സി.ബി.ഐയ്ക്ക് കൈമാറിയില്ലെങ്കില്‍ ആത്മഹത്യ ചെയ്യുമെന്ന് ഭീഷണി മുഴക്കിയിട്ടുണ്ട്. മാതാപിതാക്കള്‍ക്ക് നീതി ഉറപ്പാക്കുമെന്ന് മുഖ്യമന്ത്രി ഉറപ്പ് നല്‍കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha