'വര്ക്ക് ഫ്രം ഹോം' സുഗമമായി നടത്താനുളള സംവിധാനങ്ങള് സജ്ജമാക്കാന് ടെലികോം, ഐടി വകുപ്പുകള്ക്ക് നിര്ദേശം
അടുത്ത ഒരു വര്ഷത്തേക്കെങ്കിലും വീട്ടിലിരുന്നു ജോലി ഐടി മേഖലയിലും മറ്റും തുടര്ന്നേക്കാമെന്ന സാഹചര്യത്തില് 'വര്ക്ക് ഫ്രം ഹോം' സുഗമമായി നടത്താനുളള സംവിധാനങ്ങള് സജ്ജമാക്കാന് ടെലികോം, ഐടി വകുപ്പുകള്ക്ക് കേന്ദ്രസര്ക്കാര് നിര്ദേശം നല്കി.
ലോക്ഡൗണിനെത്തുടര്ന്ന് പല കമ്പനികളും കോവിഡ് ഭീഷണി അടങ്ങുന്നതുവരെ മിക്ക മേഖലകളിലും 'വര്ക്ക് ഫ്രം ഹോം' സംവിധാനമായി. ഈ രീതി തുടരുമെന്നും പ്രഖ്യാപിച്ചു. വിപ്രോ പോലുള്ള കമ്പനികള് 25% ജീവനക്കാര് മാത്രം ഓഫിസിലെത്തിയാല് മതിയാകുമെന്നു തീരുമാനിച്ചതായി റിപ്പോര്ട്ടുണ്ടായിരുന്നു.
വിഡിയോ കോള്, ഡേറ്റ കൈമാറ്റം എന്നിവയ്ക്കു സുരക്ഷിത സംവിധാനം ഒരുക്കാനും തടസ്സമില്ലാതെ അതിവേഗ ഇന്റര്നെറ്റ് ലഭ്യമാക്കാനും വകുപ്പുകളോടു മന്ത്രി രവിശങ്കര് പ്രസാദ് ആവശ്യപ്പെട്ടു. സുരക്ഷിതമായ വിഡിയോ കോണ്ഫറന്സിങ് ആപ് വികസിപ്പിച്ചെടുക്കാന് ഐടി മന്ത്രാലയം മത്സരം പ്രഖ്യാപിച്ചിരുന്നു.
സ്വന്തം കംപ്യൂട്ടറില് ജോലി ചെയ്യുമ്പോള് വിവര സുരക്ഷ സംബന്ധിച്ച ആശങ്കയാണ് വലിയ വെല്ലുവിളി. ഔദ്യോഗിക വിവരങ്ങളും രേഖകളും കൈമാറുമ്പോഴും കൈകാര്യം ചെയ്യുമ്പോഴും ചോര്ച്ചയ്ക്കുള്ള സാധ്യത കൂടുതലാണ്. ഈ ആശങ്ക പരിഹരിക്കുന്നതിനുള്ള സാങ്കേതികവിദ്യ വികസിപ്പിക്കാനും ആവശ്യപ്പെട്ടിട്ടുണ്ട്. ഇക്കാര്യങ്ങള് ചര്ച്ച ചെയ്യാന് ഐടി കമ്പനികളുടെ കൂട്ടായ്മയായ 'നാസ്കോം' അടക്കമുള്ളവയുടെ യോഗം വിളിക്കും.
https://www.facebook.com/Malayalivartha
