ജമ്മു കശ്മീരില്‍ ഭീകരരുമായുണ്ടായ ഏറ്റുമുട്ടലില്‍ കേണല്‍, മേജര്‍ റാങ്കിലുള്ള ഉദ്യോഗസ്ഥര്‍ ഉള്‍പ്പെടെ 5 സുരക്ഷാ ഉദ്യോഗസ്ഥര്‍ വീരമൃത്യു വരിച്ചു. വടക്കന്‍ കശ്മീരിലെ ഹന്ദ്വാരയിലെ ഗ്രാമത്തിലായിരുന്നു ഭീകരരുമായി ഏറ്റുമുട്ടലുണ്ടായതെന്ന് അധികൃതര്‍ ഞായറാഴ്ച അറിയിച്ചു. രണ്ട് സൈനികരും ജമ്മു കശ്മീര്‍ പൊലീസ് ജവാനുമാണ് വീരമൃത്യു വരിച്ച മറ്റ് ഉദ്യോഗസ്ഥര്‍. വീരമൃത്യു വരിച്ച 21 രാഷ്ട്രീയ റൈഫിള്‍സ് കമാന്‍ഡിങ് ഓഫിസറായ കേണല്‍ അശുതോഷ് ശര്‍മ നിരവധി ഭീകരവിരുദ്ധ ഓപറേഷനുകളുടെ ഭാഗമായിട്ടുള്ള ഉദ്യോഗസ്ഥനാണെന്ന് ഇന്ത്യന്‍ സൈനിക ഉദ്യോഗസ്ഥര്‍ അറിയിച്ചു. രണ്ട് ഭീകരരെ ഏറ്റുമുട്ടലില്‍ വധിച്ചു.
ഹന്ദ്വാരയിലെ ഒരു വീട്ടിലെത്തിയ ഭീകരരുമായി 21 രാഷ്ട്രീയ റൈഫിള്‍സ് സംഘം ഏറ്റുമുട്ടുകയായിരുന്നു. വീട്ടില്‍ താമസമുണ്ടായിരുന്നവരെ സുരക്ഷിത സ്ഥാനത്തേക്കു മാറ്റിയതായും സൈന്യം അറിയിച്ചു.വെള്ളിയാഴ്ച പാകിസ്താന്‍ നടത്തിയ വെടിവെയ്പില്‍ ഗുരുതരമായി പരിക്കേറ്റ് സൈനിക ആശുപത്രിയില്‍ ചികിത്സയിലിരിക്കെയാണ് രണ്ട് പേരും ശനിയാഴ്ച രാവിലെയോടെ മരിച്ചത്. പരിക്കേറ്റ മറ്റൊരു സൈനികനും ചികിത്സയിലാണ്. ജമ്മുകശ്മീരിലെ ബാരാമുള്ളയില്‍ വെള്ളിയാഴ്ച വൈകിട്ട് 3.30 ഓടെയാണ് വെടിവെയ്പുണ്ടായത്. ഹവല്‍ദാര്‍ ഗോകരണ്‍ സിങും നായിക് ശങ്കര്‍ എസ് പി കോയിയുമാണ് വീരമൃത്യു വരിച്ച സൈനികര്‍.

2020 മെയ് ഒന്നിന് വൈകുന്നേരം മൂന്നര മണിയോടെ പ്രകോപനമൊന്നുമില്ലാതെ വെടിനിര്‍ത്തല്‍ കരാര്‍ ലംഘിച്ച് ബാരമുള്ളയിലെ രാംപുര്‍ സെക്ടറില്‍ പാകിസ്താന്‍ വെടിവെയ്പ് നടത്തിയെന്ന് സൈനികവക്താവ് കേണല്‍ രാജേഷ് കാലിയ ഔദ്യോഗികക്കുറിപ്പില്‍ അറിയിച്ചു. ഇന്ത്യന്‍ സൈന്യം പ്രത്യാക്രമണം നടത്തിയതായും അദ്ദേഹം വ്യക്തമാക്കി. ഏപ്രില്‍ 30 ന് നിയന്ത്രണരേഖയിലെ പൂഞ്ചില്‍ പാകിസ്താന്‍ വെടിവെയ്പും ഷെല്ലാക്രമണവും നടത്തിയിരുന്നു. ഏപ്രില്‍ 29 ന് മാന്‍കോട്ടിലും മെന്ധാരിലും പ്രകോപനമില്ലാതെ പാകിസ്താന്‍ ആക്രമണം നടത്തുകയും ചെയ്തു

കഴിഞ്ഞ കുറച്ച് ദിവസങ്ങളായി ഈ മേഖലയില്‍ തീവ്രവാദികളുടെ നുഴഞ്ഞുകയറ്റ ശ്രമം വലിയ തോതില്‍ നടന്നിരുന്നു. ഇതിനെ ചെറുക്കുന്നതിനിടെയാണ് ആക്രമണം ഉണ്ടായത്. പൊലീസിന്റെയും സൈന്യത്തിന്റെയും സംയുക്ത സംഘത്തിനു നേരെ തീവ്രവാദികള്‍ ആക്രമണം നടത്തുകയായിരുന്നു. രാത്രിയാണ് ഇവര്‍ കൊല്ലപ്പെട്ടത്.

കൂടുതല്‍ ഭീകരവാദികള്‍ ഗ്രാമത്തില്‍ എത്തിയിട്ടുണ്ടെന്നാണ് സൈന്യത്തിന്റെ കണക്കുകൂട്ടല്‍. ഇവരെ കണ്ടെത്താനുള്ള നടപടി ക്രമങ്ങള്‍ പുരോഗമിക്കുകയാണ്. തീവ്രവാദികള്‍ക്ക് പ്രാദേശിക സഹായം ലഭിക്കുന്നുണ്ടെന്നാണ് സൂചന. ഒപ്പം, വീട്ടുകാരെ ഭീഷണിപ്പെടുത്തി വീടുകളില്‍ കഴിയുന്ന തീവ്രവാദികളും ഉണ്ട്. ഗ്രാമം മുഴുവന്‍ ഇപ്പോള്‍ സൈന്യവും പൊലീസും സംയുക്തമായി പരിശോധിക്കുകയാണ്.കേണല്‍ അശുതോഷ് ശര്‍മ്മ, മേജര്‍ അനുജ്, ഒരു ലാന്‍സ് നായിക്, ഒരു റൈഫിള്‍മാന്‍, പൊലീസ് എസ് ഐ ഷക്കീല്‍ ഖാസി എന്നിവരാണ് കൊല്ലപ്പെട്ടതെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.

അതേ സമയം, കൊവിഡ് 19 ബാധിച്ച തീവ്രവാദികളെ ചാവേറാക്കി അതിര്‍ത്തി കടത്താനുള്ള ശ്രമങ്ങള്‍ നടക്കുന്നുണ്ടെന്നും സൈന്യം പറയുന്നു. വിവിധ സ്ഥലങ്ങളില്‍ ഇത് നടക്കുന്നുണ്ട്. ഇവിടുത്തെ ഗ്രാമീണരില്‍ വൈറസ് പരത്തി സൈനികരിലേക്കും എത്തിക്കുക എന്നതാണ് ലക്ഷ്യം. ഇതിനെതിരെ കരുതല്‍ എടുക്കുന്നുണ്ടെന്നും തെരച്ചില്‍ തുടരുന്നുണ്ടെന്നും സൈന്യം അറിയിച്ചു.