ഉം-പുന്‍ ചുഴലിക്കാറ്റ് അടുത്ത 24 മണിക്കൂറില്‍ അതീതീവ്രമാകാന്‍ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്‍കി. ഇതിന്റെ ഫലമായി ഒഡീഷ, ബംഗാള്‍, ആന്‍ഡമാന്‍ നിക്കോബാര്‍ ദ്വീപ് എന്നിവയുടെ തീരപ്രദേശങ്ങളില്‍ ശക്തമായ കാറ്റും മഴയും ഉണ്ടാകുമെന്നും അറിയിച്ചു. ബംഗാള്‍, ഒഡീഷ എന്നിവിടങ്ങളില്‍ നിന്നും പതിനൊന്നു ലക്ഷത്തോളം ആളുകളെ മാറ്റിപ്പാര്‍പ്പിക്കേണ്ടി വരുമെന്നും അതിനായി ദേശീയ ദുരന്ത നിവാരണ സേനയെ നിയോഗിച്ചിട്ടുണ്ടെന്നും അധികൃതര്‍ അറിയിച്ചു.

ബംഗാള്‍ ഉള്‍ക്കടലിന്റെ മധ്യഭാഗത്തു നിന്ന് പടിഞ്ഞാറന്‍ ഭാഗത്തേക്കു നീങ്ങിയ ചുഴലിക്കാറ്റ് അടുത്ത 24 മണിക്കൂറിനുള്ളില്‍ ശക്തമായ ചുഴലിക്കാറ്റായി മാറുമെന്നാണ് കാലാവസ്ഥ വകുപ്പ് അറിയിച്ചത്. അടുത്ത 12 മണിക്കൂറില്‍വേഗത കുറച്ച് നീങ്ങുന്ന ഉം-പുന്‍ ബംഗാളിലെ ദിഗ ബംഗ്ലദേശിലെ ഹാത്തിയ ദ്വീപുകളിലൂടെ കടന്ന് വേഗത കൂടി മേയ് 20-ന് ശക്തമായ ചുഴലിക്കാറ്റായി മാറിയേക്കും.

ബംഗാള്‍, ഒഡീഷ എന്നീ സംസ്ഥാനങ്ങളിലെ വിവിധ മേഖലകളില്‍ മേയ് 18-ന് ശക്തമായ മഴയും ഒറ്റപ്പെട്ട പ്രദേശങ്ങളില്‍ ചെറിയ തോതില്‍ മഴയ്ക്കും സാധ്യതയുണ്ട്. മേയ് 19-ന് മഴ ശക്തമായേക്കും. ഇരുപതോടെ ഒഡീഷയില്‍ അതിശക്തമായ മഴയ്ക്കും സാധ്യതയുണ്ടെന്നാണ് മുന്നറിയിപ്പ്.