ഏറെ അശങ്കപ്പെടുത്തുന്ന കണക്കുകളാണ് നമ്മുടെ അയല്‍ സംസ്ഥാനമായ തമിഴ്‌നാട്ടില്‍. അതില്‍ ഏറ്റവും പരിതാപകരം ചെന്നൈയില്‍ ആണ്. ചെന്നൈയില്‍ 31 പേരടക്കം തമിഴ്നാട്ടില്‍ ഇന്ന് 38 കോവിഡ് മരണം. തമിഴ്നാട്ടില്‍ ആകെ മരണം 435 ആയി. ആകെ രോഗികള്‍ 44,661. ചെന്നൈയില്‍ മാത്രം 31,896 രോഗികള്‍. അതേസമയം, രാജ്യത്ത് കോവിഡ് മരണം ഒന്‍പതിനായിരം കടന്നു. ഇന്നലെ മാത്രം 311 പേര്‍ക്ക് ജീവന്‍ നഷ്ടമായതോടെ ആകെ മരണം 9,195 ആയി. 24 മണിക്കൂറിനിടെ 11,929 പേര്‍ക്ക് പുതിയതായി രോഗം സ്ഥിരീകരിച്ചു. ഇതുവരെ 3,20,922 പേര്‍ക്ക് വൈറസ് ബാധ കണ്ടെത്തി. നിലവിലെ നിരക്കില്‍ രോഗവ്യാപനം തുടര്‍ന്നാല്‍ അടുത്തയാഴ്ച്ചയോടുകൂടി രാജ്യത്ത് നാല് ലക്ഷം കോവിഡ് ബാധിതരുണ്ടാകും.

ചെന്നൈ അടക്കം തമിഴ്നാട്ടിലെ പല സ്ഥലങ്ങളില്‍നിന്നും ഓരോ ദിവസവും ഇവിടെ 1500ഓളം പേര്‍ക്കാണ് പുതിയതായി കൊവിഡ് സ്ഥിരീകരിക്കുന്നത്. മലയാളി സംഘടനകളുടെ നേതൃത്വത്തില്‍ ക്രമീകരിച്ച വാഹനങ്ങളിലാണ് ആളുകള്‍ തിരികെ പോരുന്നത്. ലോക്ക്ഡൗണില്‍ ഇളവുനല്‍കിയതോടെ കേരളത്തിലേക്ക് വലിയതോതില്‍ ആളുകള്‍ എത്തിയിരുന്നു. ഭൂരിപക്ഷവും വിദ്യാര്‍ത്ഥികള്‍, തൊഴില്‍ നഷ്ടമായവര്‍, താത്കാലിക ആവശ്യങ്ങള്‍ക്കായി എത്തിയവരുമാണ്.റോഡുമാര്‍ഗം പോകുന്നതിന് കേരളസര്‍ക്കാരിന്റെ പാസ് കിട്ടാന്‍ താമസം നേരിടുന്നുണ്ട്. എന്നാല്‍, വിമാനയാത്രക്കാര്‍ക്ക് വേഗത്തില്‍ പാസ് ലഭിക്കും. സംസ്ഥാനത്തെ കൊവിഡ് വ്യാപനം ഒക്ടോബര്‍ നവംബര്‍വരെ തുടരാന്‍ സാദ്ധ്യതയുണ്ടെന്ന സംസ്ഥാന സര്‍ക്കാര്‍ വ്യക്തമാക്കിയതോടെയാണ് കൂട്ടത്തോടെയുള്ള ഒഴിഞ്ഞുപോക്കല്‍.

തുടര്‍ച്ചയായി രണ്ടാം ദിവസമാണ് രാജ്യത്ത് പതിനൊന്നായിരത്തിലധികം പേര്‍ക്ക് കോവിഡ് സ്ഥിരീകരിച്ചത്. രോഗവ്യാപനം രൂക്ഷമായ പതിനഞ്ച് നഗരങ്ങളില്‍ കഴിഞ്ഞ പത്ത് ദിവസത്തിനിടെ രോഗികളുടെയെണ്ണത്തില്‍ 50 ശതമാനം വര്‍ധനവുണ്ടായി. ഈ മാസം മാത്രം 3,587 പേര്‍ കോവിഡ് ബാധിച്ച് മരിച്ചു. മരണനിരക്കില്‍ ലോകരാജ്യങ്ങളുടെ പട്ടികയില്‍ ഒന്‍പതാം സ്ഥാനത്താണ് ഇന്ത്യ. ഒരുലക്ഷത്തി അറുപത്തിരണ്ടായിരത്തി മുന്നൂറ്റി എഴുപത്തിയൊമ്പത് പേര്‍ക്ക് ഇതുവരെ രോഗം ഭേദമായി. ഇന്നലെ മാത്രം 8,049 പേര്‍ രോഗമുക്തരായി. നിലവില്‍ ഒന്നരലക്ഷത്തിനടുത്ത് പേര്‍ ചികില്‍സയിലുണ്ട്. 18 ശതമാനം രോഗികളും മഹാരാഷ്ട്രയിലാണ്. 12 ശതമാനം പേര്‍ ഡല്‍ഹിയിലും ഒന്‍പത് ശതമാനം തമിഴ്നാട്ടിലും. കഴിഞ്ഞ മൂന്നാഴ്ച്ചയ്ക്കിടെ പുതുതായി രോഗം സ്ഥിരീകരിച്ച 80 ശതമാനം ജില്ലകളും വടക്കുക്കിഴക്കന്‍ സംസ്ഥാനങ്ങളിലാണ്.

അസമിലും ത്രിപുരയിലുമാണ് കൂടുതല്‍ കേസുകള്‍. ലഡാക്കില്‍ കഴിഞ്ഞ രണ്ട് ദിവസമായി നൂറിലധികം പേര്‍ക്ക് വൈറസ് ബാധ കണ്ടെത്തിയത് ആശങ്കയ്ക്കിടയാക്കുന്നു. യുപി, ഹരിയാന, ബംഗാള്‍ തുടങ്ങിയ സംസ്ഥാനങ്ങളിലും രോഗികളുടെയെണ്ണം ക്രമാതീതമായി വര്‍ധിക്കുകയാണ്. രാജ്യത്താകെ 56 ലക്ഷം സാംപിളുകള്‍ പരിശോധിച്ചതായി ഐസിഎംആര്‍ അറിയിച്ചു. രോഗവ്യാപനം രൂക്ഷമായ സാഹചര്യത്തില്‍ ഡല്‍ഹിയില്‍ അടുത്ത ഒരാഴ്ച്ചയ്ക്കുള്ളില്‍ 20,000 കോവിഡ് കിടക്കകള്‍ സജ്ജമാക്കാന്‍ സര്‍ക്കാര്‍ ഉത്തരവിട്ടു. ഹോട്ടലുകള്‍, സ്വീകരണ ഹാളുകള്‍, നഴ്സിങ് ഹോം എന്നിവിടങ്ങളില്‍ സൗകര്യമൊരുക്കാനാണ് നിര്‍ദേശം.