തമിഴ്നാട്ടിലെ തെങ്കാശിയില്‍ കസ്റ്റഡി മരണം. വീരകേരളപുത്തൂര്‍ പോലീസ് സ്റ്റേഷനില്‍വച്ച് മര്‍ദനമേറ്റ ഒരു ഓട്ടോറിക്ഷാ ഡ്രൈവര്‍ ദിവസങ്ങള്‍ നീണ്ട ചികിത്സയ്ക്കൊടുവില്‍ മരണപ്പെട്ടു. കഴിഞ്ഞ മാസം 10-നാണ് എന്‍. കുമരശന്‍ എന്ന 25-കാരന് പോലീസ് സ്‌റ്റേഷനില്‍ വച്ച് മര്‍ദ്ദനമേറ്റത്.

ഭൂമി തര്‍ക്കവുമായി ബന്ധപ്പെട്ട് ചോദ്യം ചെയ്യുന്നതിനായി മേയ് എട്ടിനു വീരകേരളപുത്തൂര്‍ പോലീസ് സ്റ്റേഷനിലേക്ക് കുമരശനെ വിളിപ്പിച്ചതോടെയാണു സംഭവങ്ങള്‍ക്കു തുടക്കം. അന്നു കുമരശനെ ഭീഷണിപ്പെടുത്തിയ ശേഷം എസ്.ഐ. ചന്ദ്രശേഖര്‍ തിരിച്ചയച്ചു. പിറ്റേന്ന് ഒരു പോലീസുകാരനെ ഓട്ടോറിക്ഷാ സ്റ്റാന്‍ഡില്‍വിട്ട് കുമരശനെ വിളിപ്പിക്കുകയായിരുന്നു. അടുത്ത ദിവസം രാവിലെ 11-ന് കുമരശന്‍ പോലീസ് സ്റ്റേഷനിലെത്തി.

ഭൂമി തര്‍ക്കവുമായി ബന്ധപ്പെട്ട് എസ്.ഐ മുന്നോട്ടു വച്ച നിര്‍ദേശം കുമരശന്‍ തള്ളിയതോടെ ആക്രമണം തുടങ്ങി. എസ്.ഐ. അയാളെ നെഞ്ചില്‍ ചവിട്ടിവീഴ്ത്തി. തുടര്‍ന്നു ജനനേന്ദ്രിയത്തില്‍ പലതവണ ബൂട്ടിട്ടു ചവിട്ടി. ഭീഷണിപ്പെടുത്തിയശേഷം വീട്ടിലേക്കു പറഞ്ഞുവിടുകയായിരുന്നു.

കുമരശന്‍ രാത്രിയില്‍ രക്തം ഛര്‍ദിക്കാന്‍ തുടങ്ങിയതോടെ അയാളെ സുരണ്ടായിയിലെ ആശുപത്രിയിലേക്കു മാറ്റുകയായിരുന്നു. പിന്നീട് തിരുനല്‍വേലിയിലെ സര്‍ക്കാര്‍ ആശുപത്രിയിലേക്ക് മാറ്റി. കുമരശന്റെ വ്യക്കയ്ക്കും മറ്റ് ആന്തരികാവയവങ്ങള്‍ക്കും ഗുരുതരമായ ക്ഷതമേറ്റിട്ടുണ്ടെന്ന് ഇവിടുത്തെ ഡോക്ടര്‍മാര്‍ കണ്ടെത്തി. പോലീസുകാര്‍ മര്‍ദിച്ചകാര്യം അയാള്‍ ഡോക്ടര്‍മാരോടും പറഞ്ഞു.

ഈ മാസം 14-നു പോലീസ് ഉദ്യോഗസ്ഥര്‍ ആശുപത്രി സന്ദര്‍ശിച്ചെങ്കിലും മൊഴി രേഖപ്പെടുത്താന്‍ വിസമ്മതിച്ചതായി ബന്ധുക്കള്‍ ആരോപിച്ചു. കുമരശന്റെ പിതാവ് എ. നവനീതകൃഷ്ണന്റെ പരാതിയെ തുടര്‍ന്ന് രണ്ട് പോലീസുകാര്‍ക്കെതിരേ തമിഴ്നാട് പോലീസ് കേസെടുത്തു.