മോദിയിറങ്ങുമോ, വന്‍മരം വീഴുമോ. അണിയറയില്‍ വലിയ നീക്കങ്ങള്‍. ഉത്തര്‍ പ്രദേശില്‍ കോണ്‍ഗ്രസിനെ പുനരുജ്ജീവിപ്പിക്കാനുളള പദ്ധതികളുടെ ഭാഗമായി ഡല്‍ഹിയില്‍നിന്ന് ലഖ്‌നൗവിലേക്ക് താമസം മാറാന്‍ ഒരുങ്ങി പ്രിയങ്ക ഗാന്ധി വദ്ര. സര്‍ക്കാര്‍ ബംഗ്ലാവ് വിട്ടുനല്‍കാന്‍ ആവശ്യപ്പെട്ട് കഴിഞ്ഞ ദിവസം പ്രിയങ്കയ്ക്ക് ലഭിച്ച നോട്ടീസ് ഇതുസംബന്ധിച്ച തീരുമാനം വേഗത്തിലാക്കിയെന്ന് പ്രിയങ്കയോട് അടുത്ത വൃത്തങ്ങള്‍ അറിയിച്ചു. സുരക്ഷാ കാരണങ്ങളെ തുടര്‍ന്ന് 1997-ലാണ് പ്രിയങ്ക ഗാന്ധിക്ക് താമസിക്കുന്നതിനായി സര്‍ക്കാര്‍ ബംഗ്ലാവ് അനുവദിച്ചത്. ഓഗസ്റ്റ് 1-ന് ബംഗ്ലാവ് ഒഴിയണമെന്നാവശ്യപ്പെട്ട് കഴിഞ്ഞ ദിവസമാണ് പ്രിയങ്കയ്ക്ക് കേന്ദ്ര ഭവന-നഗരകാര്യമന്ത്രാലയത്തിന്റെ നോട്ടീസ് ലഭിച്ചത്.

എസ്പിജി സുരക്ഷയില്ലാത്തതിനാല്‍ സര്‍ക്കാര്‍ ബംഗ്ലാവ് ഉപയോഗിക്കുന്നതിന് സാധുതയില്ലെന്നാണ് നോട്ടീസില്‍ വ്യക്തമാക്കിയിരുന്നത്. 3.26 ലക്ഷം രൂപ കുടിശ്ശിക നല്‍കാനും ആവശ്യപ്പെട്ടിരുന്നു. ഓണ്‍ലൈന്‍ വഴി ഉടന്‍ തന്നെ പ്രിയങ്ക പണം അടച്ചു. പ്രിയങ്കയ്ക്ക് നേരെയുള്ള സര്‍ക്കാര്‍ നടപടി കോണ്‍ഗ്രസ് നേതൃത്വത്തോടുള്ള പ്രധാനമന്ത്രിയുടെ കടുത്ത വിദ്വേഷത്തിന്റെ കുടിപ്പകയാണ് പ്രതിഫലിപ്പിക്കുന്നതെന്ന് കോണ്‍ഗ്രസ് ആരോപിച്ചിരുന്നു. എന്നാല്‍ ഈ വര്‍ഷം തുടക്കം തന്നെ താമസം മാറുന്നത് സംബന്ധിച്ച് പ്രിയങ്ക ആലോചിച്ചിരുന്നുവെന്നും കൊറോണ വൈറസ് വ്യാപനവും മകളുടെ പരീക്ഷയുമാണ് പദ്ധതി ദീര്‍ഘിപ്പിച്ചതെന്നും കോണ്‍ഗ്രസ് പറയുന്നു. ഇന്ദിര ഗാന്ധിയുടെ അമ്മായിയായ ഷീല കൗളിന്റെ ലഖ്‌നൗവിലെ വസതിയിലേക്കാണ് പ്രിയങ്ക താമസം മാറുന്നത്.

കോണ്‍ഗ്രസ് പ്രവര്‍ത്തകയായിരുന്നു കൗള്‍. യു.പി. കോണ്‍ഗ്രസ് പ്രവര്‍ത്തനങ്ങള്‍ക്ക് കൗള്‍ ഹൗസ് ബേസ് ക്യാമ്പാക്കാനാണ് പ്രിയങ്കയുടെ തീരുമാനം. താമസം മാറുന്നതിലൂടെ യു.പി. മുഖ്യമന്ത്രി ആദിത്യനാഥിന്റെ നഗരത്തിലേക്കാണ് പ്രിയങ്ക എത്തുന്നത്. തൊഴിലില്ലായ്മ, കുടിയേറ്റ തൊഴിലാളികളുടെ പാലായനം, പൗരത്വ നിയമ ഭേദഗതിക്കെതിരായ പ്രതിഷേധങ്ങളില്‍ പങ്കെടുത്തവര്‍ക്ക് നേരെയുണ്ടായ ആക്രമണം, അഴിമതി തുടങ്ങി നിരവധി വിഷയങ്ങളില്‍ പ്രിയങ്ക ആദിത്യനാഥിനെതിരെ ആരോപണങ്ങള്‍ ഉന്നയിച്ചിരുന്നു.യോഗി സര്‍ക്കാരിനെതിരെ കൂടുതല്‍ വെല്ലുവിളികള്‍ ഉയര്‍ത്തി ബി.ജെ.പിക്കെതിരായ പോരാട്ടം ശക്തമാക്കി കോണ്‍ഗ്രസിന്റെ നഷ്ടപ്രതാപം വീണ്ടെടുക്കാനുള്ള തയ്യാറെടുപ്പിലാണ് പ്രിയങ്ക എത്തുന്നത്.