പാക്കിസ്ഥാന്‍ സ്റ്റോക് എക്‌സ്‌ചേഞ്ചിലുണ്ടായ ആക്രമണത്തിനു പിന്നില്‍ ഇന്ത്യയാണെന്ന് ആരോപിച്ച് പാക്കിസ്ഥാന്‍ വിദേശകാര്യ മന്ത്രി ഷാ മഹമ്മുദ് ഖുറേഷിയും പ്രധാനമന്ത്രിയും ഇമ്രാന്‍ ഖാനും രംഗത്തെത്തിയിരുന്നു. ആക്രമണത്തില്‍ 4 സെക്യൂരിറ്റി ജീവനക്കാരും ഒരു പൊലീസുകാരനുമാണ് കൊല്ലപ്പെട്ടത്. നാല് അക്രമികളെ പൊലീസ് വധിക്കുകയും ചെയ്തു. ബലൂചിസ്ഥാനില്‍ നിന്നുള്ള ബലൂച് ലിബറേഷന്‍ ആര്‍മി സംഭവത്തിന്റെ ഉത്തരവാദിത്തം ഏറ്റെടുക്കുന്നതായി ട്വിറ്ററില്‍ അവകാശപ്പെട്ടിരുന്നു.

ഐക്യരാഷ്ട്ര സംഘടനയുടെ സുരക്ഷാ സമിതിയില്‍ ആക്രമണത്തെ അപലപിച്ചുകൊണ്ട് ചൈന നല്‍കിയ പ്രസ്താവനയെ എതിര്‍ത്ത് യുഎസ്. ജര്‍മനിക്കു പിന്നാലെയാണ് ഇന്ത്യയെ പരോക്ഷമായി അനുകൂലിക്കുന്ന നിലപാടുമായി യുഎസിന്റേയും നീക്കം. ജര്‍മനിയും യുഎസും പ്രസ്താവനയില്‍ ഒപ്പിടാന്‍ വിസമ്മതിച്ചതിനു പിന്നാലെ ഏറെ വൈകിയാണ് യുഎന്‍ സുരക്ഷാ സമിതിയുടെ ഔദ്യോഗിക പ്രസ്താവന പുറത്തിറങ്ങിയത്. ചൊവ്വാഴ്ചയാണ് ചൈന സുരക്ഷാ സമിതിയില്‍ പ്രസ്താവന അവതരിപ്പിച്ചത്. എന്നാല്‍ അവസാന നിമിഷം എതിര്‍പ്പുമായി ജര്‍മനി എത്തി. തൊട്ടുപിന്നാലെ യുഎസ്സും.

ജൂണ്‍ 29-ന് കറാച്ചി സ്റ്റോക് എക്‌സ്‌ചേഞ്ചിനു നേരേയുണ്ടായ ആക്രമണത്തെ അപലപിച്ചുകൊണ്ടും പാക്കിസ്ഥാന് പിന്തുണ പ്രഖ്യാപിച്ചുകൊണ്ടുമാണ് ചൈനയുടെ പ്രസ്താവന. ഭീകരവാദം അതിന്റെ എല്ലാ രൂപങ്ങളിലും പ്രകടനങ്ങളിലും രാജ്യാന്തര സമാധാനത്തിനും സുരക്ഷയ്ക്കും ഏറ്റവും ഗുരുതരമായ ഭീഷണിയാണെന്ന് സുരക്ഷാ സമിതി അംഗീകരിച്ച പ്രസ്താവനയില്‍ പറയുന്നു.

ഭീകരാക്രമണത്തിനു പിന്നിലെ കുറ്റവാളികളെയും ആസൂത്രിതരെയും സ്‌പോണ്‍സര്‍മാരെയും സാമ്പത്തിക സഹായം നല്‍കിയവരെയും നീതിപീഠത്തിനു മുന്‍പില്‍ കൊണ്ടുവരേണ്ട ആവശ്യകത സുരക്ഷാ സമിതി അടിവരയിട്ടു. ഇതിനായി രാജ്യാന്തര നിയമങ്ങള്‍ അനുസരിച്ച് പാക്കിസ്ഥാന്‍ സര്‍ക്കാരുമായി എല്ലാ രാജ്യങ്ങളും സഹകരിക്കണമെന്നും സമിതി ആവശ്യപ്പെട്ടു.