മുന്നറിയിപ്പുകള്‍ എന്നും നമുക്കു മുന്നിലേക്കെത്തുന്നുണ്ട്. പക്ഷെ എന്തുകൊണ്ടോ അതൊക്കെ അനുസരിക്കാന്‍ നമുക്കെവിടെ നേരം അല്ലെ.. ഈ കോവിഡൊന്നും നമ്മളെ തൊടില്ല. അതുകൊണ്ട് നമുക്ക് ഈ കൊറോണയെ അങ്ങ് അവഗണിക്കാം,മാസ്‌കുകള്‍ വലിച്ചെറിയാം ,നിര്‍ദേശങ്ങള്‍ കാറ്റില്‍ പറത്താം ഇങ്ങനെയൊക്കെയാവും മനസ് ചിന്തിക്കുന്നത് അല്ലെ.. അതെ ,അതിന്റെ ഫലമാണ് എത്ര പിടിച്ചുവെച്ചിട്ടും പിടിതരാതെ പടര്‍ന്നു നടക്കുന്ന കോവിഡ് മഹാമാരി.

രാജ്യത്ത് കോവിഡ് 19 സമൂഹ വ്യാപനത്തിലേക്ക് കടന്നുകഴിഞ്ഞതായി ഇന്ത്യന്‍ മെഡിക്കല്‍ അസോസിയേഷന്‍(ഐ.എം.എ). സ്ഥിതി വളരെ മോശമാകുമെന്നും രോഗവ്യാപനം രൂക്ഷമാകുമെന്നും ഐ.എം.എ ഹോസ്പിറ്റല്‍ ബോര്‍ഡ് ഓഫ് ചെയര്‍പേഴ്സണ്‍ ഡോ.വി.കെ.മോംഗ പറഞ്ഞു.. ഇന്നലെ 34,000ത്തിലേറെ കൊവിഡ് കേസുകളായിരുന്നു രാജ്യത്ത് റിപ്പോര്‍ട്ട് ചെയ്തത്. ഈ സാഹചര്യത്തിലാണ് രാജ്യത്ത് കൊവിഡ് വ്യാപനം നടന്നെന്ന് ഐഎംഎ ചൂണ്ടിക്കാട്ടിയിരിക്കുന്നത്. വാര്‍ത്താ ഏജന്‍സിയായ എഎന്‍ഐയോട് ഐഎംഎ ഭാരവാഹി ഡോ. വികെ മോംഗയാണ് ഇക്കാര്യം വ്യക്തമാക്കിയത്.


'ഓരോ ദിവസവും 30,000 ത്തിന് എന്ന രീതിയില്‍ കേസുകളുടെ എണ്ണം വര്‍ധിച്ചുവരികയാണ്. കേസ് വര്‍ധനവുമായി ബന്ധപ്പെട്ട് നിരവധി ഘടകങ്ങളുണ്ടെങ്കിലും മൊത്തത്തില്‍ ഇത് ഇപ്പോള്‍ ഗ്രാമപ്രദേശങ്ങളിലേക്ക് വ്യാപിക്കുന്നു. ഇപ്പോഴത് സമൂഹ വ്യാപനം കാണിക്കുന്നു' ഡോ.മോംഗ പറഞ്ഞു.

ഇന്ത്യയില്‍ ഇതുവരെ സമൂഹ വ്യാപനം സംഭവിച്ചിട്ടില്ലെന്ന് കേന്ദ്ര ആരോഗ്യ മന്ത്രാലയത്തിന്റെ ആവര്‍ത്തിച്ചുള്ള അവകാശവാദങ്ങള്‍ക്കിടെയാണ് വിദഗ്ദ്ധരുടെ ഈ വിലയിരുത്തല്‍.

ഇതിനിടെ തിരുവനന്തപുരം ജില്ലയിലെ രണ്ടു പ്രദേശങ്ങളില്‍ കോവിഡിന്റെ സമൂഹ വ്യാപനം ഉണ്ടായതായി മുഖ്യമന്ത്രി പിണറായി വിജയന്‍ പറഞ്ഞിരുന്നു. രാജ്യത്ത് സര്‍ക്കാര്‍ തലത്തില്‍ സമൂഹ വ്യാപനം സ്ഥിരീകരിക്കുന്നത് ഇതാദ്യമായിട്ടായിരുന്നു.


കൊവിഡ് കേസുകള്‍ നഗരങ്ങളിലും ഗ്രാമങ്ങളിലും ഒരുപോലെ വ്യാപിക്കുകയാണെന്നും ഇത് നിന്ത്രിക്കാന്‍ ബുദ്ധിമുട്ടാണെന്നുമാണ് ഐഎംഎ ചൂണ്ടിക്കാട്ടുന്നത്. ഡല്‍ഹിയില്‍ ഞങ്ങള്‍ക്ക് ഇത് ഉള്‍ക്കൊള്ളാന്‍ കഴിഞ്ഞെന്ന് പറഞ്ഞ ഡോക്ടര്‍ മഹാരാഷ്ട്ര, കര്‍ണാടക, കേരളം, ഗോവ, മധ്യപ്രദേശ് തുടങ്ങിയ സംസ്ഥാനങ്ങളിലെ പ്രശ്‌നങ്ങള്‍ പ്രധാനപ്പെട്ടതാണെന്നും. ഇവിടങ്ങളിലെ സംസ്ഥാന സര്‍ക്കാരുകള്‍ സ്ഥിതിഗതികള്‍ നിയന്ത്രണവിധേയമാക്കാന്‍ ശ്രദ്ധ ചെലുത്തുകയും കേന്ദ്ര സര്‍ക്കാരിന്റെ സഹായം തേടണമെന്നും കൂട്ടിച്ചേര്‍ത്തു.

യുഎസിനും ബ്രസീലിനും പിന്നില്‍ ഏറ്റവും കൂടുതല്‍ കോവിഡ് രോഗികളുള്ള ലോകത്തിലെ മൂന്നമാത്തെ രാജ്യമാണ് നിലവില്‍ ഇന്ത്യ. പത്ത് ലക്ഷത്തിന് മുകളില്‍ കോവിഡ് ബാധിതരുണ്ട് ഇപ്പോള്‍ രാജ്യത്ത്.

പട്ടണങ്ങളിലേക്കും ഗ്രാമപ്രദേശങ്ങളിലേക്കും കോവിഡ് പടര്‍ന്നുകൊണ്ടിരിക്കുകയാണ്. ഇത് സ്ഥിതഗതികള്‍ നിയന്ത്രിക്കുന്നതില്‍ വലിയ ബുദ്ധിമുട്ടുണ്ടാക്കുമെന്നും ഐ.എം.എ മുന്നറിയിപ്പ് നല്‍കുന്നു.

എത്ര മുന്നറിയിപ്പുകള്‍ കേട്ടതാണ് നമ്മള്‍.. എന്നിട്ടും അവയൊക്കെ ഇങ്ങനെ അവഗണിക്കുന്നതിന്റെ പരിണിത ഫലമാണ് ഈ കോവിഡ് വ്യാപനം. ആദ്യം ചൈനയില്‍ കൊറോണ എന്ന വാര്‍ത്ത കേട്ടപ്പോള്‍ നമ്മള്‍ക്ക് അത് അപരിചിതമായിരുന്നു.. പിന്നെപ്പിന്നെ ഈയാംപാറ്റകളെപോലെ മരിച്ചുവീഴുന്ന മനുഷ്യരെ കണ്ടപ്പോള്‍ ഇങ്ങനെയൊക്കെ സംഭവിക്കുമോ എന്ന ചിന്തകളായിരുന്നു..ഒടുവില്‍ മഹാ വ്യാധി ചൈനയുടെ അതിര്‍വരമ്പുകളും കടന്നു പല രാജ്യങ്ങളിലായി വ്യാപിച്ചു..കൊറോണ ,അല്ലെങ്കില്‍ കോവിഡെന്ന പദം പതുക്കെ എല്ലാവര്ക്കും സുപരിചിതമായി.ജീവിതത്തില്‍ ഇതുവരെ ശീലിക്കാത്ത പല ശീലങ്ങളും നമ്മള്‍ സ്വായത്തമാക്കി.. മുഖാവരണം അണിഞ്ഞും കൈകള്‍ ഇടയ്ക്കിടെ ശുചീകരിച്ചും സാമൂഹിക അകലം പാലിച്ചും നമ്മള്‍ മുന്‍കരുതലുകള്‍ എടുത്തു..പക്ഷെ,ആ മഹാമാരി നമ്മുടെ സമീപത്തെത്തിയപ്പോള്‍ മാസ്‌കുകള്‍ വലിച്ചെറിഞ്ഞും, ശരിയായ രീതിയില്‍ ധരിക്കാതെയും ഇഷ്ടംപോലെ പല കാര്യങ്ങള്‍ സ്വയം കണ്ടെത്തി പുറത്തിറങ്ങി നടന്നും നമ്മള്‍ കൊറോണയെ നമ്മുടെ വീടുകളിലേക്ക് ക്ഷണിച്ചു വരുത്തുകയാണ്. ഒന്നോര്‍ക്കുക..ചൈനയില്‍ നിന്ന് ഈ മാരക വൈറസ് ഇന്ത്യയിലെത്തിയെങ്കില്‍,നമ്മുട സമീപ പ്രദേശങ്ങളിലെത്തിയെങ്കില്‍ അത് നമ്മളിലേക്ക് എത്താന്‍ അധികം ദൂരമില്ല