കഴിഞ്ഞ വര്ഷം അംഗീകാരം നല്കിയ പരിഷ്കരിച്ച ഉപഭോക്തൃ സംരക്ഷണ ബില് നിയമമായി പ്രാബല്യത്തില് വന്നു
ഇന്നലെ പ്രാബല്യത്തില് വന്ന പുതിയ ഉപഭോക്തൃ സംരക്ഷണ നിയമത്തിന്റെ ഭാഗമായുള്ള 'കണ്സ്യൂമര് പ്രൊട്ടക്ഷന്(ഇ-കോമേഴ്സ്)' വ്യവസ്ഥകള് കേന്ദ്ര ഉപഭോക്തൃ മന്ത്രാലയം കഴിഞ്ഞ ദിവസമാണു പുറത്തിറക്കി. 1986-ലെ ഉപഭോക്തൃ സംരക്ഷണ നിയമത്തിനു പകരമായി ഓണ്ലൈന്, ടെലി മാര്ക്കറ്റിങ് വ്യാപാരമേഖലകളെക്കൂടി ഉള്പ്പെടുത്തി പരിഷ്കരിച്ച ഉപഭോക്തൃ സംരക്ഷണ ബില് കഴിഞ്ഞ വര്ഷമാണ് അംഗീകരിച്ചത്. ഇന്നലെ നിയമമായി പ്രാബല്യത്തില് വന്നു.
ഇകൊമേഴ്സ് കമ്പനികളില് നിന്നു വാങ്ങിയ ഉല്പന്നങ്ങള് മടക്കി നല്കിയാല് കാന്സലേഷന് നിരക്ക് പാടില്ലെന്നു പുതിയ വ്യവസ്ഥ. ഉപഭോക്താക്കളുടെ പരാതികള് പരിഹരിക്കാന് ഓഫിസറെ നിയമിക്കണമെന്നുതുള്പ്പെടെയുള്ള പുതിയ നിയമം ഉടന് പ്രാബല്യത്തില് വരും.
ഉപഭോക്താക്കളുടെ തര്ക്കം പരിഹരിക്കാന് നിയമിച്ച ഓഫിസറുടെ പേര്, പൂര്ണ വിലാസം എന്നിവ ഇ-കൊമേഴ്സ് കമ്പനികളുടെ വെബ്സൈറ്റുകളില് പ്രസിദ്ധീകരിക്കണം. പരാതികള് ലഭിച്ച വിവരം 48 മണിക്കൂറിനുള്ളില് അറിയിക്കണം. നടപടിയുടെ വിവരങ്ങള് ഒരു മാസത്തിനുള്ളിലും. ഇ-കൊമേഴ്സ് സൈറ്റുകളിലൂടെ വില്പന നടത്തുന്ന ഓരോ വ്യാപാരികളും പരാതികള് പരിഹരിക്കാന് ഓഫിസറെ നിയമിക്കണം.
ഇകൊമേഴ്സ് കമ്പനികളുടെ വെബ്സൈറ്റില് നല്കുന്ന ചിത്രവും യഥാര്ഥ ഉല്പന്നവും വ്യത്യാസപ്പെട്ടിരിക്കാന് പാടില്ല. വില്പനക്കാരില് നിന്നു ഉല്പന്നത്തിന്റെ വിശദാംശങ്ങള്, ചിത്രം എന്നിവ കൃത്യമാണെന്ന സത്യവാങ്മൂലം കമ്പനികള് വാങ്ങിയിരിക്കണം. ഇ-കൊമേഴ്സ് കമ്പനികളില് നിന്നു വാങ്ങിയ ഏത് ഉല്പന്നവും മടക്കി നല്കാം. സേവനങ്ങള് നിരസിക്കുക, പണം റീഫണ്ട് ചെയ്യാതിരിക്കുക എന്നിവ അനുവദനീയമല്ല.
സംസ്ഥാന കമ്മിഷനില് ഒരു പ്രസിഡന്റും 4 അംഗങ്ങളും എന്ന വ്യവസ്ഥ അതേപടി നിലനിര്ത്തി. ജില്ലാ ഉപഭോക്തൃതര്ക്ക പരിഹാര ഫോറത്തിന്റെ പേരും ഇനി കമ്മിഷന് എന്നായി മാറും.
ഒരു കോടി രൂപവരെ വരുന്ന പരാതികള് ഇനി ജില്ലാ കമ്മിഷനുകളില് കേള്ക്കാം. നേരത്തെ ഇതു 20 ലക്ഷം വരെയായിരുന്നു. 10 കോടി വരെയുള്ളതു സംസ്ഥാന കൗണ്സിലും അതിനു മുകളിലുള്ളതു ദേശീയ കൗണ്സിലും പരിഗണിക്കും. സംഭവം ഉണ്ടായ സ്ഥലം, ജോലിസ്ഥലം, സ്വന്തം താമസസ്ഥലം തുടങ്ങി എവിടെയും പരാതി സമര്പ്പിക്കാം. ഓണ്ലൈനായും പരാതിപ്പെടാം. ഓണ്ലൈന് മാര്ക്കറ്റിങ്, ഡയറക്ട് മാര്ക്കറ്റിങ് തുടങ്ങിയ മേഖലകളിലെ തട്ടിപ്പുകള്ക്കു തടയിടാനാണിത്.
കമ്മിഷനുകള്ക്ക് അവ പുറപ്പെടുവിക്കുന്ന ഉത്തരവുകള് പുനഃപരിശോധിക്കാനുള്ള അധികാരമുണ്ട്. സംസ്ഥാന കമ്മിഷനില് അപ്പീല് സമര്പ്പിക്കാനുള്ള കാലാവധി 30 ദിവസത്തില് നിന്നു 45 ദിവസമായി വര്ധിപ്പിച്ചു. സങ്കീര്ണമായ നിയമപ്രശ്നങ്ങളുള്ള കേസില് ദേശീയ കമ്മിഷനില് രണ്ടാം അപ്പീല് സമര്പ്പിക്കാം. പരാതി സമര്പ്പിക്കാനുള്ള സമയപരിധി 2 വര്ഷം വരെയാക്കി.
കോടതിക്കു പുറത്ത് ഒത്തുതീര്പ്പിനുള്ള സ്വാതന്ത്ര്യം നല്കുന്നു. ഇത്തരം കേസുകള് കമ്മിഷനുകളോടു ബന്ധപ്പെട്ടുള്ള മീഡിയേഷന് സെല്ലുകള്ക്കാകും കൈമാറുക. കേസുകള് തീര്പ്പാക്കുന്നതിനു 3 മാസമാണ് സമയപരിധി. ലാബ് പരിശോധന ആവശ്യമെങ്കില് 5 മാസം വരെ ആകാം.
ജില്ലാ കമ്മിഷനുകളുടെ വിധിക്കെതിരെ എതിര്കക്ഷിക്ക് അപ്പീല് നല്കണമെങ്കില് നഷ്ടപരിഹാരത്തുകയുടെ 50% കെട്ടിവയ്ക്കണം. നേരത്തേ, ഈ തുകയുടെ പരിധി 25,000 രൂപയായിരുന്നു.
https://www.facebook.com/Malayalivartha