രാമക്ഷേത്ര നിര്മ്മാണത്തിനുള്ള ഫണ്ട് ശേഖരിക്കാന് രാഹുല് ഗാന്ധി? രാഷ്ട്രീയ മുതലെടുപ്പ് തടയണമെന്ന് ജാര്ഖണ്ഡിലെ കോണ്ഗ്രസ് എം.എല്.എ; രാമക്ഷേത്ര നിര്മാണത്തിനു വിപുലമായ ഒരുക്കങ്ങള്; തറക്കല്ലിടാന് 40 കിലോ വെള്ളികല്ല്; ഓഗസ്റ്റ് അഞ്ചിനു തറക്കല്ലിടല്; ചടങ്ങില് കോണ്ഗ്രസിന് ക്ഷണമില്ല
അയോധ്യ രാമക്ഷേത്ര നിര്മാണം എല്ലാകാലത്തും ബി.ജെ.പിയുടെ രാഷ്ട്രീയ ആയുധമാണ്. രാമക്ഷേത്ര നിര്മാണത്തിന് സാഹചര്യം ഒരുങ്ങിയതിനാല് ഇനിയും ബി.ജെ.പിക്ക് മാത്രം ഈ വിഷയത്തില് മുതലെടുപ്പിന് അവസരം നല്കരുതെന്ന വാദവുമായി ജാര്ഖണ്ഡിലെ കോണ്ഗ്രസ് എം.എല്.എ രംഗത്ത് എത്തി. അയോധ്യയിലെ രാമക്ഷേത്ര നിര്മ്മാണത്തിനുള്ള ഫണ്ട് പിരിവിന് രാഹുല് ഗാന്ധി മുന്നിട്ടിറങ്ങണമെന്നാണ് എം.എല്.എ പ്രദീപ് യാദവിന്റെ ആവശ്യം. മറ്റ് ഏതെങ്കിലും പാര്ട്ടിക്കാര് ക്ഷേത്രനിര്മ്മാണത്തിന് മുന്നിട്ടിറങ്ങിയാല് അത് രാഷ്ട്രീയ മുതലെടുപ്പിന് കാരണമാകുമെന്നാണ് എംഎല്എ കത്തില് പറയുന്നത്.
രാമക്ഷേത്ര നിര്മാണത്തിലൂടെ ഒരു പാര്ട്ടിമാത്രം നേട്ടം കൊയ്യാന് ഇടവരരുത്. അതിനാലാണ് രാജ്യത്തിന്റെ ഐക്യവും മതേതരത്വവും ശക്തിപ്പെടുത്താന് ഉപകരിക്കുന്ന ആവശ്യം മുന്നോട്ടുവെക്കുന്നതെന്നും അദ്ദേഹം പറയുന്നു. ജാര്ഖണ്ഡ് വികാസ് മോര്ച്ച പ്രജാതാന്ത്രിക് ടിക്കറ്റിലാണ് പ്രദീപ് യാദവ് 2019 ല് നിയമസഭാ തെരഞ്ഞെടുപ്പില് വിജയിച്ചത്. പിന്നീട് ജെ.വി.എം.പി പാര്ട്ടി ബി.ജെ.പിയില് ലയിച്ചതോടെ അദ്ദേഹം കോണ്ഗ്രസില് ചേര്ന്നു. 2006 ല് ബി.ജെ.പി വിട്ട് ജെ.വി.എം.പിയിലെത്തിയ നേതാവാണ് അദ്ദേഹം. ബി.ജെ.പിയുമായി മുമ്പുണ്ടായിരുന്ന ബന്ധത്തിന്റെ അടിസ്ഥാനത്തിലല്ല ഈ ആവശ്യം മുന്നോട്ടുവെക്കുന്നതെന്നും അദ്ദേഹം കത്തില് പറയുന്നു. ഫണ്ട് പിരിവുമായി ബന്ധപ്പെട്ട് രാഹുല് ഗാന്ധിക്കയച്ച കത്തിന്റെ പകര്പ്പുകള് അദ്ദേഹം കോണ്ഗ്രസ് അധ്യക്ഷ സോണിയാഗാന്ധി, ജാര്ഖണ്ഡ് മുഖ്യമന്ത്രി ഹേമന്ദ് സോറന്, പശ്ചിമബംഗാള് മുഖ്യമന്ത്രി മമത ബാനര്ജി, ബിഎസ്പി അധ്യക്ഷ മായാവതി, ആര്ജെഡി അധ്യക്ഷന് ലാലു പ്രസാദ് യാദവ് തുടങ്ങിയവര്ക്കും അയച്ചിട്ടുണ്ട്.
ഇതിനിടെ ഓഗസ്റ്റ് അഞ്ചിന് നടക്കുന്ന തറകല്ലിടല് ചടങ്ങിന് വിപുലമായ ഒരുക്കളാണ് അയോധ്യയില് നടക്കുന്നത്. ക്ഷേത്ര തറക്കല്ലിടലിനു നാല്പ്പത് കിലോയുടെ വെള്ളിക്കല്ലാണ് ഉപയോഗിക്കുക. കോവിഡ് മാനദണ്ഡങ്ങള് അനുസരിച്ചായിരിക്കും തറക്കല്ലിടല് പരിപാടി നടക്കുക. അമ്പതോളം വി.ഐ.പികള് ചടങ്ങില് പങ്കെടുക്കുമെന്ന് ശ്രീരാമ ജന്മഭൂമി തീര്ഥ ട്രസ്റ്റ് അറിയിച്ചു. പ്രധാനമന്ത്രി നരേന്ദ്ര മോദി പങ്കെടുക്കുമെന്നാണ് റിപ്പോര്ട്ടുകള്. ഇക്കാര്യത്തില് സ്ഥിരീകരണമായിട്ടില്ല. വെള്ളിക്കല്ലുകൊണ്ട് തറക്കല്ലിടല് നടത്തുക പ്രധാനമന്ത്രിയായിരിക്കുമെന്നാണ് സൂചന. ഭക്തര്ക്ക് ശിലാസ്ഥാപനം തത്സമയം കാണുന്നതിനായി അയോധ്യയുടെ വിവിധ ഭാഗങ്ങളില് കൂറ്റന് ടെലിവിഷന് സ്ക്രീനുകള് സ്ഥാപിക്കും. എല്.കെ.അദ്വാനി, മുരളി മനോഹര് ജോഷി, ഉമാഭാരതി, ആര്എസ്എസ് അധ്യക്ഷന് മോഹന് ഭാഗവത് തുടങ്ങി പ്രമുഖരെയെല്ലാം ചടങ്ങിലേക്ക് ക്ഷണിച്ചിട്ടുണ്ടെന്ന് ട്രസ്റ്റ് അറിയിച്ചു.
ഇന്ത്യ-ചൈന അതിര്ത്തിയിലെ സംഘര്ഷത്തെ തുടര്ന്ന് അയോധ്യയില് രാമക്ഷേത്രം നിര്മ്മിക്കാനുളള പദ്ധതി താല്ക്കാലികമായി നിര്ത്തിവച്ചിരിക്കുകയായിരുന്നു. ഇന്ത്യ-ചൈന അതിര്ത്തിയിലെ സ്ഥിതി ഗൗരവമുളളതാണെന്നും രാജ്യത്തിന്റെ സുരക്ഷയാണ് പ്രധാനമെന്നും രാം മന്ദിര് ട്രസ്റ്റ് ഔദ്യോഗിക പ്രസ്താവനയില് അറിയിച്ചിരുന്നു. ജൂലൈ രണ്ടിന് ഭൂമിപൂജ നടത്താനാണ് നേരത്തെ തീരുമാനിച്ചിരുന്നത്.
https://www.facebook.com/Malayalivartha
