അയോധ്യയില്‍ അടുത്ത മാസം അഞ്ചിനു നടക്കുന്ന ശിലാസ്ഥാപന ചടങ്ങിനു ശേഷം രാമക്ഷേത്രനിര്‍മാണം ആരംഭിക്കും. 1988-ല്‍ തയാറാക്കിയ രൂപരേഖയില്‍ 141 അടിയായിരുന്നു ഉയരം ഉദ്ദേശിച്ചിരുന്നതെങ്കിലും രാമക്ഷേത്രത്തിന് 161 അടി ഉയരമുണ്ടാകുമെന്നും നേരത്തെയുള്ള രൂപരേഖയുടെ അടിസ്ഥാനത്തില്‍ തയാറാക്കിയ എല്ലാ തൂണുകളും കല്ലുകളും ഉപയോഗിക്കുമെന്നും ക്ഷേത്രം മുഖ്യ വാസ്തുശില്‍പി സി. സോംപുരയുടെ മകന്‍ നിഖില്‍ സോംപുര അറിയിച്ചു.

പ്രധാനമന്ത്രി നരേന്ദ്ര മോഡി അടക്കമുള്ളവര്‍ അടുത്ത മാസം അഞ്ചിനു നടക്കുന്ന ശിലാസ്ഥാപന ചടങ്ങില്‍ സംബന്ധിക്കും. 30 വര്‍ഷം മുമ്പാണു ക്ഷേത്രം രൂപകല്‍പന ചെയ്തത്. കാലത്തിനനുസരിച്ചുള്ള മാറ്റമാണുണ്ടായത്. പഴയ മാതൃകയ്ക്കൊപ്പം രണ്ട് മണ്ഡപങ്ങളും ഉള്‍ക്കൊള്ളിച്ചു. മൂന്നര വര്‍ഷം കൊണ്ട് നിര്‍മാണം പൂര്‍ത്തിയാക്കാമെന്നാണ് പ്രതീക്ഷയെന്നും അദ്ദേഹം പറഞ്ഞു.

കോവിഡ് മാനദണ്ഡം പാലിച്ചുകൊണ്ടാകും ചടങ്ങുകള്‍. ഇതു ഭക്തര്‍ക്കു കാണാനായി അയോധ്യയിലുടനീളം കൂറ്റന്‍ സി.സി.ടിവി സ്‌ക്രീനുകള്‍ സ്ഥാപിക്കും. പ്രധാനചടങ്ങിനു മുമ്പായി വൈദിക അനുഷ്ഠാനങ്ങളുണ്ടായിരിക്കും. ഇത് അടുത്തമാസം മൂന്നിനു തുടങ്ങും. 40 കിലോഗ്രാം വെള്ളി ഇഷ്ടിക സ്ഥാപിച്ചു കൊണ്ടാണ് പ്രധാനമന്ത്രി നരേന്ദ്ര മോഡി ശിലാസ്ഥാപനം നിര്‍വഹിക്കുന്നത്.