150 പോലീസുകാരുടെ സംരക്ഷണ വലയത്തിൽ പ്രധാനമന്ത്രി നരേന്ദ്രമോദി അയോധ്യയിൽ.......രാമക്ഷേത്ര ഭൂമി പൂജയ്ക്കായി അയോധ്യയിലെത്തുന്ന പ്രധാനമന്ത്രി നരേന്ദ്രമോദിക്ക് സുരക്ഷാവലയം ഒരുക്കുന്നത് കോവിഡ് മുക്തരായ 150 പോലീസുകാരാണ് . കോവിഡ് മുക്തരായവരുടെ ശരീരത്തിൽ കൊറോണയെ പ്രതിരോധിക്കുന്ന ആന്റിബോഡികള്‍ ഉള്ളതിനാല്‍ ഇവരില്‍ നിന്ന് രോഗം പകരാൻ സാധ്യതയില്ല എന്ന കാര്യം ഇവിടെ ശ്രദ്ധേയമാകുന്നു . ഏതാനും മാസങ്ങളെങ്കിലും കോവിഡ് ഭീഷണിയില്‍ നിന്ന് ഇവര്‍ സുരക്ഷിതരായിരിക്കുമെന്നും വിദഗ്ധർ ചൂണ്ടിക്കാട്ടുകയാണ് . അതാണ് ഇവരെ സുരക്ഷയ്ക്കായി നിയോഗിക്കുന്നതെന്നാണ് റിപ്പോർട്ടുകൾ പുറത്ത് . പ്രധാനമന്ത്രി സന്ദര്‍ശിക്കുമെന്ന് പ്രതീക്ഷിക്കുന്ന എല്ലാ മേഖലകളിലും ഇവരു മുണ്ടാകും . ഭൂമി പൂജയും മറ്റും ചടങ്ങുകള്‍ക്കുമായി അയോധ്യയില്‍ പ്രധാനമന്ത്രി ഏകദേശം മൂന്ന് മണിക്കൂറോളം ചെലവഴിക്കുമെന്നാണ് റിപോർട്ടുകൾ . സുരക്ഷാവലയത്തിലുള്ള ഭൂരിപക്ഷം പോലീസുകാരും ലഖ്‌നൗവില്‍ നിന്നുള്ളവരാണ്.

ഇതിന് പുറമെ 48 മണിക്കൂറിനുള്ളില്‍ കോവിഡ് പരിശോധന നടത്തി ഫലം നെഗറ്റീവായ 400 ഓളം ഉദ്യോഗസ്ഥരും സുരക്ഷാ സന്നാഹത്തിലുണ്ടെന്നും യുപി പോലീസ് അറിയിക്കുകയുണ്ടായി . നിലവിലെ താത്കാലിക രാമക്ഷേത്രത്തിലെ രണ്ടാമത്തെ പൂജാരിക്കും കഴിഞ്ഞ ദിവസം കോവിഡ് സ്ഥിരീകരിച്ചതിന് പിന്നാലെയാണ് ഇത്തരത്തിലൊരു തീരുമാനം എടുത്തിരിക്കുന്നത് . നേരത്തെ ഒരു പൂജാരിക്കും ക്ഷേത്രത്തിന്റെ സുരക്ഷാ ചുമതല ഉണ്ടായിരുന്ന 16 ഓളം പോലീസുകാര്‍ക്കും കോവിഡ് ബാധിച്ചതായി കണ്ടെത്തിയിരുന്നു. അയോധ്യയില്‍ 604 പേര്‍ക്കാണ് ഇതുവരെ കോവിഡ് സ്ഥിരീകരിച്ചിട്ടുള്ളത്. 16 മരണങ്ങളും റിപ്പോര്‍ട്ട് ചെയ്തിട്ടുണ്ട്.