2000ല്‍ ഹൈജാക്ക് ചെയ്യപ്പെട്ട വിമാനത്തിലെ 155 യാത്രക്കാര്‍ക്ക് പകരമായി ഇന്ത്യയില്‍ നിന്നും ജയില്‍ മോചിതനായ മസൂദ് അസ്ഹറിന് പാകിസ്ഥാന്‍ അഭയം നല്‍കുന്നുവെന്ന് ഇന്ത്യ ആരോപിക്കുന്നു. ഭീകര സംഘടനയായ ജയ്ഷ് ഇ മുഹമ്മദ് തലവനാണ് മൗലാന മസൂദ് അസ്ഹര്‍. 

'പുല്‍വാമ ഭീകരാക്രമണത്തിന്റെ ഉത്തരവാദിത്തം നേരത്തെ തന്നെ ജയ്ഷ് ഇ മുഹമ്മദ് ഏറ്റെടുത്തിരുന്നു. സംഘടനയും അതിന് നേതൃത്വം നല്‍കുന്നതും പാകിസ്ഥാനില്‍ നിന്നാണ്. കുറ്റപത്രത്തിലെ ആദ്യത്തെ പ്രതി മസൂദ് അസര്‍ പാകിസ്ഥാനില്‍ അഭയം കണ്ടെത്തുന്നത് ഖേദകരമാണ്.ആവശ്യമായ തെളിവുകള്‍ നല്‍കിയെങ്കിലും പാകിസ്ഥാന്‍ നടപടിയെടുത്തില്ല.' വിദേശകാര്യ മന്ത്രാലയ വക്താവ് പറഞ്ഞു. 2008ലെ മുംബയ് ഭീകരാക്രമണത്തിന് ശേഷം സുപ്രധാന തെളിവുകള്‍ നല്‍കിയിട്ടും പാകിസ്ഥാന്‍ അതില്‍ നടപടിയെടുത്തിട്ടില്ലെന്നും അദ്ദേഹം എടുത്തുപറഞ്ഞു.
2019 ഫെബ്രുവരി 14 നാണ് പൂല്‍വാമയില്‍ സി.ആര്‍.പി.എഫ് ജവാന്‍മാര്‍ക്ക് നേരെ ആക്രമണം നടന്നത്. തുടര്‍ന്ന് ഒന്നരവര്‍ഷത്തെ അന്വേഷണത്തിന് ശേഷമാണ് കുറ്റപത്രം സമര്‍പ്പിച്ചിരിക്കുന്നത്. ഭീകരവാദ പ്രവര്‍ത്തനങ്ങളെയും കുറ്റവാളികളെയും നിയമത്തിന് മുന്നില്‍ എത്തിക്കുന്നതിനായാണ് കുറ്റപത്രം സമര്‍പ്പിച്ചിരിക്കുന്നതെന്നും ഇന്ത്യയുടെ വിദേശകാര്യ മന്ത്രാലയ വക്താവ് പറഞ്ഞു.
ഇന്ത്യയേയും പാകിസ്ഥാനേയും യുദ്ധത്തിന്റെ വക്കിലെത്തിച്ച പൂല്‍വാമ ഭീകരാക്രമണത്തില്‍ 40 ഇന്ത്യന്‍ സൈനികരാണ് മരണപ്പെട്ടിരുന്നത്. ആക്രമണത്തില്‍ പാകിസ്ഥാന്റെ പങ്ക് തെളിയിക്കുന്ന നിര്‍ണായക രേഖകള്‍ കുറ്റപത്രത്തില്‍ സമര്‍പ്പിച്ചതായും അധികൃതര്‍ പറഞ്ഞു.അതേസമയം ഇന്ത്യ സമര്‍പ്പിച്ച കുറ്റപത്രം പാകിസ്ഥാന്‍ നിരസിച്ചു. ആക്രമണത്തില്‍ പാകിസ്ഥാനെ പ്രതിച്ചേര്‍ക്കാനുളള ശ്രമമാണ് ഇന്ത്യ നടത്തുന്നത്. ആക്രമണത്തില്‍ പാകിസ്ഥാന്റെ പങ്കു തെളിയിക്കുന്ന ഒരു രേഖ പോലും നല്‍കാന്‍ ഇന്ത്യയ്ക്ക് സാധിച്ചില്ലെന്നും പാകിസ്ഥാന്‍ വക്തമാവ് പറഞ്ഞു.