ജെഇഇ (മെയിന്‍), നീറ്റ് പരീക്ഷ നടത്താനുള്ള തീരുമാനത്തെ ചൊല്ലി പ്രതിപക്ഷ പാര്‍ട്ടികള്‍ ഭരിക്കുന്ന സംസ്ഥാന സര്‍ക്കാരുകള്‍ കോണ്‍ഗ്രസിന്റെ നേതൃത്വത്തില്‍ കോടതിയെ സമീപിക്കാനിരിക്കെ, കോണ്‍ഗ്രസ് രാഷ്ട്രീയം കളിക്കുകയാണെന്നു ബിജെപി ആരോപിച്ചു. കോടതിയില്‍ പോകാനുള്ള 7 സംസ്ഥാനങ്ങളുടെ തീരുമാനത്തിന് അനുകൂലമായി നിലപാട് എടുത്തിട്ടില്ലെന്നായിരുന്നു മുഖ്യമന്ത്രി പിണറായി വിജയന്റെ പ്രതികരണം.

എന്നാല്‍, പരീക്ഷ നടത്താനുള്ള സാഹചര്യം നിലവില്‍ ഇല്ലെന്നും അക്കാദമിക് വര്‍ഷം നഷ്ടപ്പെടാതെ പ്രവേശന പരീക്ഷകള്‍ പുനഃക്രമീകരീക്കണമെന്നും സിപിഎം പൊളിറ്റ്ബ്യൂറോ ആവശ്യപ്പെട്ടു. ഒഡീഷ സര്‍ക്കാരും പരീക്ഷ മാറ്റിവയ്ക്കണമെന്ന് ആവശ്യപ്പെട്ടു.

കോടതിയെ സമീപിക്കാനുള്ള നീക്കത്തിനൊപ്പം ചേരണമെന്നഭ്യര്‍ഥിച്ചു ഡിഎംകെ അധ്യക്ഷന്‍ എം.കെ.സ്റ്റാലിന്‍, കേരളം, ആന്ധ്ര, തെലങ്കാന, ഒഡീഷ മുഖ്യമന്ത്രിമാര്‍ക്കു കത്തയച്ചു. ഒഡീഷ മാത്രമാണ് പരീക്ഷ മാറ്റിവയ്ക്കണമെന്നു കേന്ദ്രത്തോട് ആവശ്യപ്പെട്ടത്. കോവിഡും സംസ്ഥാനത്തെ പ്രളയസ്ഥിതിയും ചൂണ്ടിക്കാട്ടി മുഖ്യമന്ത്രി നവീന്‍ പട്‌നായിക് പ്രധാനമന്ത്രിയുമായി ഫോണില്‍ സംസാരിക്കുകയും ചെയ്തു.

വിദ്യാര്‍ഥികളുടെ ഒരുവര്‍ഷം നഷ്ടപ്പെടുത്തി രാഷ്ട്രീയം കളിക്കാമെന്നാണു കോണ്‍ഗ്രസ് കരുതുന്നതെന്നും 85% വിദ്യാര്‍ഥികളും അഡ്മിറ്റ് കാര്‍ഡ് ഡൗണ്‍ലോഡ് ചെയ്തു കഴിഞ്ഞതായും ബിജെപി ജനറല്‍ സെക്രട്ടറി ഭൂപേന്ദര്‍ യാദവ് പറഞ്ഞു.കുട്ടികളുടെ ഭാവി തകര്‍ക്കാനുള്ള പ്രതിപക്ഷനീക്കം സര്‍ക്കാര്‍ അനുവദിക്കില്ലെന്നു ബിജെപി പ്രതികരിച്ചു.

ഇനിയും പരീക്ഷ മാറ്റിവയ്ക്കുന്നത് കുട്ടികളുടെ ഭാവിയെ ബാധിക്കുമെന്ന മുന്നറിയിപ്പുമായി ഇന്ത്യയിലെയും വിദേശത്തെയും 150 അക്കാദമിക് വിദഗ്ധര്‍ പ്രധാനമന്ത്രിക്കു കത്തെഴുതി. രാഷ്ട്രീയ അജന്‍ഡയോടെയാണു ചിലര്‍ കുട്ടികളുടെ ഭാവി വച്ചു കളിക്കുന്നതെന്നും ഇവര്‍ ആരോപിച്ചു. പ്രവേശനപരീക്ഷ ഇനിയും വൈകുന്നതു അക്കാദമിക വര്‍ഷം തന്നെ നഷ്ടമാകാന്‍ ഇടയാക്കുമെന്നു വ്യക്തമാക്കി ഐഐടി തലവന്മാരും രംഗത്തെത്തി. ലോകത്തെ തന്നെ മികച്ച പ്രവേശന പരീക്ഷകളാണു ജെഇഇയും നീറ്റും. ഇവയ്ക്കു പകരം വഴി കണ്ടുപിടിക്കുന്നതു ഗുണകരമാകില്ലെന്ന് ഇവര്‍ ചൂണ്ടിക്കാട്ടി.

ബിജെപിക്കൊപ്പം നില്‍ക്കുന്ന എഐഎഡിഎംകെ ഭരിക്കുന്ന തമിഴ്‌നാടും ഡല്‍ഹിയും പരീക്ഷ മാറ്റിവയ്ക്കണമെന്ന നിലപാടിലാണ്. കോണ്‍ഗ്രസ് അധ്യക്ഷ സോണിയ ഗാന്ധി വിളിച്ച യോഗത്തെത്തുടര്‍ന്നു ബംഗാള്‍, മഹാരാഷ്ട്ര, പഞ്ചാബ്, രാജസ്ഥാന്‍, ഛത്തീസ്ഗഡ്, പുതുച്ചേരി, ജാര്‍ഖണ്ഡ് സര്‍ക്കാരുകള്‍ സുപ്രീം കോടതിയെ സമീപിക്കും. പരീക്ഷ റദ്ദാക്കാനുള്ള ഹര്‍ജി തള്ളിയ സുപ്രീം കോടതി വിധിക്കെതിരെ പുനഃപരിശോധനാ ഹര്‍ജി സമര്‍പ്പിക്കാനാണ് നീക്കം.