പഞ്ചാബിലെ മോഗയില്‍ ഓടുന്ന ബസ്സില്‍ പീഡനശ്രമത്തിനിടെ പെണ്‍കുട്ടി കൊല്ലപ്പെട്ടത് ദൈവനിശ്ചയ പ്രകാരമാണെന്ന് പഞ്ചാബ് വിദ്യാഭ്യാസ മന്ത്രി സുര്‍ജിത്ത് സിംഗ് രാഗ്രരയുടെ പ്രസ്താവന വിവാദത്തില്‍. വെളളിയാഴ്ച ഒരു പൊതുപരിപാടിക്കിടെയാണ് വിദ്യാഭ്യാസ മന്ത്രി വിവാദ പ്രസ്താവന നടത്തിയത്. സംസ്ഥാനം ഭരിക്കുന്ന അകാലിദള്‍ എംഎല്‍എ സംഭവത്തെ അപകടം എന്ന് വിശേഷിപ്പിച്ചതിന് തൊട്ടുപിന്നാലെയാണ് മന്ത്രി വിവാദ പ്രസ്താവനയുമായി രംഗത്ത് വന്നത്.
\'ദൈവനിശ്ചയത്തിനെതിരെ നിലകൊളളാന്‍ ആര്‍ക്കും ആകില്ല, കാറിനും വിമാനത്തിനും വരെ അപകടം സംഭവിക്കുന്നു, എല്ലാം ദൈവഹിതപ്രകാരമാണ്\' പഞ്ചാബ് വിദ്യാഭ്യാസ മന്ത്രി പറഞ്ഞു.പഞ്ചാബിലെ മോഗയില്‍ പീഡനശ്രമം ചെറുത്ത 14 വയസുകാരിയെ ബസില്‍ നിന്നും എറിഞ്ഞു കൊലപ്പെടുത്തുകയായിരുന്നു. പെണ്‍കുട്ടിയുടെ അമ്മയ്ക്കും സംഭവത്തില്‍ ഗുരുതരമായി പരിക്കേറ്റിരുന്നു. പഞ്ചാബ് മുഖ്യമന്ത്രി പ്രകാശ് സിംഗ് ബാദലിന്റെ മകനും ഉപമുഖ്യമന്ത്രിയുമായ സുഖബിര്‍ സിംഗ് ബാദലിന്റെ ഉടമസ്ഥതയിലുള്ള ഓര്‍ബിറ്റ് ഏവിയേഷന്റെ ബസ്സില്‍ വെച്ചാണ് സംഭവമുണ്ടായത്.
ബസ്സിലെ കണ്ടക്ടര്‍ ഉള്‍പ്പെടെ ആറ് പേര്‍ ചേര്‍ന്ന് പെണ്‍കുട്ടിയേയും അമ്മയേയും പീഡിപ്പിക്കാന്‍ ശ്രമിക്കുയായിരുന്നു. ബസ്സില്‍ നിരവധി യാത്രക്കാര്‍ ഉണ്ടായിരുന്നുവെങ്കിലും കണ്ടക്ടര്‍ ഉള്‍പ്പെടെയുള്ളവരുടെ അതിക്രമത്തെ എതിര്‍ക്കാന്‍ ആരും തയ്യാറായില്ല. സംഭവവുമായി ബന്ധപ്പെട്ട് പഞ്ചാബ് പൊലീസ് നാല് പേരെ അറസ്റ്റ് ചെയ്തിട്ടുണ്ട്.അതെസമയം ബസ്സിന്റെ പെര്‍മിറ്റ് റദ്ദ് ചെയ്യുന്നതുവരെ മകളുടെ മൃതദേഹം സംസ്‌കരിക്കില്ലെന്ന നിലപാടുമായി പെണ്‍കുട്ടിയുടെ പിതാവും ബന്ധുക്കളും രംഗത്ത് വന്നു. സര്‍ക്കാര്‍ പ്രഖ്യാപിച്ച 20 ലക്ഷം ധനസഹായവും ജോലിയും സ്വീകരിക്കില്ലെന്നും പിതാവ് അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha