ലക്ഷദ്വീപ് വനംവകുപ്പ്, വിദേശത്തേക്ക് കടത്താനിരുന്ന 20 ലക്ഷം രൂപ വിലവരുന്ന 22 കടല്‍വെള്ളരികള്‍ (സീ കുക്കുമ്പര്‍) പിടിച്ചെടുത്തു. അഗത്തി റേഞ്ച് ഓഫിസറുടെ ചുമതല വഹിക്കുന്ന മുഹമ്മദ് സിനാന്‍ യാഫുസിന്റെ നേതൃത്വത്തില്‍ നടന്ന പരിശോധനയിലാണ് ഒഴിഞ്ഞു കിടന്ന കെട്ടിടത്തില്‍ വലിയ കടല്‍വെള്ളരികള്‍ കണ്ടെത്തിയത്. വന്യജീവി സംരക്ഷണ നിയമ പ്രകാരം സംരക്ഷിക്കപ്പെടുന്ന കടല്‍ ജീവിയായ കടല്‍വെള്ളരിയെ പിടിക്കുന്നതും കൈവശം വയ്ക്കുന്നതും കുറ്റകരമാണ്. കേടു കൂടാതിരിക്കാനുള്ള ലായനികള്‍ ചേര്‍ത്ത് ഉണക്കിയ നിലയിലായിരുന്നു.

വനം ഗാര്‍ഡുമാരായ പി.എസ്. മുഹമ്മദ് ഫാറൂഖ്, പി.കെ.പി. മുഹമ്മദ് അക്‌റാവൂഫ്, ടി.പി. ബീഗം ഗസീറ, ഫ്‌ലൈയിങ് സ്‌ക്വാഡ് ഉദ്യോഗസ്ഥന്‍ അഫ്‌സുഅല്‍ റഹ്മാന്‍ എന്നിവരടങ്ങിയ സംഘമാണു കടല്‍വെള്ളരികള്‍ പിടിച്ചെടുത്തത്. വനം റേഞ്ച് ഓഫിസര്‍ സയിദ് ഷെയ്ഖ് കോയ തുടര്‍ അന്വേഷണം നടത്തും.

കൊച്ചിയിലെത്തിച്ച ശേഷം ചൈനയിലേക്കോ ദക്ഷിണേഷ്യന്‍ രാജ്യങ്ങളിലേക്കോ കടത്താനുദ്ദേശിച്ചുള്ളവയാകാമെന്ന് വനംവകുപ്പ് അറിയിച്ചു. ഇക്കൊല്ലം ലക്ഷദ്വീപില്‍ ഏഴാം തവണയാണ് കടല്‍വെള്ളരി പിടികൂടുന്നത്. ശ്രീലങ്കയിലേക്കു കടത്താനിരുന്ന 4.26 കോടി രൂപ വിലയുള്ള 852 കിലോഗ്രാം കടല്‍വെള്ളരികള്‍ ഫെബ്രുവരിയില്‍ പിടികൂടിയിരുന്നു.