ഹൈദരാബാദ് ഇനിയും ഹൈദരാബാദായി തന്നെ തുടരും. വോട്ടെടുപ്പലിന്റെ ആദ്യഘട്ടത്തില്‍ മുന്നേറിയ ബി.ജെ.പി വോട്ടെടുപ്പ് അവസാനിക്കുമ്പോള്‍ മൂന്നാം സ്ഥാനത്തേക്ക് പിന്‍തള്ളപ്പെട്ടു. ഇതോടെ ബി.ജെ.പി ഹൈദരാബാദ് കോര്‍പ്പറേഷനില്‍ അധികാരം പിടിക്കില്ലെന്ന് ഏറെക്കുറെ ഉറപ്പായിട്ടുണ്ട്. ഈ സാഹചര്യത്തില്‍ ഹൈദരാബാദിന്റെ പേര് ഭാഗ്യനഗറാകാന്‍ സാധ്യതയില്ല. വോട്ടെണ്ണല്‍ പുരോഗമിക്കുമ്പോള്‍ തെലങ്കാനയിലെ ഭരണകക്ഷിയായ ടിആര്‍എസിന് തന്നെയാണ് മുന്‍തൂക്കം. അസദുദ്ദീന്‍ ഒവൈസിയുടെ എ ഐ എം ഐ എം രണ്ടാംസ്ഥാനത്തുണ്ട്. വന്‍ താരനിരയെ അണിനിരത്തി പ്രചാരണം നടത്തിയ ബി ജെ പിയ്ക്ക് വോട്ടെണ്ണലിന്റെ രണ്ടാം റൗണ്ടില്‍ അടിതെറ്റുന്ന കാഴ്ചയാണ് കാണാന്‍ കഴിയുന്നത്.

ഒടുവുവില്‍ വിവരം ലഭിക്കുമ്പോള്‍ ടി ആര്‍ എസ് 71 സീറ്റിലും എ ഐ എം ഐ എം 43 സീറ്റിലും ബി ജെ പി 33 സീറ്റിലും കോണ്‍ഗ്രസ് രണ്ട് സീറ്റിലുമാണ് ലീഡ് ചെയ്യുന്നത്. അഞ്ച് സീറ്റുകളില്‍ ബി ജെ പിയുടേയും എട്ട് സീറ്റുകളില്‍ ടി ആര്‍ എസിന്റേയും വിജയം ഔദ്യോഗികമായി പ്രഖ്യാപിച്ചു. പോസ്റ്റല്‍ ബാലറ്റ് എണ്ണിയപ്പോള്‍ ബി ജെ പിക്കായിരുന്നു മുന്‍തൂക്കം. എന്നാല്‍ പേപ്പര്‍ ബാലറ്റ് എണ്ണി തുടങ്ങിയതോടെ ബി ജെ പി പിന്നാക്കം പോവുകയായിരുന്നു. പേപ്പര്‍ ബാലറ്റ് ആയതിനാല്‍ ഫലം രാത്രിയോടെ മാത്രമേ അറിയാനാകൂ.

സംസ്ഥാന രൂപീകരണം മുതല്‍ തുടരുന്ന ടി ആര്‍ എസ് മേധാവിത്വം നിലനിര്‍ത്തുമെന്നാണ് പ്രതീക്ഷിക്കുന്നത്.പ്രചാരണരംഗത്ത് ബി ജെ പി കേന്ദ്രനേതൃത്വത്തിന്റെ സാന്നിദ്ധ്യം കൊണ്ട് തിരഞ്ഞെടുപ്പ് ദേശീയ ശ്രദ്ധയാകര്‍ഷിച്ചിരുന്നു. നിയമസഭ തിരഞ്ഞെടുപ്പ് ലക്ഷ്യമിട്ട് തെലങ്കാനയില്‍ വേരുറപ്പിക്കാനുളള ശ്രമഫലമായാണ് ബി ജെ പി ദേശീയ അദ്ധ്യക്ഷന്‍ ജെ പി നഡ്ഢ, കേന്ദ്ര ആഭ്യന്തരമന്ത്രി അമിത് ഷാ, ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് എന്നിവര്‍ ഈ തദ്ദേശ തിരഞ്ഞെടുപ്പില്‍ സജീവമായത്.ആകെയുളള 150 വാര്‍ഡുകളില്‍ നൂറിലും ടി ആര്‍ എസും ബി ജെ പിയും തമ്മില്‍ നേരിട്ടുളള പോരാട്ടമാണ്.

ഫലം നിര്‍ണയിക്കാന്‍ കഴിയുമെന്ന് കരുതുന്ന അസദുദ്ദീന്‍ ഒവൈസിയുടെ എ ഐ എം ഐ എം 51 സീറ്റുകളിലാണ് മത്സരിച്ചത്. കൊവിഡ് മാനദണ്ഡങ്ങള്‍ പാലിച്ചാണ് വോട്ടെണ്ണല്‍ പുരോഗമിക്കുന്നത്. മൂന്നു പാര്‍ട്ടികളും ശക്തമായ പ്രചാരണം നടത്തിയ ഇവിടെ 46.55 ശതമാനം പോളിംഗാണ് രേഖപ്പെടുത്തിയത്. മൊത്തം 74.67 ലക്ഷം വോട്ടര്‍മാരില്‍ നിന്ന് 34.50 ലക്ഷം പേരാണ് വോട്ട് ചെയ്തത്.