മയക്കു വെടിവച്ചു പിടികൂടാന്‍ ശ്രമിച്ച് പരാജപ്പെട്ടു... മഹാരാഷ്ട്രയില്‍ എട്ട് പേരെ കൊന്ന പുള്ളിപ്പുലിയെ വനംവകുപ്പ് വെടിവച്ചു കൊന്നു. വെള്ളിയാഴ്ച വൈകുന്നേരം സോളാപൂര്‍ ജില്ലയിലായിരുന്നു സംഭവം നടന്നത്. കര്‍മല തഹ്സിലിലെ ബിത്താര്‍ഗാവ് ഗ്രാമത്തിനടുത്തുള്ള വാഴത്തോപ്പില്‍ കണ്ടെത്തിയ പുലിയെ വനവകുപ്പ് ചുമതലപ്പെടുത്തിയ ഷൂട്ടര്‍ വെടിവച്ചു കൊന്നു.

സോളാപൂര്‍, ബീഡ്, അഹമ്മദ്നഗര്‍, ഔറംഗബാദ് ജില്ലകളിലായി പുള്ളിപ്പുലി എട്ട് പേരെയാണ് കൊന്നത്. നാല് പേര്‍ക്ക് പരിക്കേല്‍ക്കുകയും ചെയ്തു.വെള്ളിയാഴ്ച വൈകുന്നേരം ബിത്താര്‍ഗാവിലെ വാഴത്തോപ്പില്‍ പുലിയെ കണ്ടെത്തിയതോടെ ആദ്യം മയക്കുവെടിവച്ചു പിടികൂടാന്‍ ശ്രമിച്ചു. എന്നാല്‍ ഈ ശ്രമം പരാജയപ്പെട്ടതോടെ വെടിവച്ചു കൊല്ലുകയായിരുന്നു- വനംവകുപ്പ് ഉദ്യോഗസ്ഥന്‍ ധൈര്യാഷില്‍ പാട്ടീല്‍ പറഞ്ഞു. മനുഷ്യരെ കൊന്നുതിന്നുന്ന പുള്ളിപ്പുലിയെ കൊല്ലാനുള്ള നിര്‍ദേശം ഈ മാസം ആദ്യം പുറപ്പെടുവിച്ചിരുന്നു.