ഉത്തരാഖണ്ഡില്‍ കനത്ത മഴ. ഇതുകാരണം രക്ഷാ പ്രവര്‍ത്തനങ്ങള്‍ വീണ്ടും തടസ്സപ്പെട്ടിരിക്കുകയാണ്‌. പിത്തോറഘട്ടില്‍ മാത്രം 600ഓളം പേര്‍ കുടുങ്ങി കിടക്കുന്നതായാണ്‌ റിപ്പോര്‍ട്ട്‌. ദേശീയ ദുരന്തനിവാരണ സേനയിലെ 40 അംഗങ്ങള്‍ പിത്തോറഘട്ടില്‍ എത്തിയെങ്കിലും മോശം കാലാവസ്ഥാ രക്ഷാപ്രവര്‍ത്തനത്തിനു തടസമായിരിക്കുകയാണ്‌. 16 ഗ്രാമങ്ങള്‍ ഉള്‍പ്പെടുന്ന പിത്തോറഘട്ടിലെ എല്ലാ വീടുകള്‍ എല്ലാംതന്നെ പ്രളയത്തില്‍ നശിച്ചിരുന്നു.

കഴിഞ്ഞദിവസം ഉത്തരാഖണ്‌ഡ്‌ സര്‍ക്കാര്‍ രക്ഷാപ്രവര്‍ത്തനങ്ങള്‍ പൂര്‍ത്തിയായതായി സുപ്രീംകോടതിയില്‍ അറിയിച്ചതിനു പിന്നാലെയാണ്‌ പിത്തോറഘട്ടില്‍ 600ഓളം പേര്‍ കുടുങ്ങികിടക്കുന്നതായുള്ള റിപ്പോര്‍ട്ടുകള്‍ പുറത്തുവന്നത്‌. നൂറുകണക്കിനാളുകള്‍ കുടുങ്ങികിടന്നിരുന്ന ബദരീനാഥിലെ രക്ഷാപ്രവര്‍ത്തനങ്ങള്‍ വ്യോമസേനയുടെ നേതൃത്വത്തില്‍ കഴിഞ്ഞദിവസം പൂര്‍ത്തിയാക്കിയിരുന്നു.

അതേസമയം ബുധനാഴ്‌ച വൈകിട്ട്‌ മുതല്‍ പിത്തോറഘട്ട്‌, നൈനിറ്റാള്‍, ചമ്പാവത്‌ ഉള്‍പ്പടെ ഉത്തരാഖണ്‌ഡിന്റെ വിവിധ മേഖലകളില്‍ വീണ്ടും ആരംഭിച്ചിരിക്കുന്ന കനത്ത മഴ രക്ഷാപ്രവര്‍ത്തനങ്ങളെ സാരമായി ബാധിച്ചിരിക്കുകയാണ്‌. രണ്ടു മുതല്‍ മൂന്നു ദിവസം വരെ മഴ നീണ്ടു നിന്നേക്കാമെന്നാണ്‌ കാലാവസ്ഥാ നീരീക്ഷണ വിഭാഗത്തിന്റെ റിപ്പോര്‍ട്ട്‌. പ്രളയവും മണ്ണിടിച്ചിലും ഉണ്ടാകാന്‍ സാധ്യത ഉണ്ടെന്നും റിപ്പോര്‍ട്ടില്‍ ചൂണ്ടിക്കാണിക്കുന്നു. മഴകുറയുന്നതോടെ രക്ഷാപ്രവര്‍ത്തനങ്ങള്‍ പുനരാരംഭിക്കാന്‍ കഴിയുമെന്ന പ്രതീക്ഷയിലാണ്‌ ദേശീയ ദുരന്തനിവാരണ സേന.