സുനന്ദ പുഷ്‌കറിന്റേത് സ്വാഭാവിക മരണമാണെന്ന് വരുത്താന്‍ ഡോക്ടര്‍മാരുടെ മേല്‍ സമ്മര്‍ദം ചെലുത്തിയിരുന്നുവെന്നു വെളിപ്പെടുത്തല്‍. ഡല്‍ഹി ഓള്‍ ഇന്ത്യ ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സിലെ ഡോക്ടര്‍ ആദര്‍ശ് ഗുപ്തയാണ് വിവാദ വെളിപ്പെടുത്തല്‍ രംഗത്ത് എത്തിയത്. കെട്ടിച്ചമച്ച പോസ്റ്റ്‌മോര്‍ട്ടം റിപ്പോര്‍ട്ട് സൃഷ്ടിക്കുന്നതിന് ശശി തരൂരും ഡോ.മിശ്രയും തമ്മില്‍ ഇമെയില്‍ സന്ദേശങ്ങള്‍ നടത്തിയതിനു തെളിവുണ്ടെന്നും അദ്ദേഹം പറഞ്ഞു.
കേന്ദ്ര ആരോഗ്യമന്ത്രി ജെ പി നഡ്ഡയ്ക്ക് അയച്ച കത്തിലാണ് പോസ്റ്റ്‌മോര്‍ട്ടം റിപ്പോര്‍ട്ട് തിരുത്താന്‍ സമ്മര്‍ദ്ദമുണ്ടായിരുന്നുവെന്ന ആദര്‍ശ് കുമാറിന്റെ വെളിപ്പെടുത്തല്‍ . എന്നാല്‍ സമ്മര്‍ദ്ദത്തിന് തങ്ങള്‍ അടിപ്പെട്ടില്ലെന്നും അദ്ദേഹം പറഞ്ഞു. 2014 ജനുവരി 17നാണ് ഹോട്ടല്‍ ലീലാ പാലസിലെ 345ാം മുറിയില്‍ സുനന്ദയെ മരിച്ച നിലയില്‍ കണ്ടെത്തിയത്. ഒരു വര്‍ഷം പിന്നിട്ടപ്പോഴാണ് മരണം കൊലപാതകമാണെന്ന് പൊലീസ് സ്ഥിരീകരിച്ചത്. വിഷം ഉള്ളില്‍ച്ചെന്നതാണ് 49കാരിയായ സുനന്ദയുടെ മരണകാരണമെന്ന് എയിംസ് മെഡിക്കല്‍ ബോര്‍ഡ് വ്യക്തമാക്കിയ സാഹചര്യത്തിലാണ് ഡല്‍ഹി പൊലീസ് കൊലപാതകത്തിന് കേസ് രജിസ്റ്റര്‍ ചെയ്തത്.
താനുള്‍പ്പെടെയുള്ള ഡോക്ടര്‍മാര്‍ക്ക് മേല്‍ ഇക്കാര്യത്തില്‍ സമ്മര്‍ദ്ദമുണ്ടായിരുന്നു. ഫോറന്‍സിക് ഡിപ്പാര്‍ട്ടമെന്റ് തലവനായ ഡോ. സുധീര്‍ കെ ഗുപ്തയുടെ നേതൃത്വത്തില്‍ ആദര്‍ശ് കുമാറും ഡോ. ശശാങ്ക് പൂനിയയുമാണ് സുനന്ദയുടെ പോസ്റ്റ്‌മോര്‍ട്ടം നടത്തിയത്. വിഷാംശം ഉള്ളില്‍ച്ചെന്നാണ് സുനന്ദ മരിച്ചതെന്നായിരുന്നു പോസ്റ്റ്‌മോര്‍ട്ടം റിപ്പോര്‍ട്ട്.
എയിംസ് ഡയറക്ടര്‍ ഡോ. എംസി മിശ്ര സുനന്ദയുടെ പോസ്റ്റ്‌മോര്‍ട്ടത്തിന് ശേഷം തങ്ങളുമായി സഹകരിക്കുന്നില്ലെന്നും അതിനാല്‍, കഴിഞ്ഞ ഒരു വര്‍ഷമായി എയിംസ് ഫോറന്‍സിക് ഡിപ്പാര്‍ട്ട്‌മെന്റിന്റെ പ്രവര്‍ത്തനം താറുമാറായി കിടക്കുകയാണെന്നും മന്ത്രിക്കയച്ച കത്തില്‍ ആദര്‍ശ് കുമാര്‍ ആരോപിക്കുന്നുണ്ട്. ആദര്‍ശ് കുമാറിന്റെ ആരോപണം ഡോ സുധീര്‍ ഗുപ്തയും ആവര്‍ത്തിച്ചു. താനുമായും ഡിപ്പാര്‍ട്ട്‌മെന്റിലെ മറ്റ് ഡോക്ടര്‍മാരുമായും എം സി മിശ്ര സഹകരിക്കുന്നില്ലെന്നും സുധീര്‍ ഗുപ്ത ആരോപിച്ചിരുന്നു.
ഇക്കാര്യങ്ങള്‍ ചൂണ്ടിക്കാണിച്ച് മെയ് 28ന് സുധീര്‍ ഗുപ്തയും ആരോഗ്യ മന്ത്രിക്ക് കത്തയച്ചിരുന്നു. സുനന്ദയുടെ മരണം അസ്വാഭാവികമായിരുന്നുവെന്ന റിപ്പോര്‍ട്ട് തിരുത്താന്‍ എയിംസ് ഡയറക്ടര്‍ ആവശ്യപ്പെട്ടുവെന്നായിരുന്നു സുധീര്‍ ഗുപ്തയുടെ ആരോപണം. സുനന്ദയുടെത് സ്വാഭാവിക മരണമെന്ന് റിപ്പോര്‍ട്ട് നല്‍കാന്‍ ഡോ.മിശ്ര സമ്മര്‍ദ്ദം ചെലുത്തി. അത് തങ്ങളുടെ കണ്ടെത്തലിന് വിരുദ്ധമായിരുന്നു. കെട്ടിച്ചമച്ച പോസ്റ്റ്‌മോര്‍ട്ടം റിപ്പോര്‍ട്ട് സൃഷ്ടിക്കുന്നതിന് ശശി തരൂരും ഡോ.മിശ്രയും തമ്മില്‍ ഇമെയില്‍ സന്ദേശങ്ങള്‍ കൈമാറിയതിനും തെളിവുണ്ട്. എന്നാല്‍ സമ്മര്‍ദ്ദത്തിന് അടിമപ്പെടാതെയാണ് പോസ്റ്റ്‌മോര്‍ട്ടം റിപ്പോര്‍ട്ട് തയ്യാറാക്കിയതെന്നും കത്തില്‍ സുധീര്‍ ഗുപ്ത പറഞ്ഞു.
സുനന്ദയുടെ പോസ്റ്റ്‌മോര്‍ട്ടം റിപ്പോര്‍ട്ട് തിരുത്താന്‍ വിസമ്മതിച്ചതിലുള്ള പ്രതികാര നടപടിയായി എയിംസ് ഫോറന്‍സിക് ഡിപ്പാര്‍ട്ട്‌മെന്റ് സ്ഥാനത്ത് നിന്നും തന്നെ നീക്കാനുള്ള തീരുമാനമുണ്ടായെന്നും സുധീര്‍ ഗുപ്ത ആരോപിച്ചിരുന്നു. ഇക്കാര്യത്തില്‍ കേന്ദ്ര അഡ്മിനിസ്‌ട്രേറ്റീവ് ട്രിബ്യൂണലിനെ സമീപിക്കുകയും ചെയ്തു. എന്നാല്‍ കേന്ദ്ര അഡ്മിനിസ്‌ട്രേറ്റീവ് ട്രിബ്യൂണല്‍ പരാതി തള്ളി. ഇതിനെ തുടര്‍ന്ന് സുധീര്‍ ഗുപ്ത ഡല്‍ഹി ഹൈക്കോടതിയെ സമീപിച്ചു. സുധീര്‍ ഗുപ്തയുടെ അനുവാദം കൂടാതെ അദ്ദേഹത്തെ തല്‍സ്ഥാനത്ത് നീക്കം ചെയ്യാനാകില്ലെന്നായിരുന്നു കോടതി ഉത്തരവ്. ഫോറന്‍സിക് ഡിപ്പാര്‍ട്ട്‌മെന്റിന്റെ തലപ്പത്ത് നിന്നും സുധീര്‍ ഗുപ്തയെ നീക്കണമെന്ന് ആവശ്യപ്പെട്ട് എയിംസ് ഡയറക്ടര്‍ ഡോ എംസി മിശ്ര ഡല്‍ഹി ഹൈക്കോടതിയില്‍ സത്യവാങ്മൂലം സമര്‍പ്പിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha