റിപ്പബ്ലിക് ദിനത്തിൽ ചെങ്കോട്ടയിൽ നടന്ന സംഘർഷത്തിൽ പ്രതിയായ പഞ്ചാബി നടനും ഗായകനുമായ ദീപ് സിദ്ധു അറസ്റ്റിൽ . ഇതോടെ പല നിർണായക വിവരങ്ങളും പുറത്തു വന്നിരിക്കുകയാണ് ... ഡൽഹി പോലീസ് സ്പെഷ്യല്‍ സെൽ ഇന്ന് പുലർച്ചെയാണ് ദീപ് സിദ്ദുവിനെ അറസ്റ്റ് ചെയ്തത്. ഇയാളുടെ ഇടപെടൽ എന്തിനു വേണ്ടിയാണ് എന്നതിനെ പറ്റിയുള്ള ചോദ്യം ചെയ്യലായിരിക്കും ഇനി നടക്കുന്നത്
.
ചെങ്കോട്ടയെ രാവണൻ കോട്ടയാക്കി ഇന്ത്യയുടെ ജനാധിപത്യ സംവിധാനത്തെയും ഭരണഘടനയേയും തകർക്കാൻ ശ്രമിച്ചവർ ഇനി ഒന്നിന് പിറകെ ഒന്നായി കുടുങ്ങും എന്നത് ഉറപ്പായിരിക്കുകയാണ് .റിപ്പബ്ലിക് ദിനത്തിൽ ത്രിവർണ്ണ പതാകയെ അവഹേളിക്കുന്ന തരത്തിൽ ഇന്ത്യൻ ജനാധിപത്യത്തിലെ കറുത്ത ഏട് എന്ന് തന്നെ വിശേഷിപ്പിക്കാവുന്ന അവസ്ഥ തന്നെയാണ് ഉണ്ടായത് .

ബി ജെ പിയുമായി അടുത്ത ബന്ധമുണ്ട് എന്ന വിശേഷണമാണ് ഏതാനും ചില മാധ്യമങ്ങൾ ദീപ് സിദ്ദുവിനെ പറ്റി പറഞ്ഞത് .പഞ്ചാബിലെ ഗുരുദാസ്‌പൂരിൽ നിന്നുമുള്ള ലോക് സഭ അംഗമായ സണ്ണി ഡിയോളിനു വേണ്ടി തിരഞ്ഞെടുപ്പ് പ്രചാരണം നടത്തി എന്നതാണ് സിദ്ദുവിന്റെ രാഷ്ട്രീയ ബന്ധത്തെ സംബന്ധിച്ച ആരോപണം ഉയരാൻ കാരണമായത് .എന്നാൽ റിപ്പബ്ലിക് ദിനത്തിന് ശേഷം ഒളിവിലായിരുന്നു ഇയാൾ എന്നാണ് വാർത്തകൾ പുറത്തു വന്നത്

ചെങ്കോട്ടയിൽ നടന്ന സംഘർഷങ്ങൾക്ക് ശേഷം ഇയാൾ ഒളിവിലായിരുന്നതിനാൽ പോലീസ് വ്യാപകമായ അന്വേഷണമാണ് നടത്തിയത് . ദീപ് സിദ്ദുവിനെ കുറിച്ച് വിവരം നൽകുന്നവർക്ക് ഒരു ലക്ഷം രൂപ ഡൽഹി പോലീസ് പാരിതോഷികം പ്രഖ്യാപിച്ചിരുന്നു. ചണ്ഡീഗഢിനും, അംബാലയ്ക്കുമിടയിലുള്ള സിറക്പൂർ പ്രദേശത്ത് നിന്നാണ് സിദ്ദു അറസ്റ്റിലായതെന്നാണ് സൂചന.

ഇതോടെ ചെങ്കോട്ട സംഘർഷവുമായി ബന്ധപ്പെട്ട് അറസ്റ്റിലായവരുടെ എണ്ണം 128 ആയി.ഇടനിലക്കാരുടെ ഇടപെടൽ വ്യക്തമാകുന്ന തരത്തിൽ ദീപിന്റെ അറസ്റ്റ് കൂടുതൽ സത്യങ്ങൾ പുറത്തു കൊണ്ട് വരികയാണ് .കർഷക സമരത്തിൽ നുഴഞ്ഞുകയറാൻ ഇയാൾ കുറേക്കാലമായി ശ്രമിക്കുകയാണ് എന്ന ഞെട്ടിക്കുന്ന വാർത്തയും ഇതിനു പിന്നാലെ പുറത്തു വന്നിരുന്നു .

റിപ്പബ്ലിക് ദിനത്തിൽ കർഷകരുടെ പ്രതിഷേധ ട്രാക്ടർ റാലിക്കിടെയാണ് സിദ്ദുവിന്റെ നേതൃത്വത്തിൽ ഒരു സംഘം ചെങ്കോട്ടയിൽ കടന്ന് സിഖ് പതാക ഉയർത്തിയത്. ചെങ്കോട്ടയില്‍ അതിക്രമിച്ചു കയറിയ പ്രതിഷേധക്കാര്‍ വന്‍നാശനഷ്ടം വരുത്തിയിരുന്നു