പുതിയ അമേരിക്കൻ പ്രസിഡന്റ് സ്ഥാനത്തേക്ക് ജോ ബൈഡൻ വന്നതോടെ നിരവധി ആശങ്കകൾ ഉയർന്നിരുന്നു. എന്നാൽ അത്തരത്തിലുള്ള ആശങ്കകളെല്ലാം കാറ്റിൽ പറത്തിയാണ് ഓരോ നിമിഷവും അദ്ദേഹം ഇന്ത്യയോട് സമീപിക്കുന്നത്. ഇപ്പോഴിതാ ഇന്ത്യയുമായി അമേരിക്കക്ക്‌ യാതൊരു തരത്തിലുമുള്ള വിള്ളലുകളും സംഭവിക്കില്ലെന്ന് പറഞ്ഞ് സ്റ്റേറ്റ് ഡിപ്പാർട്ട്മെന്റ് വക്താവ് രംഗത്തുവന്നിരിക്കുകയാണ്. മാത്രമല്ല ഇന്ത്യ ചൈന അതിർത്തി വിഷയത്തിലും നിലപാട് വ്യക്തമാക്കിയിരിക്കുകയാണ്. തീർച്ചയായും ഇന്ത്യയ്ക്ക് ശുഭകരമായ സൂചനയാണ് അവരുടെ പ്രതികരണത്തിൽ നിന്നും ലഭിക്കുന്നത്.ജോ ബൈഡന് കീഴിലും അമേരിക്ക വിദേശനയങ്ങളിൽ വലിയ മാറ്റങ്ങൾ വരുത്തില്ലെന്ന ഉറപ്പ് കൈ മാറിയിരിക്കുകയാണ് സ്റ്റേറ്റ് ഡിപ്പാർട്ട്‌മെന്റ് വക്താവ് നെഡ് പ്രൈസിന്റെ പത്രസമ്മേളനം. തങ്ങളുടെ സുഹൃദ് രാജ്യങ്ങളുടേയും പങ്കാളികളുടേയും താത്പര്യങ്ങൾ സംരക്ഷിക്കുമെന്നും അദ്ദേഹം സൂചന നൽകിയിരിക്കുകയുമാണ് . ഇന്ത്യ ചൈന അതിർത്തി സംഘർഷത്തെ കുറിച്ചുള്ള ചോദ്യങ്ങൾക്ക് അമേരിക്കയുടെ നിലപാടിനെ കുറിച്ചുള്ള വ്യക്തമായ മറുപടിയാണ് നെഡ് പൈസ് ഇപ്പോൾ നൽകിയിരിക്കുന്നത്.

അയൽരാജ്യങ്ങളെ ഭീഷണിപ്പെടുത്തുന്ന ചൈനയുടെ നയത്തെ അദ്ദേഹം വിമർശിക്കുകയും ചെയ്തിരുന്നു . ലഡാക്കിൽ മാസങ്ങളായി തുടരുന്ന ഇന്ത്യ ചൈന അതിർത്തി പ്രശ്നത്തെ കുറിച്ചുള്ള ചോദ്യത്തിന് 'ഞങ്ങൾ സ്ഥിതിഗതികൾ സൂക്ഷ്മമായി നിരീക്ഷിച്ചു കൊണ്ടിരിക്കുകയാണെന്നും അദേഹം പറഞ്ഞു . ഇന്ത്യയിലെയും ചൈനയിലെയും സർക്കാരുകൾ തമ്മിലുള്ള ചർച്ചകൾ ശ്രദ്ധിക്കുന്നുണ്ട്, നേരിട്ടുള്ള സംഭാഷണത്തിനും അതിർത്തി തർക്കങ്ങൾ സമാധാനപരമായി പരിഹരിക്കുന്നതിനും പിന്തുണ നൽകുമെന്നും അദ്ദേഹം പ്രതികരിക്കുകയുണ്ടായി .കൊവിഡ് മഹാമാരി ലോകം മുഴുവൻ പടരുന്ന വേളയിലാണ് ചൈന ഇന്ത്യൻ മണ്ണിലേക്ക് കടക്കാൻ ശ്രമിച്ചത്. ഇതിനെ ഇന്ത്യൻ സൈന്യം ശക്തമായ രീതിയിൽ എതിർക്കുകയായിരുന്നു. കഴിഞ്ഞ മേയ് മാസം മുതൽ ലഡാക്കിൽ ഇത്തരത്തിൽ ഇരുരാജ്യവും യുദ്ധസമാനമായ സൈനിക നീക്കങ്ങളാണ് നടത്തിയത്. എന്നാൽ പിന്നീട് ഇരു രാജ്യങ്ങളുടേയും സർക്കാരുകൾ ഇടപെട്ട് നിരവധി തവണ സമാധാന ചർച്ചകൾ നടത്തിയിരുന്നു.