നീണ്ട സംഘര്ഷത്തിനൊടുവില് ലഡാക്കിനോട് ചേര്ന്ന അതിര്ത്തിയില് ഇന്ത്യ- ചൈന സേനാ പിന്മാറ്റം... പരമ്പരാഗത മേഖലകളില് ഇരു രാജ്യങ്ങളും പട്രോളിങ് അടക്കം എല്ലാ സൈനിക പ്രവര്ത്തനങ്ങളും തല്ക്കാലം നിര്ത്തിവെക്കും
നീണ്ട സംഘര്ഷത്തിനൊടുവില് ലഡാക്കിനോട് ചേര്ന്ന അതിര്ത്തിയില് ഇന്ത്യ- ചൈന സേനാ പിന്മാറ്റം. കിഴക്കന് ലഡാക്കിലെ പാങ്ങോങ് തടാകത്തിന്റെ തെക്കും വടക്കും തീരപ്രദേശത്തുനിന്ന് സേനകള് പിന്മാറുന്ന കാര്യത്തില് രണ്ടു രാജ്യങ്ങളും ധാരണ ഉണ്ടാക്കിയെന്നും പിന്മാറ്റം തുടങ്ങിക്കഴിഞ്ഞെന്നും പ്രതിരോധ മന്ത്രി രാജ്നാഥ് സിങ് പാര്ലമെന്റിന്റെ ഇരു സഭകളെയും അറിയിച്ചു.
പാങ്ങോങ് തടാക മേഖലയാണ് ഇരുസേനകളുടേയും സംഘര്ഷ കേന്ദ്രമായി നിന്നത്. ചൈനയുടെ പീപ്ള്സ് ലിബറേഷന് ആര്മി 'ഫിംഗര് 8' എന്ന പര്വത ശിഖരത്തിനു കിഴക്കു മാറി തെക്കന് തീരത്തു മാത്രം നിലയുറപ്പിക്കും. 'ഫിംഗര് 3'ക്കു സമീപത്തെ ധന്സിങ് ഥാപ്പ സ്ഥിരം താവളത്തില് ഇന്ത്യന് സേന കേന്ദ്രീകരിക്കും. പരസ്പര ബന്ധം വല്ലാതെ ഉലച്ചതിനൊടുവില് അതിര്ത്തി സംഘര്ഷം കുറക്കുന്നതിന് എത്തിച്ചേര്ന്ന ധാരണ ഇപ്രകാരമാണ്:
കഴിഞ്ഞ ഏപ്രില് അവസാനം മുതല് ഉണ്ടാക്കിയ എല്ലാ നിര്മിതികളും നീക്കും. പരമ്പരാഗത മേഖലകളില് ഇരു രാജ്യങ്ങളും പട്രോളിങ് അടക്കം എല്ലാ സൈനിക പ്രവര്ത്തനങ്ങളും തല്ക്കാലം നിര്ത്തിവെക്കും. ചര്ച്ചകള്ക്കു ശേഷം മാത്രം പുനരാരംഭിക്കും. മുന്നണി മേഖലകളിലെ സേനാ വിന്യാസം ഘട്ടംഘട്ടമായി, ഏറ്റവും നേരത്തേ പിന്വലിക്കും.
മുന്കാല ഉഭയകക്ഷി ധാരണകള് മാനിക്കും. രണ്ടു ദിവസത്തിനകംതന്നെ മുതിര്ന്ന സേനാ മേധാവികളുടെ അടുത്ത യോഗം വിളിച്ച് ബാക്കിനില്ക്കുന്ന വിഷയങ്ങള് പരിഹരിക്കും.ചൈനയുമായി നടത്തിയ ചര്ച്ചകളില് ഇന്ത്യ ഒന്നും വിട്ടുകൊടുത്തിട്ടില്ലെന്ന് പ്രതിരോധ മന്ത്രി വിശദീകരിച്ചു. ഒരിഞ്ചു ഭൂമി പോലും മറ്റാരും കൈയടക്കാന് അനുവദിക്കില്ല.
ഇന്ത്യയുടെ നിശ്ചയദാര്ഢ്യം ചൈനക്ക് ബോധ്യപ്പെട്ടിരിക്കുമെന്നാണ് കരുതുന്നത്. കഴിഞ്ഞ വര്ഷം മേയ് അഞ്ചിനു മുമ്ബത്തെ സമാധാനാന്തരീക്ഷം പുനഃസ്ഥാപിക്കുകയാണ് ഇരുകൂട്ടരുടെയും ലക്ഷ്യമെന്ന് മന്ത്രി പറഞ്ഞു.
ഏറെ മോശമായ സാഹചര്യങ്ങള്ക്കിടയിലും സേന കാണിച്ച കരുത്തിനും അര്പ്പണത്തിനും പ്രതിരോധ മന്ത്രി നന്ദി പറഞ്ഞു. കഴിഞ്ഞ വര്ഷം മേയ് അഞ്ചിനുണ്ടായ ഏറ്റുമുട്ടലിനെ തുടര്ന്നാണ് ഇന്ത്യയും ചൈനയും അതിര്ത്തിയില് സേനാ വിന്യാസം വര്ധിപ്പിച്ചത്.
https://www.facebook.com/Malayalivartha
