കുറ്റവാളികളായ ജനപ്രതിനിധികള് അയോഗ്യര്-സുപ്രീം കോടതി
കുറ്റവാളികളായ ജനപ്രതിനിധികള്ക്ക് തല്സ്ഥാനത്ത് തുടരാന് അര്ഹതയില്ലെന്ന് സുപ്രീം കോടതി. കുറ്റവാളിയാണെന്നു കണ്ടെത്തുന്ന ദിവസം മുതല് ഇവര് അയോഗ്യരാക്കപ്പെടും. വിചാരണക്കോടതി കുറ്റക്കാരനാണെന്നു കണെ്ടത്തിയാലും അപ്പീല് നല്കിയാല് മേല്ക്കോടതികള് തീര്പ്പു കല്പിക്കുന്നതു വരെ തത്സ്ഥാനത്തു തുടരാന് എംപിമാരെയും എംഎല്എമാരെയും അനുവദിക്കുന്ന ജനപ്രാതിനിധ്യ നിയമത്തിലെ എട്ടാം വകുപ്പിലെ നാലാം ഉപവകുപ്പ് റദ്ദാക്കിക്കൊണ്ടാണ് പരമോന്നത നീതിപീഠത്തിന്റെ ഉത്തരവ്. ജസ്റ്റിസ് എ.കെ പട്നായിക് അധ്യക്ഷനായ ബെഞ്ചിന്റേതാണ് വിധി.
വിധി പ്രാബല്യത്തില് വരുന്നതോടെ ക്രിമിനല് കേസുകളില് ശിക്ഷിക്കപ്പെട്ടു കഴിഞ്ഞാല് തെരെഞ്ഞെടുപ്പില് മത്സരിക്കുവാന് സാധിക്കില്ല. നിയമസഭയിലേക്കും പാര്ലമെന്റിലേക്കും മത്സരിക്കുന്നതിനാണ് വിലക്ക്. എന്നാല് നിലവില് കുറ്റക്കാരാണെന്ന് കണ്ടെത്തിയ കേസുകളില് വിധി ബാധകമല്ല.
അഭിഭാഷകരായ ലില്ലി തോമസ്, സന്നദ്ധ സംഘടനയായ ലോക് പ്രഹരിയുടെ സെക്രട്ടറി എസ്.എന് ശുക്ല എന്നിവരുടെ ഹര്ജിയിലാണ് കോടതി സുപ്രധാന വിധി പ്രസ്താവിച്ചിരിക്കുന്നത്. കൂടാതെ രാഷ്ട്രപതിയോ ഗവര്ണറോ അയോഗ്യതയില് തീരുമാനമെടുക്കുന്നതുവരെ നീട്ടിവെക്കേണ്ടതില്ലെന്നും കോടതി വ്യക്തമാക്കി.
നിലവില് ജയില്ശിക്ഷ അനുഭവിച്ചവര്ക്കും, ശിക്ഷ അനുഭവിച്ചുകൊണ്ടിരിക്കുന്നവര്ക്കും തെരെഞ്ഞെടുപ്പില് മത്സരിക്കാം എന്ന അവസ്ഥയാണുള്ളത്.
https://www.facebook.com/Malayalivartha
