പ്രതിഷേധങ്ങള്ക്ക് പുല്ലുവില... തീരുമാനങ്ങളുമായി ലക്ഷദ്വീപ് അഡ്മിനിസ്ട്രേറ്റര് മുന്നോട്ട്; സര്ക്കാര് ജീവനക്കാരായ ദ്വീപുകാര്ക്ക് അടുത്ത പണി; കാര്യക്ഷമതയില്ലാത്തവരുടെ കണക്കെടുക്കാന് നിര്ദ്ദേശം
പ്രതിഷേധങ്ങള്ക്കിടയിലും കൂടുതല് കര്ശന നടപടിയുമായി ലക്ഷദ്വീപ് അഡ്മിനിസ്ട്രേസ്റ്റര് പ്രഫുല് ഖോഡ പട്ടേല് മുന്നോട്ട്. കാര്യക്ഷമമായി പ്രവര്ത്തിക്കാത്ത സര്ക്കാര് ജീവനക്കാരുടെ പട്ടിക തയാറാക്കുമെന്നാണ് പുതിയ അറിയിപ്പ്. ദ്വീപുകാരായ കരാര് ജീവനക്കാരെ പിരിച്ചുവിട്ടതിനു പിന്നാലെയാണ് നടപടി. നിയമന രീതികള് പുനഃപരിശോധിക്കാനും നിര്ദേശിച്ചിട്ടുണ്ട്. ദ്വീപ് സ്വദേശികളായ ജീവനക്കാരെ പിരിച്ചുവിടാനുള്ള നീക്കത്തിന്റെ ഭാഗമാണ് പുതിയ നപടിയെന്ന വിമര്ശനം.
പ്രക്ഷോഭ പരിപാടികള് ആലോചിക്കാന് ദ്വീപില് നാളെ സര്വ്വകക്ഷിയോഗം ഓണ്ലൈന് വഴി ചേരും. നിലവില് വിവിധ ദ്വീപുകളില് ജോലിചെയ്യുന്ന സര്ക്കാര് ജീവനക്കാരില് കാര്യക്ഷമതയില്ലാത്തവരുടെ കണക്കെടുക്കണമെന്നാണ് പുതിയ നിര്ദ്ദേശം. ഇക്കഴിഞ്ഞ മെയ് 20ന് ലക്ഷദ്വിപ് അഡ്മിനസ്ട്രേഷന് സെക്രട്ടറി അമിത് സതിചാ വിവിധ വകുപ്പ് മേധാവികള്ക്ക് അയച്ച സര്ക്കുലറാണിത്. ഇത് പ്രകാരം കാര്യക്ഷമതയില്ലാത്തവരെ കണ്ടെത്തി കണക്ക് നല്കണം എന്നാണ് പറയുന്നത്.
ലക്ഷദ്വീപിലെ നിയമന രീതികളെല്ലാം അട്ടിമറിച്ചുകൊണ്ട് ഒരു സിലക്ഷന് ബോര്ഡ് നേരത്തെതന്നെ രൂപീകരിച്ചിരുന്നു. അതില് ലക്ഷദ്വീപിലെ ഒരു ജനപ്രതിനിധിയെയും ഉള്പ്പെടുത്തിയിട്ടില്ല. ഉത്തരേന്ത്യയിലെ ഉദ്യോഗസ്ഥര് മാത്രമാണ് ബോര്ഡിലുള്ളത്. ഇതിനു പിന്നാലെയാണ് കാര്യക്ഷമമായി പ്രവര്ത്തിക്കാത്ത ജീവനക്കാരുടെ പട്ടിക തയാറാക്കാനുള്ള നീക്കവും. ഇതാണ് ദ്വീപുകാരില് ആശങ്കയുണ്ടാക്കുന്നത്.
ദ്വീപുകാരുടെ തൊഴില് ഇല്ലാതാക്കാനുള്ള ശ്രമമാണ് ഇതെന്ന് യൂത്ത് കോണ്ഗ്രസ് ആരോപിച്ചു. അഡ്മിനിസ്ട്രേറ്ററുടെ നടപടികള്ക്കെതിരെ പൊതുതാല്പര്യ ഹര്ജിയുമായി ഹൈക്കോടതിയെ സമീപിക്കാനും നീക്കമുണ്ട്. അഡ്മിനിസ്ട്രേറ്ററുടെ നിലപാടുകള്ക്കെതിരെ വ്യാഴാഴ്ച ഓണ്ലൈന് വഴി ലക്ഷദ്വീപില് സര്വകക്ഷിയോഗം ചേരും. ബിജെപി പ്രതിനിധികളും പങ്കെടുക്കും.
https://www.facebook.com/Malayalivartha
