ജയ്‌പൂരിൽ ഭക്ഷണം നല്‍കാമെന്ന് പറഞ്ഞു പ്രലോഭിപ്പിച്ച്‌ 22കാരിയെ ആംബുലന്‍സ് ഡ്രൈവറും സുഹൃത്തുക്കളും ചേർന്ന് കൂട്ട ബലാത്സംഗത്തിനിരയാക്കി. ഭക്ഷണം നല്‍കാമെന്ന് പറഞ്ഞ് യുവതിയെ ആംബുലന്‍സിലേക്ക് വിളിച്ച്‌ വരുത്തുകയും പിന്നീട് ഡ്രൈവര്‍ ആളൊഴിഞ്ഞ പ്രദേശത്തേക്ക് ഓടിച്ച്‌ കൊണ്ടുപോയിട്ടായിരുന്നു ക്രൂരമായി പീഡിപ്പിച്ചത്.

അതിദാരുണമായ സംഭവം തിങ്കളാഴ്ചയാണ് നടന്നത്. യുവതിയുടെ പരാതിയില്‍ കൂട്ട ബലാത്സംഗത്തിനും പട്ടികജാതി പട്ടിക വര്‍ഗ സംരക്ഷണ വകുപ്പ് പ്രകാരവും കേസെടുത്തിരിക്കുകയാണ്. ആംബുലന്‍സ് ഡ്രൈവറേയും സുഹൃത്തിനേയും കസ്റ്റഡിയില്‍ എടുത്തതായി പൊലീസ് വ്യക്തമാക്കി.

അതേസമയം, ദിവസങ്ങൾക്ക് മുൻപ് ചികിത്സയിലിരിക്കെ ആശുപത്രിയിലെ മൂന്ന് ജീവനക്കാര്‍ അമ്മയെ ബലാത്സംഗത്തിനിരയാക്കിയെന്നും പിന്നാലെയാണ് മരണം സംഭവിച്ചതെന്നും പരാതി നല്‍കി മകള്‍. ബിഹാറിലെ പട്നയിലാണ് നടുക്കുന്ന സംഭവം. ചികിത്സയിൽ കഴിയവെ മരിച്ച 45 കാരിയുടെ മകൾ ആശുപത്രി മാനേജ്മെന്റിനെതിരെ പൊലീസില്‍ പരാതി നൽകുകയായിരുന്നു.

മെയ് 17 നാണ് 45 കാരിയെ കൊവിഡ് ലക്ഷണങ്ങളുമായി പട്നയിലെ സ്വകാര്യ ആശുപത്രിയിൽ പ്രവേശിപ്പിച്ചത്. എന്നാൽ അതേ ദിവസം അവിടെ ഉണ്ടായിരുന്നവരില്‍ മൂന്ന് ജീവനക്കാര്‍ തന്നെ ലൈംഗികമായി പീഡിപ്പിച്ചതായി അമ്മ വെളിപ്പെടുത്തിയിരുന്നുവെന്നാണ് മകൾ പരാതിയിൽ പറയുന്നത്.

പീഡനത്തിന് ഇരയായ ശേഷം, ആശുപത്രി അധികൃതർ അമ്മയെ തിടുക്കപ്പെട്ട് വെന്റിലേറ്ററിലേക്ക് മാറ്റുകയായിരുന്നു. ഇല്ലെങ്കിൽ ജീവൻ അപകടത്തിലാകുമെന്നാണ് പറഞ്ഞത്. തുടർന്ന് തന്റെ സമ്മതത്തേടെ വെന്റിലേറ്റനിലേക്ക് മാറ്റപ്പെട്ട അമ്മ പിറ്റേ ദിവസം മരിച്ചെന്ന വാർത്തയാണറിഞ്ഞത്.

എന്നാൽ പീഡന വിവരം പുറത്ത് വരാതിരിക്കാൻ അമ്മയുടെ കഴുത്തിൽ എന്തോ കുത്തിവച്ചതായി സംശയിക്കുന്നതായും മകൾ പറഞ്ഞു. എന്നാൽ പരാതി നിഷേധിച്ച് ആശുപത്രി മാനേജ്മെന്‍റ് രംഗത്തെത്തി.