ഒറ്റരാത്രി കൊണ്ടു ലക്ഷദ്വീപില്‍ സംഭവിച്ചത്! ഇതെന്തിനുള്ള പുറപ്പാട്?മല്‍സ്യത്തൊഴിലാളികളുടെ ജീവനോപാധി നശിപ്പിച്ച് ലക്ഷദ്വീപ് ഭരണകൂടം. ഈ ആരോപണത്തെ തെളിയിക്കുന്ന വീഡിയോ ഇപ്പോള്‍ പ്രചരിക്കുകയാണ്.

തീരസംരക്ഷണനിയമത്തിന്റെ പേരില്‍ വള്ളങ്ങളും രാത്രി ജെസിബി ഉപയോഗിച്ച് നശിപ്പിച്ചു. കോവിഡിന്റെ പേരില്‍ കര്‍ഫ്യൂ പ്രഖ്യാപിച്ച് നാട്ടുകാരെ വീട്ടിലിരുത്തിയ ശേഷമായിരുന്നു ജെസിബി ഉപയോഗിച്ച് പൊളിക്കല്‍ നടത്തിയത്. പൊലീസ് ബന്തവസില്‍ എന്നാണ് അറിയാന്‍ സാധിക്കുന്നത്.ഏപ്രില്‍ 28ന് നടത്തിയ നടപടികളുടെ ദൃശ്യങ്ങള്‍ ഇതിനോടകം പ്രചരിച്ചു കഴിഞ്ഞു.



ലക്ഷദ്വീപിലെ കവരത്തിയില്‍ നിന്നുള്ള ദൃശ്യങ്ങളാണ് പുറത്തു വന്നത്. തീരമേഖലയിലെ മല്‍സ്യത്തൊഴിലാളികളുടെ ഷെഡുകളും വള്ളങ്ങളുമെല്ലാം കഴിഞ്ഞ ഏപ്രില്‍ 28ന് രാത്രിയില്‍ പൊളിച്ചടുക്കുകയായിരുന്നു . പൊലീസും ദ്വീപ് അഡ്മിനിസ്‌ട്രേഷന്‍ ഉദ്യോഗസ്ഥരും പൊളിക്കലിന് കാവല്‍ നില്‍ക്കുന്നുണ്ടായിരുന്നു.

കോവിഡ് വ്യാപനത്തെ തുടര്‍ന്ന് കര്‍ഫ്യൂ പ്രഖ്യാപിച്ചതിനാല്‍ മല്‍സ്യത്തൊഴിലാളികളടക്കമുള്ള ദ്വീപ് നിവാസികള്‍ വീടുകളിലായിരുന്നു. ഒന്ന് പ്രതികരിക്കാന്‍ പോലും ആര്‍ക്കും സാധിച്ചില്ല എന്നതാണ് സത്യാവസ്ഥ.



വീടുകളില്‍നിന്ന് പുറത്തിറങ്ങിയ ചിലര്‍ പിന്നീടു കണ്ട കാഴ്ച ദുഃഖകരമായിരുന്നു. ബോട്ടുകള്‍ കയറ്റിയിരുന്ന ഷെഡുകളെല്ലാം പൊളിച്ചതോടെ പലര്‍ക്കും കടലിലേക്ക് ബോട്ടുകള്‍ ഇറക്കേണ്ടിവന്നു. പിന്നാലെയാണ് ടൗട്ടെ ചുഴലിക്കാറ്റ് ദ്വീപിനെ വിഴുങ്ങിയത്. ദ്വീപ് ജനതയുടെ പ്രതിഷേധങ്ങളെല്ലാം കോവിഡില്‍ അമര്‍ന്നു പോയി എന്ന് തന്നെ പറയാം. ദ്വീപിലെ നെറ്റ്വര്‍ക്ക് പ്രശ്‌നങ്ങളും മാധ്യമങ്ങളുടെ കുറവുമെല്ലാം കാരണം ദിവസങ്ങള്‍ക്ക് ശേഷമാണ് ദൃശ്യങ്ങള്‍ പലതും പുറത്തുവന്നത് എന്നാണ് അറിയാന്‍ സാധിക്കുന്നത്.



അതേസമയം ലക്ഷദ്വീപിനെ കേന്ദ്രീകരിച്ച് നടക്കുന്ന ആരോപണങ്ങളില്‍ ദ്വീപിന്റെ ചുമതലയുള്ള അബ്ദുള്ളക്കുട്ടി രംഗത്തുവന്നിരുന്നു
: ആരും അവിടെയുള്ള ജനങ്ങളുടെ ഭക്ഷണ രീതിയിലോ മറ്റോ ഇടപെട്ടിട്ടില്ല. സ്‌കൂളില്‍ മാത്രമാണ് മാംസാഹാരത്തിന് നിരോധനമുള്ളത്. ലക്ഷദ്വീപിന്റെ വികസനമാണ് ബി.ജെ.പിയുടെ ലക്ഷ്യമെന്നും ബി.ജെ.പിയുടെ ദേശീയ ഉപാധ്യക്ഷനും ലക്ഷദ്വീപിന്റെ ചുമതലയുള്ള നേതാവുമായ എ.പി അബ്ദുള്ളക്കുട്ടി ചൂണ്ടിക്കാട്ടി.


കോണ്‍ഗ്രസ് അവിടെ പ്രാകൃതമായ വികസനമായിരുന്നു കൊണ്ടുവന്നത്. അതില്‍ നിന്നും ജനങ്ങളെ രക്ഷപ്പെടുത്തുകയാണ് ചെയ്യുന്നതെന്നും അബ്ദുള്ളക്കുട്ടി ചൂണ്ടി കാണിച്ചിരിക്കുകയാണ്.