രണ്ടാം കോവിഡ് തരംഗം രാജ്യത്തെ ആകെ പിടിച്ചുകുലുക്കിയിരിക്കുകയാണ്. അതിതീവ്ര വ്യാപനമാണ് രാജ്യത്ത് ഇതിനോടകം തന്നെ റിപ്പോര്‍ട്ട് ചെയ്യുന്നത്. നിലവിൽ കോവിഡ് വ്യാപനം ചെറിയ രീതിയിൽ കുറയുന്നുവെങ്കിലും മരണസംഖ്യ ഉയരുന്നത് ആശങ്ക ഉയര്‍ത്തുന്നുണ്ട്. വിവിധ രാജ്യങ്ങളിലും ഇന്ത്യന്‍ വകഭേദം പടരുന്നതായുള്ള റിപ്പോർട്ടുകളും ആശങ്കകൾക്ക് വഴിയൊരുക്കുന്നു. ഈ പശ്ചാത്തലത്തിലാണ് ഫൈസർ അവകാശവാദവുമായി രംഗത്ത് എത്തിയിരിക്കുന്നത്.

തങ്ങള്‍ വികസിപ്പിച്ചെടുത്ത കോവിഡ് വാക്‌സിന്‍ ഇന്ത്യന്‍ വകഭേദത്തിനെതിരെ ഫലപ്രദമെന്ന് പ്രമുഖ അമേരിക്കന്‍ മരുന്ന് കമ്പനിയായ ഫൈസര്‍ രംഗത്ത് എത്തിയിരിക്കുകയാണ്. 12 വയസിന് മുകളിലുള്ളവര്‍ക്ക് വാക്‌സിന്‍ ഉചിതമാണെന്ന് കേന്ദ്രസര്‍ക്കാരിനെ അറിയിച്ചതായി ഫൈസര്‍ വൃത്തങ്ങള്‍ വ്യക്തമാക്കുകയും ചെയ്തു. വികസിപ്പിച്ചെടുത്ത വാക്‌സിന്‍ ഇന്ത്യന്‍ വകഭേദത്തിനെതിരെ ഫലപ്രദമെന്നാണ് ഫൈസറിന്റെ അവകാശവാദം എന്നത്. ഒരു മാസം വരെ വാക്‌സിന്‍ കോള്‍ഡ് സ്‌റ്റോറേജ് സംവിധാനത്തില്‍ സുരക്ഷിതമായി സൂക്ഷിക്കാന്‍ സാധിക്കും.

രണ്ടു മുതല്‍ എട്ടു ഡിഗ്രി വരെ സെല്‍ഷ്യസിലാണ് ഇത് സൂക്ഷിക്കേണ്ടതെന്നും കമ്പനി വൃത്തങ്ങള്‍ സൂചിപ്പിക്കുകയുണ്ടായി. നേരത്തെ നെഗറ്റീവ് താപനിലയില്‍ വാക്‌സിന്‍ സൂക്ഷിക്കണമെന്ന തരത്തിലാണ് റിപ്പോര്‍ട്ടുകള്‍ വന്നിരുന്നത്. ഇതിന് ചെലവ് കൂടുതലാണെന്നും ഇന്ത്യ പോലെ ജനസംഖ്യ കൂടുതലുള്ള രാജ്യത്തിന് ഇത് പ്രായോഗികമല്ലെന്നുമുള്ള റിപ്പോർട്ടുകളും പുറത്തുവന്നിരുന്നു.

അതേസമയം അടിയന്തര ഉപയോഗത്തിന് അനുമതി തേടി ഫൈസര്‍ കമ്പനി കേന്ദ്രസര്‍ക്കാരിനെ സമീപിച്ചതായാണ് റിപ്പോര്‍ട്ടുകള്‍ വ്യക്തമാക്കുന്നത്. അനുമതി ലഭിച്ചാല്‍ ജൂലൈ- ഒക്ടോബര്‍ കാലയളവില്‍ അഞ്ചു കോടി വാക്‌സിന്‍ ഡോസുകള്‍ വിതരണം ചെയ്യാന്‍ കഴിയുമെന്നാണ് കമ്പനി പറയുന്നത്. എന്നാല്‍ നഷ്ടപരിഹാരം ഉള്‍പ്പെടെയുള്ള കാര്യങ്ങളില്‍ ഇളവ് വേണമെന്നും കമ്പനി ആവശ്യപ്പെടും ചെയ്തിട്ടുണ്ട്.