ട്രെയിന്‍ യാത്രക്കിടെ എന്തെങ്കിലും സംഭവിച്ചാല്‍ ഏറ്റവും വലിയ ബുദ്ധിമുട്ട് യാത്ര അവിടെ മുടങ്ങും എന്നതായിരുന്നു. എന്നാല്‍ അതിന് ഒരറുതി വരുത്തി പുത്തന്‍ സംവിധാനവുമായി കേന്ദ്രം.
മോഷണം ഉള്‍പ്പെടെയുള്ള പരാതികള്‍ ജീവനക്കാരെ അറിയിച്ചാല്‍ പൊലീസ് കേസെടുക്കുന്ന സംവിധാനത്തിന് റെയില്‍വെ തുടക്കം കുറിക്കുന്നു.
സാധനസാമഗ്രികള്‍ മോഷണം പോയാലോ പിടിച്ചുപറി നടന്നാലോ ഡ്യൂട്ടിയിലുള്ള റെയില്‍വെ ജീവനക്കാരനോട് പരാതിപ്പെട്ടാല്‍ മതിയാകും. ഇവര്‍ അത് പൊലീസിനെ അറിയിക്കും. കോച്ച് അറ്റന്‍ഡര്‍, ട്രെയിന്‍ഗാര്‍ഡ്, ആര്‍പിഎഫ് ഉദ്യോഗസ്ഥര്‍ തുടങ്ങി ട്രെയിനിലെ ജീവനക്കാരില്‍ ആരെയെങ്കിലും പരാതി ഏല്‍പ്പിച്ചാല്‍ അതില്‍ തുടര്‍നടപടി എടുക്കാനാണ് റെയില്‍വെ നിര്‍ദേശിച്ചിരിക്കുന്നത്.
ആര്‍പിഎഫ് ഉദ്യോഗസ്ഥര്‍ ഇല്ലെങ്കില്‍ തന്നെ കോച്ച കണ്ടക്ടര്‍, ട്രെയിന്‍ ഗാര്‍ഡ്, കോച്ച് അറ്റന്‍ഡന്റ് എന്നിവര്‍ക്ക് എഫ്‌ഐആര്‍ തയ്യാറാക്കാനാകും. ഇതിനുള്ള ഫോം അവരുടെ കൈവശമുണ്ടാകും. പ്ലാറ്റ്‌ഫോമില്‍ വച്ചാണ് സംഭവം എങ്കില്‍ സ്‌റ്റേഷന്‍ ഇന്‍ ചാര്‍ജിനും ഈ രീതിയില്‍ എഫ്‌ഐആര്‍ തയ്യാറാക്കാന്‍ അവകാശമുണ്ടാകും.
പുതിയ നിര്‍ദേശത്തോടെ ജനങ്ങള്‍ക്ക് ഉപകാരപ്രദമാകുന്ന നടപടിയാണ് കേന്ദ്രസര്‍ക്കാരില്‍ നിന്ന് ഉണ്ടായിരിക്കുന്നത്. ട്രെയിനില്‍ തന്നെ എഫ്‌ഐആര്‍ തയ്യാറാക്കാവുന്ന തരത്തിലാണ് പുതിയ സംവിധാനത്തിന് നിര്‍ദ്ദേശം നല്‍കിയിട്ടുള്ളത്. ഇതുവഴി കൂടുതല്‍ പരാതികള്‍ ഉണ്ടാകുമെന്നും യാത്രക്കാര്‍ക്ക് സൗകര്യമാകുമെന്നും റെയില്‍വേ കണക്കുകൂട്ടുന്നു. ഇതുവരെ യാത്രമുടക്കം പേടിച്ച് ആളുകള്‍ പരാതി നല്‍കാതിരിക്കുകയാണ് പതിവ്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha