തെരുവ് നായ്ക്കളെ തൊട്ടാല്‍ വെറുതെയിരിക്കില്ലെന്ന് കേന്ദ്ര വനിതാ, ശിശുക്ഷേമ മന്ത്രി മേനകാ ഗാന്ധി. തെരുവുനായ്ക്കളുടെ പ്രശ്‌നം കേരളത്തില്‍ രാഷ്ട്രീയമായി ദുരുപയോഗം ചെയ്യുകയാണെന്ന വിമര്‍ശനവുമായി സംസ്ഥാന സര്‍ക്കാരിനു കേന്ദ്രമന്ത്രി മേനക ഗാന്ധി കത്തയച്ചു. അപകടകാരികളായ തെരുവുനായ്ക്കളെ കൊല്ലാനുള്ള തീരുമാനത്തെ എതിര്‍ക്കുന്ന കത്തില്‍ നായ്ക്കള്‍ അകാരണമായി ആളുകളെ ആക്രമിക്കില്ലെന്നും മന്ത്രി അവകാശപ്പെടുന്നു. നായ്ക്കളെ വന്ധ്യംകരിക്കാനുള്ള പദ്ധതി കേരളത്തില്‍ മാത്രമാണു ഫലപ്രദമായി നടപ്പാക്കാത്തതെന്നും മേനക കുറ്റപ്പെടുത്തുന്നു. ചീഫ് സെക്രട്ടറി ജിജി തോംസണിന് അയച്ച ആറു പേജുള്ള കത്തിലാണു കേരളത്തിന്റെ നടപടികളെ മേനക ഗാന്ധി വിമര്‍ശിക്കുന്നത്.
തെരുവുനായ്ക്കളുടെ ജനനനിയന്ത്രണം തടയാന്‍ നടപടികളെടുക്കണമെന്നും ഇക്കാര്യം മുഖ്യമന്ത്രിയുടെ ശ്രദ്ധയില്‍പ്പെടുത്തണമെന്നുമാണു കത്തിലെ പ്രധാന ആവശ്യം. കേരളത്തില്‍ ആളുകളെ ആക്രമിക്കുന്നത് വീടുകളില്‍ വളര്‍ത്തുന്നവയാണെന്നാണ് മന്ത്രിയുടെ വാദം. തെരുവ് നായകള്‍ ജനങ്ങളെ ആക്രമിക്കുന്നില്ല.
നായകളെ കൊല്ലുന്നതു കോടതിയും കേന്ദ്ര സര്‍ക്കാരും തടഞ്ഞിട്ടുണ്ട്. നായകള്‍ തെരുവിന്റെ ഭാഗമാണെന്നു കോടതി പറഞ്ഞിട്ടുണ്ട്. നായകള്‍ തെരുവിലുള്ളത് അവിടം കൂടുതല്‍ സുരക്ഷിതമാക്കും.സെക്യൂരിറ്റിക്കാര്‍ക്കു കണ്ടെത്താന്‍ കഴിയാത്ത അപരിചിതരെപ്പോലും നായകള്‍ക്കു കണ്ടെത്താനാകും. അങ്ങനെ കുറ്റകൃത്യങ്ങള്‍ കുറയ്ക്കാം. വന്ധ്യംകരണവും പ്രതിരോധകുത്തിവയ്പും സര്‍ക്കാര്‍ നടത്തരുതെന്നും ഇതിനായി എന്‍ജിഒകളെ ഏല്‍പ്പിക്കണമെന്നും മേനക ആവശ്യപ്പെട്ടു.
ഒരു നായയുടെ വന്ധ്യംകരണത്തിന് 750 മുതല്‍ 1200 രൂപ വരെ നല്‍കാം. സംസ്ഥാനതലത്തിലുള്ള പദ്ധതിക്കു കേന്ദ്രസര്‍ക്കാര്‍ അഞ്ചു കോടി രൂപ വരെ അനുവദിക്കും. ഇതു നേരിട്ട് എന്‍ജിഒകള്‍ക്കാണു നല്‍കുകയെന്നും മേനക അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha