സുപ്രീം കോടതിയുടെ നാല്‍പതാമത്‌ ചീഫ്‌ജസ്റ്റിസായി ജസ്റ്റിസ്‌ പി.സദാശിവം ചുമതലയേറ്റു. രാഷ്ട്രപതി പ്രണബ്‌ മുഖര്‍ജിക്കു മുന്‍പാകെയാണ്‌ അദ്ദേഹം സത്യപ്രതിജ്ഞ ചെയ്‌തത്‌. ചീഫ്‌ ജസ്റ്റിസ്‌ അല്‍ത്തമാസ്‌ കബീര്‍ ജൂലായ്‌ 18ന്‌ വിരമിച്ച പശ്ചാത്തലത്തിലാണ്‌ സദാശിവം ചീഫ്‌ജസ്റ്റിസ്‌ പദവിയില്‍ എത്തുന്നത്‌. 2014 ഏപ്രില്‍ 26 വരെയാണ്‌ ഇദ്ദേഹത്തിന്റെ കാലാവധി. തമിഴ്‌നാട്ടില്‍ നിന്ന്‌ ചീഫ്‌ ജസ്റ്റിസ്‌ പദത്തിലെത്തുന്ന ആദ്യ വ്യക്തിയാണ്‌ സദാശിവം. 1949 ഏപ്രില്‍ 27ന്‌ തമിഴ്‌നാട്ടിലെ ഈറോഡ്‌ ജില്ലയിലെ കഡപ്പനെല്ലൂരില്‍ ഒരു കര്‍ഷക കുടുംബത്തിലാണ്‌ സദാശിവത്തിന്റെ ജനനം. ബി.എയ്‌ക്കു ശേഷം ചെന്നൈയിലെ ഗവണ്‍മെന്റ്‌ ലോ കോളേജില്‍ നിന്നാണ്‌ സദാശിവം നിയമത്തില്‍ ബിരുദം നേടിയത്‌. കുടുംബത്തിലേയും ഗ്രാമത്തിലേയും ആദ്യ ബിരുദധാരിയായിരുന്നു പി.സദാശിവം.

മുല്ലപ്പെരിയാര്‍ ഉള്‍പ്പെടെയുള്ള നദീജല തര്‍ക്കങ്ങള്‍ സംബന്ധിച്ച കേസുകള്‍ വേഗത്തില്‍ തീര്‍പ്പാക്കണമെന്നും ഇത്തരം കേസുകളിലെ ഹര്‍ജികള്‍ പഠിക്കുന്നതിനു തന്നെ ആഴ്‌ചകള്‍ വേണ്ടിവരുമെന്നും ചീഫ്‌ജസ്റ്റിസ്‌ ഇന്നലെ പറഞ്ഞു. അല്‍ത്തമാസ്‌ കബീറിന്റെ യാത്രയയപ്പ്‌ സമ്മേളനത്തില്‍ സംസാരിക്കുകയായിരുന്നു അദ്ദേഹം. മുല്ലപ്പെരിയാര്‍ കേസിന്റെ അന്തിമവാദത്തിനു മാത്രം മൂന്നാഴ്‌ച വേണ്ടിവരുമെന്നും ഇത്രയും സമയമെടുക്കുന്നതു കെട്ടിക്കിടക്കുന്ന കേസുകള്‍ തീര്‍പ്പാക്കുന്നതിനു തടസമാണെന്നും ജസ്റ്റീസ്‌ സദാശിവം അഭിപ്രായപ്പെട്ടു. മുല്ലപ്പെരിയാര്‍ കേസില്‍ 23-ന്‌ അന്തിമവാദം തുടങ്ങാനിരിക്കെയാണ്‌ നിയുക്ത ചീഫ്‌ ജസ്റ്റീസിന്റെ പരാമര്‍ശം.

വാദങ്ങള്‍ കക്ഷികളില്‍ നിന്ന്‌ എഴുതി വാങ്ങുന്നതു പ്രോത്സാഹിപ്പിക്കും. കെട്ടിക്കിടക്കുന്ന കേസുകള്‍ സമയബന്ധിതമായി തീര്‍പ്പാക്കുന്നതിനു നടപടി സ്വീകരിക്കു മെന്നും ജസ്റ്റീസ്‌ സദാശിവം കൂട്ടിച്ചേര്‍ത്തു. സ്‌ത്രീകള്‍ക്കും കുട്ടികള്‍ക്കുമെതിരേയുള്ള അതിക്രമങ്ങള്‍ സംബന്ധിച്ച കേസുകള്‍ പരിഹരിക്കുന്നതിനു പ്രഥമ പരിഗണന നല്‍കുമെന്നും  ചീഫ്‌ ജസ്റ്റിസ്‌ പി.സദാശിവം അറിയിച്ചു.