അനധികൃത ടെലിഫോണ്‍ എക്‌സ്‌ചേഞ്ച് സ്ഥാപിച്ച കേസില്‍ മുന്‍ കേന്ദ്രമന്ത്രി ദയാനിധി മാരനെ അറസ്റ്റു ചെയ്യുന്നതിന് സുപ്രീം കോടതിയുടെ താത്കാലിക വിലക്ക്. ഇനിയൊരുത്തരവുണ്ടാകുന്നവരെ അറസ്റ്റുണ്ടാകരുതെന്നും സുപ്രീം കോടതി ഉത്തരവിട്ടു.
കേസില്‍ സിബിഐയേയും കേന്ദ്രസര്‍ക്കാരിനെയും സുപ്രീം കോടതി രൂക്ഷമായി വിമര്‍ശിച്ചു. പകപോക്കലിനു സിബിഐയെ ഉപയോഗിക്കുന്നതിനെയാണു കോടതി വിമര്‍ശിച്ചത്. ജസ്റ്റിസ് ടി.എസ്.ഠാക്കൂര്‍ അധ്യക്ഷനായ മൂന്നംഗ ബെഞ്ചാണ് മുന്‍കൂര്‍ ജാമ്യാപേക്ഷ പരിഗണിച്ചത്.
സിബിഐയെ രാഷ്ട്രീയ പകപോക്കലിന് ഉപയോഗിക്കരുതെന്നും സുപ്രീം കോടതി പറഞ്ഞു. കേസില്‍ മുന്‍കൂര്‍ ജാമ്യാപേക്ഷ മദ്രാസ് ഹൈക്കോടതി തള്ളിയതിനെത്തുടര്‍ന്നാണ് ദയാനിധി മാരന്‍ സുപ്രീം കോടതിയെ സമീപിച്ചത്. സ്വന്തം വീട്ടില്‍ അനധികൃത ടെലിഫോണ്‍ എക്‌സ്‌ചേഞ്ച് സ്ഥാപിച്ചതിനാണ് മുന്‍ കേന്ദ്രമന്ത്രിയും ഡിഎംകെ നേതാവുമായ ദയാനിധി മാരനെ അറസ്റ്റ് ചെയ്യണമെന്ന ആവശ്യവുമായി സിബിഐ രംഗത്തെത്തിയത്.
വീട്ടില്‍ അനധികൃതമായി ടെലിഫോണ്‍ എക്‌സ്‌ചേഞ്ച് പ്രവര്‍ത്തിപ്പിച്ച കേസിലാണു മുന്‍ കേന്ദ്രമന്ത്രി ദയാനിധി മാരന്റെ മുന്‍കൂര്‍ ജാമ്യം മദ്രാസ് ഹൈക്കോടതി റദ്ദാക്കിയത്. ഇതോടെ, കേസില്‍ മുന്‍ കേന്ദ്രമന്ത്രി ജയിലില്‍ പോകാനുള്ള സാധ്യതയും ഏറിയിരുന്നു. മൂന്നു ദിവസത്തിനുള്ളില്‍ മാരന്‍ സിബിഐക്കുമുന്നില്‍ കീഴടങ്ങണമെന്നാണു കോടതി ആവശ്യപ്പെട്ടിരുന്നത്. ഇതിനെതിരെയാണു മാരന്‍ സുപ്രീം കോടതിയെ സമീപിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha