ബിഡിഎസ് വിദ്യാര്ഥി നിതിന് രാജിന്റെ മരണം: വിട്ടുവീഴ്ചയില്ലാത്ത നടപടി ഉണ്ടാകുമെന്ന് വൈസ് ചാന്സലര്
അഞ്ചരക്കണ്ടി ദന്തല് കോളജിലെ ഒന്നാം വര്ഷ ബിഡിഎസ് വിദ്യാര്ഥി നിതിന് രാജിന്റെ മരണത്തില് കുറ്റക്കാര്ക്കെതിരെ കടുത്ത നടപടി സ്വീകരിക്കുമെന്ന് ആരോഗ്യ സര്വകലാശാലാ വൈസ് ചാന്സലര് ഡോ. മോഹനന് കുന്നുമ്മല് അറിയിച്ചു. കലാലയങ്ങളില് ഇത്തരം ദൗര്ഭാഗ്യകരമായ സംഭവങ്ങള് ആവര്ത്തിക്കാന് പാടില്ലാത്തതാണെന്നും, സംഭവത്തിന്റെ സത്യാവസ്ഥ പുറത്തുകൊണ്ടുവരേണ്ടത് അനിവാര്യമാണെന്നും അദ്ദേഹം മാധ്യമങ്ങളോട് പ്രതികരിച്ചു.
പൊലീസ് അന്വേഷണത്തിന് പുറമെ ആരോഗ്യ സര്വകലാശാലയുടെ പ്രത്യേക സംഘവും കേസ് അന്വേഷിക്കുന്നുണ്ടെന്ന് വി.സി വ്യക്തമാക്കി. സര്വകലാശാലയുടെ അന്വേഷണസംഘം ഉടന് തന്നെ കോളജിലെത്തി തെളിവെടുപ്പ് നടത്തും. നിലവില് അധ്യാപകര്ക്കെതിരെയോ കോളജ് മാനേജ്മെന്റിനെതിരെയോ പരാതികള് ലഭിച്ചിരുന്നില്ലെന്നും, ഇപ്പോള് ലഭിച്ച പരാതിയിന്മേല് കൃത്യമായ നടപടി ഉണ്ടാകുമെന്നും അദ്ദേഹം ഉറപ്പുനല്കി.
അച്ചടക്കത്തിന്റെയും പഠനത്തിന്റെയും പേരില് വിദ്യാര്ഥികള്ക്ക് മാനസിക സമ്മര്ദ്ദമുണ്ടാക്കുന്ന ഇത്തരം കോളജുകള്ക്ക് തുടര്ന്ന് പ്രവര്ത്തിക്കാന് അനുമതി നല്കണമോ എന്ന കാര്യത്തില് സര്വകലാശാല പുനരാലോചന നടത്തും. ഇക്കാര്യങ്ങള് ചാന്സിലറെ കണ്ട് വിശദീകരിക്കുമെന്നും ഡോ. മോഹനന് കുന്നുമ്മല് കൂട്ടിച്ചേര്ത്തു. വിദ്യാര്ഥികളുടെ പരാതികള് പരിഹരിക്കാന് എല്ലാ കോളജുകളിലും നിയമപരമായ സംവിധാനങ്ങള് നിലവിലുണ്ടെന്ന് അദ്ദേഹം ഓര്മ്മിപ്പിച്ചു.
https://www.facebook.com/Malayalivartha
