കോണ്‍ഗ്രസിനും പാര്‍ട്ടി അധ്യക്ഷ സോണിയാ ഗാന്ധിക്കും രൂക്ഷമായ ഭാഷയില്‍ മറുപടി നല്‍കി വിദേശകാര്യമന്ത്രി സുഷമ സ്വരാജ് രംഗത്തെത്തി. ലളിത് മോദി വിഷയത്തില്‍ പാര്‍ലമെന്റില്‍ പ്രസ്താവന നടത്തുകയായിരുന്നു സുഷമ സ്വരാജ്. തന്റെ രാജി ആവശ്യപ്പെട്ട് ബഹളം വച്ച കോണ്‍ഗ്രസിനെ ശക്തമായ ഭാഷയില്‍ സുഷമ നേരിട്ടു. ഇതിനായി കോണ്‍ഗ്രസിന്റെ പൂര്‍വകാല ചരിത്രം സുഷമ എടുത്തിട്ടു. കോണ്‍ഗ്രസ് തനിക്ക് നീതി നിഷേധിക്കുകയാണെന്നും സുഷമ പറഞ്ഞു.
തന്റെ മകളും ഭര്‍ത്താവും ലളിത് മോദിയില്‍നിന്നു പണം വാങ്ങിയിട്ടില്ലെന്ന് ആവര്‍ത്തിച്ച ശേഷമാണ് സുഷമ രാഹുലിനും സോണിയക്കും എതിരെ തിരിഞ്ഞത്. കഴിഞ്ഞ നാലു വര്‍ഷത്തിനിടെ ലളിത് മോദിയെ ഇന്ത്യയിലെത്തിക്കാന്‍ ഒരു കത്തുപോലും കോണ്‍ഗ്രസ് എഴുതിയില്ലെന്നും സുഷമ കുറ്റപ്പെടുത്തി.
ശാരദാ ചിട്ടി തട്ടിപ്പു കേസില്‍ പി. ചിദംബരത്തിന്റെ ഭാര്യ നളിനി ചിദംബരം പണം വാങ്ങിയെന്നും സുഷമ ആരോപിച്ചു. ഭോപ്പാല്‍ ദുരന്ത കേസില്‍ വാറന്‍ ആന്‍ഡേഴ്‌സനെ രാജീവ് ഗാന്ധി സഹായിച്ചു. ക്വത്‌റോച്ചിയെ രാജ്യം വിടാന്‍ സഹായിച്ചതും രാജീവ് ഗാന്ധിയാണ്. ഇവരില്‍നിന്ന് എത്ര പണം വാങ്ങിയെന്ന് രാഹുല്‍ അമ്മയോടു ചോദിക്കണം. കുടുംബ സഹൃത്തിനെ രക്ഷിക്കാന്‍ രാജീവ് രഹസ്യമായി അമേരിക്കയിലെത്തിയെന്നും സുഷമ പാര്‍ലമെന്റില്‍ പറഞ്ഞു. ഇടയ്ക്കിടയ്ക്ക് അവധി ആഘോഷിക്കാന്‍ വിദേശത്തേയ്ക്ക് പോകുന്ന രാഹുല്‍ അടുത്ത തവണ അവധിക്ക് പോയി തനിച്ചിരിക്കുമ്പോള്‍ സ്വന്തം കുടുംബത്തിന്റെ ചരിത്രം പഠിക്കാന്‍ കൂടി സമയം കണ്ടെത്തണംസുഷമ പറഞ്ഞു.
സുഷമയുടെ പ്രസംഗം കോണ്‍ഗ്രസ് അംഗങ്ങള്‍ ബഹളം വച്ച് തടസ്സപ്പെടുത്തുന്നുണ്ടായിരുന്നു. ലളിത് മോദിയെ ഭാര്യയോടൊപ്പം പോര്‍ച്ചുഗലിലേക്ക് പോവാന്‍ അനുവദിക്കുന്നത് ഇന്ത്യ, ബ്രിട്ടന്‍ ബന്ധത്തെ ബാധിക്കില്ലെന്ന് പറയുന്നത് മോദിയെ സഹായിക്കുന്ന നടപടിയല്ലേയെന്ന് കോണ്‍ഗ്രസ് ചോദിച്ചു.
പാര്‍ലമെന്റ് സമ്മേളനം അവസാനിക്കാന്‍ ഒരു ദിവസം മാത്രം ബാക്കി നില്‍ക്കെയായിരുന്നു ലളിത് മോദി വിഷത്തില്‍ പാര്‍ലമെന്റില്‍ കോണ്‍ഗ്രസും ബിജെപിയും ഇന്നും കൊമ്പുകോര്‍ത്തത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha