പദ്മഭൂഷൺ പുരസ്കാര ജേതാവായതിന് പിന്നാലെ സുന്ദർ പിച്ചൈയ്ക്കെതിരെ കേസ്; ബോളിവുഡ് സംവിധായകന്റെ പരാതിയെത്തുടർന്ന് എഫ്ഐആർ രജിസ്റ്റർ ചെയ്തു... ഞെട്ടലോടെ ടെക് ലോകം
ഗൂഗിൾ സിഇഒ സുന്ദർ പിച്ചൈയ്ക്കെതിരെ കേസ്. ബോളിവുഡ് സംവിധായകനും നിർമാതാവുമായ സുനീൽ ദർശൻ നൽകിയ പരാതിയിലാണ് കേസെടുത്തിരിക്കുന്നത്. പകർപ്പവകാശ ലംഘനത്തിനാണ് മുംബൈ പൊലിസ് കേസെടുത്തത്. സുന്ദർ പിച്ചൈ ഉൾപ്പെടെ അഞ്ച് പേർക്കെതിരെയാണ് കേസ്. ഏക് ഹസീന തി ഏക് ദീവാന താ എന്ന തന്റെ സിനിമ അനധികൃതമായി യൂട്യൂബിൽ അപ്ലോഡ് ചെയ്തെന്ന് കാണിച്ചാണ് സുനീൽ ദർശൻ പരാതി നൽകിയത്.
2017 ൽ പുറത്തിറങ്ങിയ ഈ ചിത്രം ഗൂഗിളിന്റെ ഉടമസ്ഥതയിലുള്ള യൂട്യൂബിൽ കോടിക്കണക്കിന് ആളുകളാണ് കണ്ടത്. സംഭവത്തിൽ ഗൂഗിളിന് ഇ-മെയിൽ അയച്ചിരുന്നെന്നും അവരിൽ നിന്ന് അനുകൂല പ്രതികരണമുണ്ടായില്ലെന്നും സുനീൽ വ്യക്തമാക്കുന്നു. അവരുടെ സാങ്കേതിക വിദ്യയോട് എനിക്ക് ബഹുമാനമുണ്ട്. പക്ഷേ എന്റെ അവകാശങ്ങൾ ലംഘിക്കപ്പെട്ടു.
ഇത് അവരുടെ ശ്രദ്ധയിൽപ്പെടുത്താനുള്ള ആദ്യ പടിയായാണ് ഈ പരാതിയെന്നും സുനീൽ പറയുന്നു. 1957ലെ പകർപ്പവകാശ ലംഘന നിയമത്തിലെ 51, 63, 69 വകുപ്പുകൾ പ്രകാരമാണ് സുന്ദർ പിച്ചൈയ്ക്കെതിരേ എഫ്ഐആർ രജിസ്റ്റർ ചെയ്തിരിക്കുന്നത്. കഴിഞ്ഞ ദിവസമാണ് നാൽപ്പത്തൊൻപതുകാരനായ സുന്ദർ പിച്ചൈ പദ്മഭൂഷൺ പുരസ്കാര ജേതാവായതായി പ്രഖ്യാപനം വന്നത്. ടെക് ലോകത്തെ അതികായരായ ഗൂഗിളിന്റെ ആദ്യ ഇന്ത്യക്കാരനായ സിഇഒയാണ് സുന്ദർ പിച്ചൈ.
ഇപ്പോൾ ഗൂഗിളിന്റെ മാതൃകമ്പനിയായ ആൽഫബെറ്റിന്റെ സിഇഒ പദവി വഹിക്കുകയാണ് അദ്ദേഹം. വാണിജ്യവും വ്യവസായവും എന്ന വിഭാഗത്തിലാണ് സുന്ദർ പിച്ചൈയെ പദ്മഭൂഷൺ പുരസ്ക്കാരത്തിനായി തെരഞ്ഞെടുത്തത്. തമിഴ്നാട്ടിൽ ജനിച്ച സുന്ദർ പിച്ചൈ 2015ലാണ് ഗൂഗിളിന്റെ തലപ്പത്തെത്തി ചരിത്രം കുറിച്ചത്. ഈ പദവിയിലെത്തുന്ന ആദ്യ ഇന്ത്യൻ വംശജനെന്ന പേരും പിച്ചൈയ്ക്ക് തന്നെ.
https://www.facebook.com/Malayalivartha