ഭക്ഷ്യസുരക്ഷാ ബില് പാര്ലമെന്റില്; രാജ്യത്തെ ദാരിദ്രം തുടച്ചു നീക്കുന്നതിനുള്ള തുടക്കമെന്ന് സോണിയ; ബില്ല് കോണ്ഗ്രസിന്റെ വോട്ടുസുരക്ഷയ്ക്കുള്ളതെന്ന് ബി.ജെ.പി
ഭക്ഷ്യസുരക്ഷാ ബില്ല് ലോക്സഭ ചര്ച്ചയ്ക്കെടുത്തു. വിശ്വഹിന്ദു പരിഷത്തിന്റെ പരികര്മയാത്ര ഉത്തര് പ്രദേശ് സര്ക്കാര് തടഞ്ഞതിന്റെ പേരില് ബിജെപി, എസ്പി അംഗങ്ങള് തമ്മിലുണ്ടായ ബഹളം മൂലം രണ്ടു മണിവരെ ലോക്സഭ തടസപ്പെട്ടിരുന്നു. തുടര്ന്ന് സഭ വീണ്ടും സമ്മേളിച്ചപ്പോഴാണ് സര്ക്കാര് ബില്ലില് ചര്ച്ചയ്ക്ക് അനുമതി തേടിയത്. സര്ക്കാരിനു വേണ്ടി കേന്ദ്ര ഭക്ഷ്യമന്ത്രി കെ.വി തോമസ് ആണ് സഭയില് അനുമതി തേടിയത്. സംസ്ഥാനങ്ങള്ക്ക് നിലവില് ലഭിക്കുന്ന ആനുകൂല്യങ്ങള് സംരക്ഷിച്ചുകൊണ്ടായിരിക്കും ബില്ല് നടപ്പാക്കുകയെന്ന് അദ്ദേഹം പറഞ്ഞു. 62 മില്യന് ടണ് ഭക്ഷ്യധാന്യമാണ് പദ്ധതി നടപ്പാക്കാന് വേണ്ടി വരുന്നതെന്നും കെ.വി തോമസ് കൂട്ടിച്ചേര്ത്തു.
ദാരിദ്രം തുടച്ചു നീക്കുന്നതിനുള്ള തുടക്കമാണ് ഭക്ഷ്യസുരക്ഷാ ബില്ലെന്ന് സോണിയാഗാന്ധി പറഞ്ഞു. പോഷകാഹാരക്കുറവുള്ള ഒരു കുട്ടിപോലും രാജ്യത്തുണ്ടാകാതിരിക്കലാണ് ബില്ലിലൂടെ ലക്ഷ്യമിടുന്നതെന്നും സോണിയ ലോക്സഭയില് നടന്ന ചര്ച്ചയില് വ്യക്തമാക്കി. ഭക്ഷ്യസുരക്ഷാ ബില് പാസാക്കുന്നതിലൂടെ രാജ്യത്തു നിന്ന് പട്ടിണി തുടച്ചുമാറ്റാനുള്ള അവസരമാണ് പാര്ലമെന്റിന് ലഭിച്ചിരിക്കുന്നതെന്നും ചരിത്രപരമായ ദൗത്യമാണ് യു.പി.എ സര്ക്കാര് ഏറ്റെടുത്തിരിക്കുന്നതെന്നും അവര് പറഞ്ഞു.
ബില് പ്രകാരം ഗര്ഭിണികള്ക്ക് വര്ഷം ആറായിരം രൂപയ്ക്ക് നിയമപരമായി അവകാശമുണ്ടായിരിക്കും. ആറിനും 18 നും ഇടയ്ക്ക് പ്രായമുള്ള എല്ലാ കുട്ടികള്ക്കും ഉച്ചഭക്ഷണവും ബില് ഉറപ്പു നല്കുന്നു.
കോണ്ഗ്രസിന്റെ വോട്ട് സുരക്ഷക്കുള്ളതാണ് ഭക്ഷ്യസുരക്ഷാ ബില്ലെന്ന് ബി.ജെ.പി നേതാവ് മുരളി മനോഹര് ജോഷി കുറ്റപ്പെടുത്തി. ചിലര്ക്കുമാത്രമാണ് കോണ്ഗ്രസിന്റെ ഭക്ഷ്യസുരക്ഷാ ബില്ല് സുരക്ഷ നല്കുന്നതെന്നും അദ്ദേഹം കുറ്റപ്പെടുത്തി.
അതേസമയം ബില്ല് പാര്ലമെന്റില് അവതരിപ്പിച്ച രൂപത്തില് പാസാക്കാന് കഴിയില്ലെന്ന് സി.പി.ഐ നേതാവ് പ്രഭോത് പാണ്ഡെ പറഞ്ഞു. ഗുരുതരമായ പോരായ്മകള് ബില്ലില് ഉണ്ടെന്നും അദ്ദേഹം വ്യക്തമാക്കി.
ബില് പാര്ലമെന്റില് അവതരിപ്പിക്കുന്നതിനു മുന്നോടിയായി സംസ്ഥാന മുഖ്യമന്ത്രിമാരുടെ യോഗം വിളിക്കണമായിരുന്നു എന്ന് സമാജ്വാദിപാര്ട്ടി വ്യക്തമാക്കി.
രാജീവ് ഗാന്ധിയുടെ ജന്മദിനത്തില് ഭക്ഷ്യസുരക്ഷാ ബില് പാസ്സാക്കാനായിരുന്നു കോണ്ഗ്രസിന്റെ ശ്രമം. എന്നാല് ബഹളം കാരണം അത് നടന്നില്ല. എന്തായാലും ബില്ല് ഇന്ന് ലോക്സഭയില് പാസാക്കി നാളെ രാജ്യസഭയില് അവതരിപ്പിക്കാനാണ് ഇപ്പോഴത്തെ കോണ്ഗ്രസിന്റെ ശ്രമം
https://www.facebook.com/Malayalivartha
