പ്രധാനമന്ത്രി നരേന്ദ്രമോദി അടുത്ത വര്‍ഷം പാകിസ്താന്‍ സന്ദര്‍ശിക്കും. പാകിസ്താനില്‍ നടക്കുന്ന \'ഹാര്‍ട്ട് ഓഫ് ഏഷ്യ\' സമ്മേളനത്തില്‍ പങ്കെടുക്കാന്‍ എത്തിയ വിദേശകാര്യ മന്ത്രി സുഷമ സ്വരാജാണ് ഇക്കാര്യം മാധ്യമങ്ങളെ അറിയിച്ചത്. പാകിസ്താനില്‍ നടക്കുന്ന സാര്‍ക്ക് ഉച്ചകോടിയില്‍ മോദി പങ്കെടുക്കും. വിദേശകാര്യമന്ത്രി സുഷമ സ്വരാജും പാക് സന്ദര്‍ശനത്തില്‍ പ്രധാനമന്ത്രിയെ അനുഗമിക്കും.
പാരീസില്‍ നടന്ന കാലവസ്ഥാ ഉച്ചകോടിയില്‍ ഇന്ത്യാ പാക് പ്രധാനമന്ത്രിമാര്‍ കൂടിക്കാഴ്ച നടത്തിയിരുന്നു. ഇതിന്റെ തുടര്‍ച്ചയെന്നോണം ഇരുരാജ്യങ്ങളിലെയും സുരക്ഷാ ഉപദേഷ്ടാക്കളും ബാങ്കോങ്ങില്‍ രഹസ്യ കൂടിക്കാഴ്ച നടത്തി. പിന്നാലെയാണ് സുഷമ സ്വരാജ് പാകിസ്താനിലേക്ക് യാത്രതിരിച്ചത്. ഇന്ത്യാ പാക് സമാധാന ചര്‍ച്ചകള്‍ക്ക് ഇതോടെ വലിയ പുരോഗതി ഉണ്ടാകുമെന്നാണ് രാഷ്ട്രീയ നിരീക്ഷകരുടെ വിലയിരുത്തല്‍.

ഇന്ത്യയും പാകിസ്താനും പക്വതയും ആത്മവിശ്വാസവും പ്രകടിപ്പിക്കേണ്ട സമയമാണിപ്പോഴെന്ന് വിദേശകാര്യ മന്ത്രി സുഷമാ സ്വരാജ് \'ഹാര്‍ട്ട് ഓഫ് ഏഷ്യ\' സമ്മേളനത്തില്‍ പറഞ്ഞു. ഇരുരാജ്യങ്ങളും തമ്മിലുള്ള വ്യാപാര ബന്ധങ്ങള്‍ ശക്തിപ്പെടുത്തണമെന്നും സുഷമാ അഭിപ്രായപ്പെട്ടു. പാകിസ്താനും അഫ്ഗാനിസ്ഥാനും ഇന്ത്യയുമായി വ്യാപാര ഗതാഗത കരാറില്‍ ഒപ്പിടുമെന്ന് പ്രതീക്ഷിക്കുന്നതായും പാകിസ്താന് താത്പര്യമുണ്ടെങ്കില്‍ സഹകരിച്ച് മുന്നോട്ട് പോകാന്‍ ഇന്ത്യ തയ്യാറാണെന്നും സുഷമാ സ്വരാജ് പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha