ഇന്ത്യയുടെയും പാക്കിസ്ഥാന്റെയും വിദേശകാര്യ സെക്രട്ടറിമാര്‍ അടുത്തമാസം കൂടിക്കാഴ്ച നടത്തും. പാക്കിസ്ഥാന്‍ വിദേശകാര്യ മന്ത്രാലയമാണ് ഇക്കാര്യം അറിയിച്ചത്. ഇരുരാജ്യങ്ങളും തമ്മിലുള്ള ഉഭയകക്ഷി ചര്‍ച്ചകള്‍ നിര്‍ത്തലാക്കിയിരുന്നത് പുനരാരംഭിക്കുന്നതുമായി ബന്ധപ്പെട്ടുള്ള വിശദാംശങ്ങള്‍ തീരുമാനിക്കുന്നതിനാണ് കൂടിക്കാഴ്ച. ഉഭയകക്ഷി ചര്‍ച്ചകളുടെ വിശദാംശങ്ങളും യോഗം ചേരേണ്ട സമയക്രമവും ചര്‍ച്ചയില്‍ തീരുമാനിക്കും.

അഫ്ഗാനിസ്ഥാനുമായി ബന്ധപ്പെട്ട ഒരു യോഗത്തില്‍ സംബന്ധിക്കുന്നതിനായി ഇന്ത്യന്‍ വിദേശകാര്യമന്ത്രി സുഷമ സ്വരാജ് കഴിഞ്ഞ ദിവസം പാക്കിസ്ഥാനിലെത്തിയിരുന്നു. ഈ അവസരത്തില്‍ പാക്കിസ്ഥാന്‍ പ്രധാനമന്ത്രിയുടെ സുരക്ഷാ ഉപദേഷ്ടാവ് സര്‍താജ് അസീസുമായി നടത്തിയ കൂടിക്കാഴ്ചയിലാണ് ഉഭയകക്ഷി ചര്‍ച്ചകള്‍ പുനരാരംഭിക്കാന്‍ തീരുമാനിച്ചത്. നേരത്തെ, ഇരുരാജ്യങ്ങളുടെയും ദേശീയ സുരക്ഷാ ഉപദേഷ്ടാക്കള്‍ തമ്മില്‍ ബാങ്കോക്കില്‍ കൂടിക്കാഴ്ച നടത്തിയിരുന്നു.

തര്‍ക്കവിഷയങ്ങളില്‍ ചര്‍ച്ചയാകാമെന്ന് ഈകൂടിക്കാഴ്ചയില്‍ തീരുമാനിക്കുകയും ചെയ്തിരുന്നു. ഫ്രഞ്ച് തലസ്ഥാനമായ പാരിസില്‍ അടുത്തിടെ നടന്ന കാലാവസ്ഥ ഉച്ചകോടിയില്‍ സംബന്ധിക്കാനെത്തിയ പാക്കിസ്ഥാന്‍ പ്രധാനമന്ത്രി നവാസ് ഷരീഫും ഇന്ത്യന്‍ പ്രധാനമന്ത്രി നരേന്ദ്ര മോഡിയും തമ്മില്‍ നടത്തിയ കൂടിക്കാഴ്ചയെ തുടര്‍ന്നാണ് ചര്‍ച്ചകള്‍ പുനരാരംഭിക്കാനുള്ള നീക്കത്തിന് തുടക്കമിട്ടത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha