നിക്ഷേപകരുടെ ആത്മവിശ്വാസം വര്‍ധിപ്പിക്കാന്‍ അദാനി പോര്‍ട്‌സിന്റെ പുതിയ നടപടി. ഏകദേശം 413 മില്യണ്‍ ഡോളറിന്റെ കടം മുന്‍കൂറായി അടയ്ക്കാന്‍ നിശ്ചയിച്ച ശേഷം, തങ്ങളുടെ ബാക്കിയുള്ള കടത്തില്‍ നിന്ന് 130 മില്യണ്‍ ഡോളര്‍ കൂടി നേരത്തെ അടച്ചു തീര്‍ക്കുമെന്ന് അദാനി ഗ്രൂപ്പിന്റെ കമ്പനിയായ അദാനി പോര്‍ട്‌സ് ആന്‍ഡ് സ്‌പെഷ്യല്‍ ഇക്കണോമിക് സോണ്‍ (എപിഎസ്ഇഎന്‍എസ്) ചൊവ്വാഴ്ച അറിയിച്ചു.

ശതകോടീശ്വരനായ വ്യവസായി ഗൗതം അദാനിയുടെ നേതൃത്വത്തില്‍, ഓഫ്‌ഷോര്‍ ടാക്‌സ് ഹാവന്‍സിന്റെ അനുചിതമായ ഉപയോഗവും സ്‌റ്റോക്ക് കൃത്രിമത്വവും ആരോപിച്ച് ജനുവരി 24ന് ഹിന്‍ഡന്‍ബര്‍ഗ് റിസര്‍ച്ചിന്റെ റിപ്പോര്‍ട്ടിനെ തുടര്‍ന്ന് ഗ്രൂപ്പിന്റെ ഏഴ് ലിസ്റ്റ് ചെയ്ത ഓഹരികള്‍ക്ക് ഏകദേശം 114 ബില്യണ്‍ ഡോളര്‍ വിപണി മൂല്യം നഷ്ടപ്പെട്ടു. എന്നാല്‍ ആരോപണങ്ങളെല്ലാം കമ്പനി നിഷേധിച്ചിരുന്നു.

ഈ വര്‍ഷം ആദ്യം ഒരു യുഎസ് ഷോര്‍ട്ട് സെല്ലറിന്റെ റിപ്പോര്‍ട്ടിനെ തുടര്‍ന്ന് ഗ്രൂപ്പിന്റെ ഓഹരികള്‍ ഇടിഞ്ഞതോടെ നിക്ഷേപകരുടെ ആത്മവിശ്വാസം വര്‍ധിപ്പിക്കുന്നതിനായി അദാനി പോര്‍ട്ട്‌സ് കഴിഞ്ഞ മാസം അവസാനം 3.375 ശതമാനം 2024 മെച്യൂരിറ്റി ഡോളര്‍ഡിനോമിനേറ്റഡ് ബോണ്ടുകളിലൂടെ 130 മില്യണ്‍ ഡോളര്‍ വരുന്ന വായ്പ ഒഴിവാക്കിയിരുന്നു.