കര്‍ണാടകയില്‍ 224 നിയമസഭ മണ്ഡലങ്ങളിലേക്കുള്ള വോട്ടെടുപ്പ് തുടങ്ങി...സജ്ജീകരിച്ചിരിക്കുന്നത് അരലക്ഷത്തോളം പോളിങ് ബൂത്തുകള്‍, വോട്ട് രേഖപ്പെടുത്തുന്നത് അഞ്ചരക്കോടിയോളം ജനം, പ്രതീക്ഷയോടെ കോണ്‍ഗ്രസും ബിജെപിയും.

ആകെയുള്ള 224 സീറ്റിലും ബിജെപി മത്സരിക്കുമ്പോള്‍ കോണ്‍ഗ്രസ് ഒരു സീറ്റ് സര്‍വോദയ കര്‍ണാടക പാര്‍ട്ടിക്കു നല്‍കി. നിര്‍ണായക ശക്തിയാകാനായി ആഗ്രഹിക്കുന്ന ജനതാദള്‍ (എസ്) 209 സീറ്റിലാണു മത്സരിക്കുന്നത്. 13 നാണ് വോട്ടെണ്ണല്‍ നടക്കുക.

80 വയസ്സിനു മുകളിലുള്ളവരില്‍ 90 ശതമാനവും ഇതിനോടകം വീടുകളില്‍ തന്നെ വോട്ടു രേഖപ്പെടുത്തി. എന്നാല്‍, ബെംഗളൂരു നഗരത്തിലുള്‍പ്പെടെ വെള്ളിയാഴ്ച വരെ മഴ തുടരുമെന്ന കാലാവസ്ഥാ പ്രവചനം ആശങ്കയേറെയുളവാക്കുന്നു.

ബജ്‌റങ് ദളിനെ നിരോധിക്കുമെന്ന കോണ്‍ഗ്രസ് പ്രകടന പത്രികയിലെ വാഗ്ദാനത്തിന്റെ പേരില്‍ അവസാന മണിക്കൂറിലും രാഷ്ട്രീയ രംഗം ചൂടുപിടിച്ചിരിക്കുകയാണ്.