കാണാതായ കുട്ടികളെ കണ്ടെത്തുന്നതിനും അവരുടെ പുനരധിവാസം സാദ്ധ്യമാക്കുന്നതിനുമായി കേന്ദ്രസര്‍ക്കാര്‍ ആവിഷ്‌കരിച്ച ഓപ്പറേഷന്‍ സ്‌മൈല്‍ പദ്ധതി രണ്ടാം ഘട്ടത്തിലേക്ക് കടക്കുന്നു. 2016 ജനുവരി 1 മുതല്‍ 31 വരെ രാജ്യമെങ്ങും ഇതിന്റെ ഭാഗമായി വ്യാപക പ്രചാരണങ്ങളും പ്രവര്‍ത്തനങ്ങളും നടക്കും . എല്ലാ സംസ്ഥാനങ്ങളോടും പദ്ധതിയില്‍ പങ്കെടുക്കാന്‍ ആവശ്യപ്പെട്ടുകൊണ്ട് കേന്ദ്ര ആഭ്യന്തര സെക്രട്ടറി കത്തയച്ചിട്ടുണ്ട്.
2015 ജനുവരിയില്‍ നടന്ന ഓപ്പറേഷന്‍ സ്‌മൈല്‍ ഒന്നാംഘട്ടത്തില്‍ 9146 കുഞ്ഞുങ്ങളെ കണ്ടെത്താന്‍ കഴിഞ്ഞു . ഇതിന്റെ ഭാഗമായി 2015 ജൂലൈയില്‍ ആരംഭിച്ച ഓപ്പറേഷന്‍ മുസ്‌കാന്‍ പദ്ധതി വഴി 19742 കുട്ടികളെ കണ്ടെത്താന്‍ കഴിഞ്ഞു. പദ്ധതിയുടെ ഭാഗമായി സ്തുത്യര്‍ഹമായ സേവനമനുഷ്ഠിച്ച 44 പോലീസ് ഓഫീസര്‍മാര്‍ക്ക് കഴിഞ്ഞ ഒക്ടോബറില്‍ ആഭ്യന്തര മന്ത്രി രാജ്‌നാഥ് സിംഗ് അവാര്‍ഡുകള്‍ നല്‍കിയിരുന്നു .
സ്‌മൈല്‍ രണ്ടാം ഘട്ടത്തില്‍ ബസ്റ്റാന്‍ഡുകളിലും മറ്റിടങ്ങളിലും അലഞ്ഞു തിരിഞ്ഞു നടക്കുന്ന കുട്ടികളെ കണ്ടെത്തി വിവരങ്ങള്‍ ശേഖരിക്കാന്‍ പരിശീലനം സിദ്ധിച്ച ഓഫീസര്‍മാരെ നിയമിച്ചിട്ടുണ്ട് . ഇവരുടെ വിശദവിവരങ്ങള്‍ സര്‍ക്കാരിന്റെ മിസ്സിംഗ് ചൈല്‍ഡ് പോര്‍ട്ടല്‍ വഴി പരസ്യപ്പെടുത്തും. പൊതുജനങ്ങള്‍ക്ക് അവബോധമുണ്ടാകാന്‍ ആവശ്യമായ പരസ്യങ്ങളും മറ്റ് പ്രചാരണ പരിപാടികളും സംഘടിപ്പിക്കുമെന്നും സര്‍ക്കാര്‍ അറിയിച്ചു.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha